DAR ES SALAAM, Tanzania—Ka Phukwi 12, 2013, Kgotlatshekelo ya Boikuelo ya kwa Tanzania, e leng kgotlatshekelo e e kwa godimo ga tsone tsotlhe mo nageng eo, e ne ya dira tshwetso ya gore dikolo tsa mo kgaolong ya Mbeya di gatakile ditshwanelo tsa kgololesego ya bodumedi tsa baithuti ba le 127 ba ba neng ba ba leleka kwa sekolong kgotsa ba ba otlhaya ka go bo ba sa opela pina ya setšhaba.

Ka 2007, Boto ya Sekolo sa Shikula e ne ya leleka basha ba batlhano ba Basupi ka go bo ba ile ba gana go opela pina ya setšhaba. Mo godimo ga moo, dikolo tsa poraemari le tsa sekontari mo kgaolong eno di ne tsa otlhaya basha ba bangwe ba Basupi ba le 122 ka lone lebaka leo. E re ka baithuti bao ba le 127 ba ne ba sa atlega fa ba ne ba ikuetse kwa balaoding ba tsa thuto le kwa go tonakgolo, ba ne ba kopa thuso ya semolao kwa Kgotlatshekelokgolo ya kwa Tanzania, e leng kgotlatshekelo ya bobedi ka maemo mo nageng eno. Le fa Kgotlatshekelokgolo e ne e se mogopolo mongwe, e ne ya dumalana le gore bana ba lelekwe. Kgabagare, ka Sedimonthole 2, 2010, baithuti ba ne ba ikuela kwa Kgotlatshekelong ya Boikuelo. Go ya ka direkoto, Kgotlatshekelo ya Boikuelo “e ne ya gana le go kgaphela kwa thoko” tshwetso e e neng e dirilwe ke Kgotlatshekelokgolo ya bo ya phimola dikotlhao tsotlhe tsa tshwetso eo.

Zadok Mwaipwisi, mmueledi wa Basupi ba ga Jehofa kwa Tanzania a re: “Re itumelela tshwetso e kgotlatshekelo e e dirileng le go bo e eme nokeng basha bano ba ba sa opelang pina ya setšhaba ka ntlha ya segakolodi sa bone. Phenyo eno e tlhomamisa molao wa tshwanelo ya kgololesego ya bodumedi ya Basupi ba ga Jehofa le ya baagi botlhe ba Tanzania.”

Media Contact(s):

International: J. R. Brown, Office of Public Information, tel. +1 718 560 5000

Tanzania: Zadok Mwaipwisi, tel. +255 22 2650592