NEW YORK—Ka May 19, 2017, dikopano tsa Basupi ba ga Jehofa tsa malatsi a mararo tsa setlhogo se se reng, “O se Ka wa Ineela!” di tla bo di simologa. Di tla tshwarelwa mo mafelong a a farologaneng mo lefatsheng lotlhe mme di tla tswelela go fitlha mo masimologong a ngwaga wa 2018. Fela jaaka Basupi ba ga Jehofa ba tlwaetse go dira ngwaga le ngwaga, ba tla simolola letsholo la go laletsa batho kwa dikopanong tseno.

Go tsenwa mahala. Mmueledi wa Basupi ba ga Jehofa kwa ntlokgolong ya kwa Warwick, New York e bong David A. Semonian a re: “Mo ngwageng o o fetileng, batho ba ka nna dimilione di le 13 ba ile ba tla kwa dikopanong tsa rona. Re solofela gore monongwaga ba tla tla ka bontsi.”

Go tla bo go na le dipuo tsa Baebele, dipotsolotso le dibidio. Mo godimo ga moo, go tla nna le filimi e e reng Gakologelwa Mosadi wa ga Lote e e kgaogantsweng ka dikarolo tse tharo mme e tla tshamekiwa thapama mongwe le mongwe go simologa ka Labotlhano go fitlha ka Sontaga. Website ya Basupi ba ga Jehofa ya jw.org e na le letlha le lefelo le kopano nngwe le nngwe e tla tshwarelwang kwa go lone. Babegadikgang ba ka ikgolaganya le ofisi ya Basupi ba ga Jehofa e e mo nageng ya bone fa ba batla tshedimosetso e e oketsegileng go akaretsa le maina a metswedi e mengwe ya tshedimosetso e e rulagantseng go bega ka kopano eno.

Semonian a re: “Mathata a ka re kgoba marapo le go dira gore re feleletse re batla go ineela mo botshelong. Dikopano tsa monongwaga di tla thusa Basupi ba ga Jehofa le batho ba bangwe ka gonne di tla re kgothaletsa gore re itshoke le gore re kgone go lebana le dikgwetlho tsa botshelo ka katlego.”

Babegadikgang ba ka Ikgolaganya le:

David A. Semonian mo Ofising ya Tshedimosetso mo nomorong ya +1-845-524-3000