NEW YORK—Gompieno Kgotlatshekelo ya Makgaolakgang e reetsa kgetsi e mo go yone Lefapha la Tshiamiso le ikuelang gore Ofisi ya Lekala la Basupi ba ga Jehofa ya kwa Russia e tswalwe. Kgotlatshekelo e kopile go reetsa kgetsi eno gape ka Labone , April 6, 2017, ka ura ya bobedi thapama.

Ka March 30, 2017, Basupi ba ga Jehofa le bone ba ile ba bula kgetsi kgatlhanong le Lefapha la Tshiamiso. Le fa go ntse jalo, gompieno Kgotlatshekelo e ile ya gana go reetsa kgetsi eo. Gape kgotlatshekelo e ile ya gana go letla baitseanape ba tsa molao go neela bosupi ka dilo tse Lefapha la Tshiamiso le latofatsang Basupi ka tsone. Mo godimo ga moo, e gana gore Basupi ba ntshe bosupi jwa go bontsha dilo tse puso e ileng ya di dira go leka go tlhama ditatofatso tsa maaka kgatlhanong le mekgatlho ya semolao e Basupi ba ga Jehofa ba e dirisang.

Tsela e kgetsi eno e tumileng ka yone e dirile gore makwalodikgang a a itseng mo lefatsheng lotlhe a Time le The New York Times a kwale ka kgang eno ka di 4 le di 5 tsa April.

Mmueledi wa Basupi ba ga Jehofa kwa ntlokgolong ya lefatshe lotlhe kwa New York e bong David A. Semonian a re: “Re solofela gore Kgotlatshekelo ya Makgaolakgang ya kwa Russia e tla buelela ditshwanelo tsa badumedi ka rona ba kwa Russia tsa go obamela Modimo ka kgololesego. Lefatshe le tla bo le lebile ka kelotlhoko go bona gore a Russia e tla sireletsa baagi ba yone ba ba ikobelang molao ba e leng Basupi ba ga Jehofa.”

Babegadikgang ba ka Ikgolaganya le:

Kwa ntlokgolong: David A. Semonian, wa mo Ofising ya Tshedimosetso mo nomorong ya +1-845-524-3000

Kwa Russia: Yaroslav Sivulskiy, mo nomorong ya +7-812-702-2691