Kgotlatshekelo ya Makgaolakgang e mo letsatsing la boraro la kgetsi e mo go yone puso e kopang gore Basupi ba ga Jehofa ba thibelwe mo Russia. Maloko a mabedi a komiti ya botsamaisi ya Ofisi ya Lekala a ne a tlhalosa gore goreng a sa dumalane le kopo ya Lefapha la Tshiamiso.

Sergey Cherepanov o ne a sa dumalane le kopo ya Lefapha la Tshiamiso ya gore Ofisi ya Lekala e ne e tlola molao o o malebana le ditiro tsa borukhutlhi. Mme gone, Lefapha ga le a ka la tlhalosa gore ke eng se Ofisi ya Lekala e se dirileng go bontsha gore e tlola molao kgotsa gore ke eng se e tshwanetseng go se dira go bontsha gore e tlotla molao. Fa leloko la komiti ya botsamaisi e bong Vasiliy Kalin a sena go tlhalosa gore Ofisi ya Lekala e na le dingwaga di le 26 e le gone, o ne a botsa a re: “Re simolotse leng go nna kotsi mo setšhabeng?” O ne a tlhalosa gore Basupi ba ga Jehofa ga ba ise ba fetoge, ba sa ntse ba ikobela badiredipuso le gore ke batho ba ba ratang kagiso. O ne a bolelela kgotlatshekelo gore o utlwisiwa botlhoko ke gore Basupi ba setse ba simolotse go bogisiwa.

Moatlhodi o ne a kopa gore kgetsi e boe e tsena gape ka April 12, 2017 ka ura ya bolesome mo mosong.