Ka January 16, 2017, Kgotlatshekelo ya Toropo ya Moscow e ile ya tsholola kgetsi ya boikuelo ya Basupi ba ga Jehofa ya gore e thibele Mosekisi wa Naga go tswala lekala la bone. Baatlhodi ba bararo ba ba neng ba reeditse kgetsi eo ga ba a ka ba dumalana le se babueledi ba Basupi ba neng ba se bua mme ba ile ba tsaya tshwetso ya bone morago ga metsotso e le lesome. Kgotlatshekelo eno ya Moscow e ile ya dumalana le tshwetso e e ileng ya dirwa ke Kgotlatshekelo ya Kgaolo ya Tverskoy ka October 12, 2016 ya gore lekala la Basupi le tswalwe. Seo se raya gore Mosekisi wa Naga a ka nna a dira se a neng a ikaeletse go se dira ka March 2, 2016 fa a ne a re o batla go tswala lekala. Le fa go ntse jalo, Basupi ba ga Jehofa ga ba ise ba tlhaloganye sentle gore tshwetso eo e tla ama jang kgololesego ya bone ya bodumedi kwa Russia.