Ka January 30, 2017, Kgotlatshekelo ya Toropo ya Astana e ile ya gana kopo ya go golola Teymur Akhmedov, yo o neng a le mo kgolegelong a letetse go seka. O ile a tshwarwa ka January 18 fa a ne a bua le setlhopha sa banna ba ba neng ba itira e kete ba kgatlhegela bodumedi jwa Basupi ba ga Jehofa. O ile a latofadiwa ka gore o “lotlhaganya madumedi” e bile o “dira gore batho ba akanye gore [bodumedi jwa gagwe] bo botoka go na le a mangwe.” Kgotlatshekelo ga ya ka ya ntsha bosupi jwa go tshegetsa tshwetso ya yone ya go gana go golola Mosupi yono.

Kgotlatshekelo e gana go fetola tshwetso ya yone e bile e gana go reetsa boikuelo bope fela. Teymur o tshwanetse go leta mo kgolegelong go fitlha dipatlisiso tsa kgetsi ya gagwe di wediwa. Fa a ka bonwa molato, a ka nna a fetsa dingwaga di le tlhano go ya go di le lesome kwa kgolegelong.