NEW YORK—Go bonala puso ya Russia e tlile go thibela Basupi ba ga Jehofa kwa nageng eo. Basupi ba ile ba tsibogela matshosetsi ao ka go rulaganya letsholo la lefatshe lotlhe la go kwalela badiredi ba puso ya Kremlin le ba Kgotlatshekelo ya Makgaolakgang ba ikuela gore ba se ka ba tshegetsa tshwetso ya puso. Setlhopha se se Laolang sa Basupi ba ga Jehofa se laletsa Basupi ba feta 8 000 000 mo lefatsheng lotlhe gore ba tseye karolo mo letsholong leo.

Ka March 15, 2017, Lefapha la Tshiamiso le ile la kopa Kgotlatshekelo ya Makgaolakgang ya kwa Russia gore e tswale Ofisi ya Lekala la Basupi ba ga Jehofa ka gonne e kgothaletsa borukhutlhi e bile e le kotsi mo setšhabeng. Gape le ile la kopa gore tiro ya ofisi eo e thibelwe. Fa Kgotlatshekelo ya Makgaolakgang e ka dumalana le kopo eo, seo se raya gore ofisi ya lekala e e kwa St. Petersburg e tlile go tswalwa. Seo se ka felela ka gore mekgatlho ya semolao e ka nna 400 e Basupi ba e dirisang e tswalwe mme seo se tla dira gore diphuthego tse di fetang 2 300 tsa Basupi ba ga Jehofa kwa Russia di se ka tsa kwadisiwa semolao. Puso e ka nna ya feleletsa e gapile dikago tsa lekala go akaretsa le mafelo a Basupi ba tshwarelang dipokano tsa bone mo go one. Mo godimo ga moo, Basupi ba ka nna ba sekisiwa fa ba fitlhelwa ba dira ditiro tsa bodumedi jwa bone. Go lebeletswe gore Kgotlatshekelo ya Makgaolakgang e ntshe katlholo ka April 5.

David A. Semonian yo e leng mmueledi wa Basupi kwa ntlokgolong ya lefatshe lotlhe a re: “Setlhopha se se Laolang sa Basupi ba ga Jehofa se leka go itsise lefatshe lotlhe ka boemo jono jo bo potlakileng. Puso ga e dirise sentle melawana ya yone e e malebana le borukhutlhi ka gonne e sekisa batho ba ba ikobelang molao jaaka e kete ke dikebekwa. Basupi ba latofadiwa ka maaka.”

Ga se lekgetlo la ntlha Basupi ba tsaya kgato eno. Dingwaga tse 20 tse di fetileng, Basupi ba ile ba buelela badumedi ka bone kwa Russia fa maloko mangwe a puso ya Russia a nako eo a ne a leka go bua maaka ka Basupi ba koo. Gape ba ile ba kwala makwalo a mo go one ba neng ba kopa badiredipuso gore ba emise go bogisa Basupi kwa dinageng tse di jaaka Joredane, Korea le Malawi.

Rre Semonian a re: “Ga go na sepe se se phoso ka go bala Baebele, go opela le go rapela le badumedi mmogo le rona. Re solofela gore makwalo ano a tla tlhotlheletsa badiredipuso ya Russia gore ba emise ka maikaelelo ano a a sa siamang.”

Media Contacts:

International: David A. Semonian, Office of Public Information, +1-845-524-3000

Russia: Yaroslav Sivulskiy, +7-812-702-2691