Ka April 20, 2017, Kgotlatshekelo ya Makgaolakgang e ile ya ntsha katlholo ya go thibela tiro ya Basupi ba ga Jehofa kwa Russia le fa gone batho mo lefatsheng lotlhe ba ne ba le kgatlhanong le kopo ya Lefapha la Tshiamiso. Moatlhodi Yuriy Grigoryevich Ivanenko wa Kgotlatshekelo ya Makgaolakgang o ile a dumalana le kopo ya Lefapha la Tshiamiso ya gore “Ofisi ya Lekala la Basupi ba ga Jehofa ya mo Russia le mekgatlho ya bodumedi e e okametsweng ke ofisi eno di tswalwe [le gore] dikago tsotlhe tsa mokgatlho ono di newe Puso ya Russia.”

Moatlhodi Ivanenko o ne a tlhalosa gore mekgatlho yotlhe ya semolao e Basupi ba e dirisang mo Russia e ne e tshwanetse go tswalwa ka letsatsi le katlholo e tswileng ka lone. Le fa Basupi ba ga Jehofa ba tlile go ikuela kwa Komiting ya Boikuelo ya Kgotlatshekelo ya Makgaolakgang, tshwetso eno e raya gore tiro ya bone mo Russia e thibetswe.

Vasiliy Kalin, yo o neng a romelwa kwa Siberia le batsadi ba gagwe fa a ne a na le dingwaga di le nnê fela ka gonne e le Basupi ba ga Jehofa, o ne a re: “Katlholo ya letsatsi la gompieno, e fetotse botshelo jwa Mosupi mongwe le mongwe wa ga Jehofa mo Russia. Seo se raya gore jaanong re tla tshwarwa le go sekisiwa fa ba ka re fitlhela re dira dilo tse di amanang le bodumedi jwa rona.”

Philip Brumley, yo e leng mmueledi wa Basupi ba ga Jehofa o ne a re: “Tshwetso ya gompieno e re swabisitse tota. Bosupi jotlhe jo bo sekasekilweng bo dira gore re tle mo tshwetsong e le nngwe fela—gore Ofisi ya Lekala ga e ise e bontshe ka tsela epe gore e kotsi mo setšhabeng. Re tlile go ikuela kgatlhanong le katlholo eno.”