Ka April 12, 2017, kgetsi ya go thibela Basupi ba ga Jehofa kwa Russia e mo letsatsing la bonê kwa Kgotlatshekelong ya Makgaolakgang. Babueledi ba Ofisi ya Lekala ba ile ba tlhalosa gore kopo ya Lefapha la Tshiamiso ga e dumalana le molaotheo wa naga ya Russia le maitlamo a naga eno e a dirileng le mekgatlho ya boditšhabatšhaba ya ditshwanelo tsa batho.

Babueledi bano ba ile ba tlhalosa gore kopo eno ga e tsamaisane le melao ya boditšhabatšhaba, go akaretsa le Tumalano ya Yuropa le Molawana wa Boditšhabatšhaba wa Ditshwanelo Tsa Batho le Tsa Dipolotiki. Molaotheo wa Russia le one o tlhalosa gore motho o na le tshwanelo ya go itlhophela bodumedi, tshwanelo ya go bua, tshwanelo ya go kopana mmogo (le tshwanelo ya go bula mokgatlho wa semolao).

Basupi ba banê ba ne ba neela bosupi jwa gore diphuthego tsa bone ga di dirise dibuka tse di mo lenaaneng la dikgatiso tse di thibetsweng ke puso le gore Basupi ba ga Jehofa ga ba dirisane le mekgatlho ya borukhutlhi. Moatlhodi o ne a kopa gore kgetsi eno e boe gape ka April 19, 2017, ka ura ya bolesome mo mosong.