Kgotlatshekelo ya Makgaolakgang ya Russia e simolotse tsheko ya letsatsi la gompieno ka go reetsa babueledi ba Lefapha la Tshiamiso ba ba ileng ba tlhalosa lebaka la go bo ba re mekgatlho ya semolao e Basupi ba ga Jehofa ba e dirisang e tswalwe. Ba ile ba tlhalosa gore dikgotlatshekelo tse dingwe di ile tsa e thibela ka gonne di lemogile gore mekgatlho eo e kotsi mo setšhabeng. Go tswa foo, moatlhodi o ile a botsa babueledi bano gore go tla jang gore dilo tse di dirwang ke mekgatlho e le 8 fela di ame Ofisi ya Lekala go akaretsa le mekgatlho e mengwe e le 395 ya Basupi mo Russia. Moatlhodi o ile a ba kopa gore ba tlhalose gore tshwetso ya go tswala mekgatlho eno e ne e tla ama kobamelo ya Basupi ba ga Jehofa jang mme gangwe le gape o ne a ba kopa gore ba tlhalose gore Basupi ba kotsi mo setšhabeng ka ditsela dife. Babueledi ba Basupi ba ne ba nna ba botsa Lefapha la Tshiamiso dipotso go bontsha kgotlatshekelo gore lefapha le ne le sa batle fela go thibela Basupi ba ga Jehofa, gape le ne le batla go tswala mekgatlho yotlhe ya semolao e ba e dirisang.

Kgetsi e tla boa e tsena gape ka April 7, 2017 ka ura ya bolesome mo mosong.