ST. PETERSBURG, Russia—Ka Ferikgong 22, 2014, Basupi ba ga Jehofa ba bone phenyo fa kgotlatshekelo ya boikuelo e phimola tshwetso e e neng e dirilwe ke kgotlatshekelo e potlana e e neng e thibela jw.org mo Russia, e leng website ya semolao ya Basupi ba ga Jehofa.

Kgotlatshekelo ya Naga kwa Tver e na ya phimola tshwetso e e neng e dirilwe ke Kgotlatshekelo ya Kgaolo ya Tsentralniy ka Phatwe 7, 2013. Kgotlatshekelo ya naga e ile ya re tshwetso e e dirilweng ke kgotlatshekelo ya kgaolo ya go thibela website ga e utlwale ka gonne beng ba yone, e leng Basupi ba ga Jehofa, ba ne ba sa newa tshono ya go ntsha maikutlo a bone kwa kgotlatshekelo. Mosekisi wa kwa Tver o ne a isa kgang eno kwa kgotlatshekelo ka gonne a re jw.org e na le dikgatiso tse dikgotlatshekelo tsa Russia di laotseng fa di le “kotsi mo setšhabeng.” Fela fa Basupi ba ga Jehofa ba sena go lemoga gore kgotlatshekelo ya kgaolo e dirile tshwetso eno, ba ne ba nna bofefo go ntsha dikgatiso tseno mo jw.org ya Russia. Kgotlatshekelo ya Naga kwa Tver e tlhomamisitse fa Basupi ba dirile sengwe le sengwe ka fa molaong wa Russia mme ba phimola tshwetso ya go thibela jw.org.

Basupi ba ga Jehofa ba tsentse dikopo tsa boikuelo di le mmalwa kwa Kgotlatshekelong ya Yuropa ya Ditshwanelo Tsa Batho kgatlhanong le tshwetso e e dirilweng ke dikgotlatshekelo tsa Russia ka dikgatiso tsa bone tse go tweng di “kotsi mo setšhabeng.”

Grigory Martynov, e leng mmueledi wa Basupi ba ga Jehofa kwa Russia, a re: “Re itumeletse gore baatlhodi ba bone melemo ya website ya rona le maiteko a re a dirileng go ikobela tshwetso ya kgotlatshekelo ya Russia. Re tla tswelela ka go femela boikanyegi jwa dikgatiso tsa rona le ditshwanelo tsa baagi ba Russia gore ba solegelwe molemo ke tiro ya rona ya go ruta Baebele.”

J. R. Brown, mmueledi wa Basupi kwa ntlokgolo ya lefatshe lotlhe, a re: “Basupi mo lefatsheng lotlhe ba itumeletse phenyo eno. Ka ntlha ya phenyo eno ya semolao, baagi botlhe ba Russia ba tla tswelela ba kgona go dirisa website eno e e molemolemo e e rutang Baebele.”

Media Contact(s):

International: J. R. Brown, Office of Public Information, tel. +1 718 560 5000

Russia: Grigory Martynov, tel. +7 812 702 2691