NOUMEA, New Caledonia—Mo bosigong jwa March 13, 2015, Sefefo sa Boboatsatsi se se bidiwang Pam se ne sa phepheula setlhaketlhake sa Vanuatu. Ofisi ya lekala ya Basupi ba ga Jehofa ya kwa New Caledonia e ne ya simolola ka go bega gore ga go na Mosupi ope yo o ileng a tlhokafala kgotsa a gobadiwa ke diphefo tseo tse di maatla. Go sa ntse go dirwa dipatlisiso mme gone go tlhomamisitswe gore kwa setlhaketlhakeng sa Efate, matlo a le 31 a Basupi ba ga Jehofa a ile a senyega mme batho ba le 58 ba ile ba gobala thata. Kwa setlhaketlhakeng sa Tanna, matlo otlhe a Basupi a ne a senyegile. Gape diphefo tseo tse di maatla di ne tsa diga Diholo Tsa Bogosi di le tharo mme e nngwe ya welwa ke setlhare.

Komiti ya namolo e e kwa motsemoshate wa Vanuatu e bong Port Vila, e ile ya tlamela malapa a ka nna 100 a Basupi ka dijo, metsi le lefelo la bonno. Mo godimo ga moo, go ile ga romelwa tone ya dilwana go thusa Basupi ba kwa Tanna ka dilo tse ba di tlhokang. Ofisi ya lekala ya kwa Australia e dirisana le ofisi ya lekala ya kwa New Caledonia go tshegetsa tiro eno ya namolo e e akaretsang go aga mafelo a bonno, go baakanya matlo, go ntsha dikobo, diaparo le dilo tse dingwe.

Jean-Pierre Francine yo e leng mmueledi wa Basupi ba ga Jehofa kwa New Caledonia a re: “Re leboga fela thata go bo bakaulengwe ba rona ba re thusa e bile re leboga le mekgatlho ya puso e e ileng ya thusa bakaulengwe ba rona. E re ka jaanong difofane di kgona go dirisiwa, moemedi wa ofisi ya lekala ya kwa New Caledonia mmogo le bareri ba etela ditlhaketlhake tseno go ba tshegetsa le go ba gomotsa ka Dikwalo.”

Media Contact(s):

International: J. R. Brown, Office of Public Information, tel. +1 718 560 5000

New Caledonia: Jean-Pierre Francine, tel. +687 43 75 00