Kgetsi e buseditswe morago mme ga go ise go bewe letlha le lengwe.

Ka June 7, 2017, ka ura ya bobedi thapama, Kgotlatshekelo ya Kgaolo ya Oryol e tla reetsa boikuelo jwa kgetsi e e kgatlhanong le go tshwarwa ga ga Dennis Christensen yo o tswang kwa Denmark. Rre Christensen yo e leng mogolwane wa Phuthego ya Basupi ba ga Jehofa ya kwa Oryol o tshwerwe ka May 25, 2017, fa mapodise a ne a tlhasela phuthego eo.

Puso ya Russia ga e bolo go nna e ntse e kgoreletsa kobamelo ya Basupi ba ga Jehofa mme ka June 2016 e ne ya tswala mokgatlho wa Basupi kwa Oryol ka mabaka a gore o kotsi mo setšhabeng. E re ka Kgotlatshekelo ya Makgaolakgang e tswetse Ofisi ya Lekala ya Basupi le mekgatlho yotlhe ya Basupi ba ga Jehofa kwa Russia, mapodise a lephata le le kgethegileng la FSB a re fa Basupi ba kwa Oryol ba kopane mmogo, ba a bo ba tsweletsa tiro e e seng ka fa molaong e go tweng e kotsi mo setšhabeng.

Mapodise a lephata le le kgethegileng la FSB a ile a simolola go dira dipatlisiso ka Rre Christensen ka gonne a akanya gore e ne e le leloko la mokgatlho wa kwa Oryol o o tswetsweng. Le fa go ntse jalo, Rre Christensen ga ise a tsamaye a nne le leloko la mokgatlho oo. Gone jaanong o mo kgolegelong go fitlha ka July 23, 2017, ka gonne mosekisi a akanya gore Rre Christensen a ka nna a tswa mo Russia pele ga mapodise a wetsa dipatlisiso tsa bone.

Basupi ba ga Jehofa ba tsentse kopo ya go ikuela kgatlhanong le go tshwarwa ga ga Rre Christensen, gape ba tsentse dikopo tse dingwe kwa dikgotlatshekelong tse di kwa ntle ga naga. Tshwetso e e dirilweng ke Kgotlatshekelo ya Makgaolakgang e dirile gore Basupi ba ga Jehofa ba le bantsi kwa Russia ba bogisiwe ke puso le baagi ba bangwe.