ST. PETERSBURG, Russia—Ka Phatwe 7, 2013, Kgotlatshekelo ya Kgaolo ya Tsentralniy mo toropong ya Tver, e e dikilometara di le 160 kwa bokone jwa Moscow, e ne ya ntsha taolo ya gore website e e rutang Baebele ya jw.org e thibelwe mo Pusong ya Russia.

Le fa gone jw.org e dirisiwa ke batho ba le bantsi lefatshe ka bophara e bile e tlotlwa ke batho ba ba ratang go dira dipatlisiso, kgotlatshekelo e ne ya dumalana le balaodi ba ba neng ba batla gore website eno e thibelwe. Kgotlatshekelo e dirile tshwetso eno e sa itsise kgotsa e sa utlwa maikutlo a bagatisi ba website eno, e leng Watchtower Bible and Tract Society of New York. Basupi ba ga Jehofa ba ikuela kgatlhanong le tshwetso eno kwa Kgotlatshekelong ya Naga kwa Tver. Kgetsi eno e tla tsena ka Ferikgong 22, 2014.

Fa ba sa atlege, seo se tla raya gore Basupi ba ga Jehofa ba ba fetang 160 000 mo Russia, ba ka metlha ba dirisetsang website eno dilo tsa bodumedi le go ithuta Baebele ba le bosi kgotsa e le malapa, ba ka se tlhole ba kgona go e dirisa. Go itsise ba bangwe ka website eno e tla nna tlolomolao mo Russia. Mo godimo ga moo, batho ba le dimilione di ka nna 142 ba ba nnang mo Russia ba ka se letlelelwe go tsena mo jw.org gore ba bone tshedimosetso ya Baebele mahala. Yekaterina Elbakyan, Mankge wa Filosofi le moitse wa dithuto tsa bodumedi yo e leng porofesa kwa Sekolong sa Tiro le Dikamano Tsa Batho kwa Moscow, a re website ya jw.org ke “mpho go mongwe le mongwe yo o kgatlhegelang go dira dipatlisiso ka dilo tsa bodumedi. E na le tshedimosetso e ntsi e e utlwalang. E tlhalosa dithuto tsa semoya le tsa boitsholo ka tsela e e motlhofo. Fa o dirisa website eno, o ikutlwa e kete o amogelwa ka lorato mo legaeng la Basupi ba ga Jehofa.”

Fa Grigory Martynov, mmueledi wa Basupi ba ga Jehofa kwa Russia a bua a le kwa St. Petersburg, a re: “Website ya jw.org ke sedirisiwa se se molemo mo nageng ya rona se se thusang batho ba ba batlang tshedimosetso ka Baebele, mme ga e amane ka tsela epe le dipolotiki kgotsa kgwebo. Re solofela gore Kgotlatshekelo ya Naga kwa Tver e tla tlhomamisa gore sedirisiwa seno se se rutang se tla tswelela se le gone gore batho ba Russia ba nne ba se dirise.”

J. R. Brown, mmueledi wa Basupi ba ga Jehofa kwa ntlokgolo ya bone ya lefatshe lotlhe kwa New York, a re: “Website ya jw.org ke sediriswa sa go dira dipatlisiso se se nang le tshedimosetso e e ikanyegang mme e dirisiwa ke malapa mo lefatsheng lotlhe. E tseelwa kwa godimo thata, mo e leng gore batho ba ka nna 900 000 ba e etela letsatsi le letsatsi gore ba bone tshedimosetso e e mosola ka dipuo di ka nna 600. Ruri ga go utlwale gore tshedimosetso eno e thibelwe batho.”

Media Contact(s):

International: J. R. Brown, Office of Public Information, tel. +1 718 560 5000

Russia: Grigory Martynov, tel. +7 812 702 2691