BANGKOK—Badiredi ba puso ya Thailand ba dirisa dikgatiso tsa Basupi ba ga Jehofa go ruta batho ka dilo tse di jaaka go godisa bana, go thibela go sotliwa ke mongwe wa lelapa, go thusa batho go itlhokomela mo tlhaloganyong le mo mmeleng. Go setse go fetile dingwaga di le tharo ba ntse ba dira jalo.

Lefapha la thuto la kwa Thailand le na le Ditheo Tsa Thuto di feta 8 700 mo nageng yotlhe. Mo godimo ga moo, go na le ditheo tse dingwe tse 11 tse di diretsweng go katisa baeteledipele ba dikgaolo tse di farologaneng. Chaiwat Saengsri yo e leng mokaedi wa Setheo se se kwa porofenseng ya Nakhon Nayok e e kwa bokonebotlhaba jwa Bangkok a re: “Ke kgatlhiwa ke Basupi ba ga Jehofa ka gonne ba dira tiro ya bone mo lefatsheng lotlhe. Ba thusa batho go itse Mmopi wa rona. Le rona re leka go thusa batho gore ba ithute go tshedisana ka kagiso le gore ba itumelele botshelo.” Gape o ne a re: “Ka sekai, Lefapha la Naga la Merero ya Selegae le la Tshireletsego le ne la dirisa setlhogo sengwe se se mo makasineng wa Tsogang! se se reng ‘Kafa o ka Tilang go Bua Mafoko a a Tlhabang ka Gone,’ go ruta baeteledipele ba metse. Setlhogo seo se ile sa re thusa fela thata.” Rre Chaiwat o ne a laletsa Basupi gore ba tlise dikgatiso tsa bone ka nako ya fa go ne go na letsholo lengwe le mo go lone go neng go tlile baeteledipele ba le 100 le barutisi ba le 20 go tswa kwa diporofenseng di le 28. Letsholo leo le ne le dirisediwa go katisa baeteledipele gore ba thuse batho. Basupi bao ba mo setshwantshong se se fa godimo ba bapile le Rre Chaiwat.

Anthony Petratyotin yo e leng mmueledi wa Basupi ba ga Jehofa kwa Thailand a re: “Re itumelela gore baeteledipele ba dirisa dikgakololo tsa Baebele tse di mo dikgatisong tsa rona. Re tla tswelela re naya badiredipuso dikgatiso tsa rona e bile re tla tswelela ka tiro ya rona ya go phasalatsa dikgatiso tseno ka ntlo le ntlo.”

Media Contacts:

International: David A. Semonian, Office of Public Information, +1-845-524-3000

Thailand: Anthony Petratyotin, +66-2-375-2200