Kwa tshimologong Basupi ba ga Jehofa ba kwa Russia ba ne ba obamela Modimo ka kagiso fa e sa le ba kwadisiwa semolao ka 1992. Basupi ba ile ba kwadisiwa gape ka 1999 fa molao wa naga eo o o malebana le dikgang tsa bodumedi o ne o fetolwa. Go na le mekgatlho e e farologaneng ya Basupi ba ga Jehofa e e kwadisitsweng semolao kwa nageng eo.

Le fa go ntse jalo, Basupi ba ga Jehofa ga ba tlhole ba kgona go obamela Modimo ba gololesegile kwa nageng eo. Fa e sa le ka 2009, mapodise a naga eo a ntse a le mo letsholong la go nna kgatlhanong le Basupi mme ba dirisa molao wa naga eo ka tsela e e sa siamang e bile ba re Basupi ba ga Jehofa ba kotsi. Dikgotlatshekelo tsa Russia di a re dikgatiso di le dintsi tsa Basupi di kotsi, go akaretsa le website ya rona ya jw.org. Mapodise a ile a phuruphutsha matlo a Basupi le mafelo a ba obamelang Modimo kwa go one. Basekisi ba ile ba latofatsa Basupi ka go tlola molao ka gonne ba ya dipokanong tsa bone.

Le fa Kgotlatshekelo ya Yuropa ya Ditshwanelo Tsa Batho le mekgatlho e mengwe ya boditšhabatšhaba e le kgatlhanong le tsela e setlhogo e Basupi ba ga Jehofa ba tshwarwang ka yone kwa nageng eo, puso ya Russia yone ga e re dire sepe ka gone. Mapodise a naga eo a leka sotlhe se a ka se kgonang go thibela Basupi ba ga Jehofa.