E setse e le letsatsi la bobedi Kgotlatshekelo ya Makgaolakgang ya Russia e reeditse kgetsi e mo go yone Lefapha la Tshiamiso le kopang gore Ofisi ya Lekala la Basupi ba ga Jehofa kwa Russia e tswalwe. Kgotlatshekelo e ile ya kopa gore kgetsi e tswelele gape ka Labotlhano, April 7, 2017, ka ura ya bolesome mo mosong.

David A. Semonian yo e leng mmueledi wa Basupi kwa ntlokgolong ya lefatshe lotlhe kwa New York a re: “Tsheko ya gompieno e bontsha sentle gore Lefapha la Tshiamiso ga le na bosupi jo bo tshegetsang ditatofatso tsa lone kgatlhanong le mokgatlho wa rona.” Gape o ne a re: “Mme re itumelela gore [babueledi] ba Lefapha la Tshiamiso ba buile mo pepeneng gore fa Basupi ba ga Jehofa ba ka thibelwa, seo se raya gore ba tla tshwarwa fa ba ka fitlhelwa ba kopane mmogo go tla go rapela. Re solofela gore Kgotlatshekelo ya Makgaolakgang e tla diragatsa tshiamiso le go thibela gore ditshwanelo tsa rona di se ka tsa gatakwa.”

Babegadikgang ba ka Ikgolaganya le:

Kwa ntlokgolong: David A. Semonian, wa Ofisi ya Tshedimosetso mo nomorong ya +1-845-524-3000

Kwa Russia: Yaroslav Sivulskiy, mo nomorong ya +7-812-702-2691