NEW YORK—Basupi ba ga Jehofa ba laletsa batho go tla kwa ditiragalong tse dikgolo tse ba di rulagantseng ka ngwaga wa 2017.

Ka Labobedi, April 11, 2017, Basupi ba tla amogela batho ba ba tla bong ba tlile mo moletlong wa Sejo sa Morena sa Maitseboa se gape se bidiwang Segopotso sa Loso lwa ga Keresete. Ba tla tswa letsholo le le kgethegileng, le le simolotseng ka Matlhatso, March 18, 2017 mme ba tla le wetsa ka April 11, 2017. Ba naya batho ditaletso tse di nang le lefelo le tiragalo eo e tla bong e tshwaretswe kwa go lone. Segopotso ke tiragalo ya botlhokwa thata mo Basuping ba ga Jehofa.

Gape ba tla laletsa batho go tla go reetsa puo ya Baebele ya metsotso e le 30 e setlhogo sa yone se reng, “Go Tshela ka Kagiso mo Lefatsheng le le Galefileng.” Puo eno ya Baebele e tla tshwarelwa kwa Diholong Tsa Bogosi ka mafelobeke a di 15 le 16 April 2017.

Go simolola ka di 19 tsa May 2017, Basupi ba ga Jehofa ba tla bo ba simolola dikopano tsa malatsi a le mararo tsa setlhogo se se reng “O se Ka wa Ineela!” Di tla simolola kwa United States di bo di tswelela mo dinageng tse dingwe go ya go fitlha mo masimologong a ngwaga wa 2018. Pele kopano nngwe le nngwe e simologa, Basupi ba tla nna le letsholo la dibeke di le tharo le mo go lone ba tla bong ba laletsa batho gore ba tle kwa mafelong a dikopano tseo di tla bong di tshwaretswe kwa go one.

Go tsenwa mahala kwa ditiragalong tseno, go akaretsa le kwa diholong tsa Basupi ba ga Jehofa. Babegadikgang ba lalediwa gore ba ikgolaganye le ofisi ya lekala ya Basupi ba ga Jehofa e e mo nageng ya bone fa ba batla go kwala ka ditiragalo tseno.

Babegadikgang ba ka Ikgolaganya le:

David A. Semonian, wa Ofisi ya Tshedimosetso mo nomorong ya +1-845-524-3000