Ka May 25, 2017, Basupi ba ga Jehofa kwa Oryol, Russia, ba ne ba kopane ka kagiso go tla go obamela Modimo fa mapodise a a tlhometseng le mapodise a lephata la tshireletsego a tla go kgoreletsa phuthego eo. Balaodi bano ba ne ba ba itsise gore ba tlile go tlhatlhela kgetsi kgatlhanong le Basupi ka gonne ba tswelela ba kopana mmogo le fa puso e re ba kotsi mo setšhabeng. Ka June 14, 2016, puso e ne ya tswala mokgatlho wa bodumedi wa Basupi o o kwa Oryol. Mo godimo ga moo, balaodi ba ne ba tsaya tshedimosetso ya mongwe le mongwe yo o neng a le mo phuthegong eo, ba ba tseela difouno mme moragonyana ba bo ba ya go phuruphutsa matlo a bone.

Balaodi ba ne ba isa banna ba phuthego ya kwa Oryol kwa diofising tsa mapodise mme ba tshwara mogolwane wa phuthego yo o tswang kwa Denmark, e bong Dennis Christensen. Mosekisi o ne a tsenya kopo ka bonako kwa Kgotlatshekelong ya Kgaolo ya Sovietsky, a kopa gore Rre Christensen a nne mo kgolegelong go fitlha mapodise a wetsa dipatlisiso tsa bone. Moatlhodi Svetlana Naumova o ne a dumalana le kopo eo a bo a re Rre Christensen a nne dikgwedi tse pedi mo kgolegelong fa a sa ntse a letetse go seka. Basupi ba tla ikuela kgatlhanong le tshwetso eno gompieno. Go ya ka molao wa naga wa go atlhola dikebekwa, fa Rre Christensen a ka bonwa molato o tla tshwanelwa ke go fetsa dingwaga di le thataro go ya go di le lesome mo kgolegelong.

Go bonala balaodi ba Russia ba le kgatlhanong le kobamelo ya Basupi ba ga Jehofa ka gonne Basupi ba kwa Oryol ba ne ba kopane go tla go obamela Modimo mme ba se mo kagong ya bone ya bodumedi. Tiragalo eno e tshwana le e e diragaletseng Basupi ba kwa Taganrog. Balaodi ba Taganrog ba ne ba tswala mokgatlho wa Basupi mme ba tshwara maloko a le 16 a phuthego fela ka gonne ba kopane mmogo ka kagiso. Ba ne ba atlholwa ka November 2015. Kgetsi ya bone e isitswe kwa Kgotlatshekelong ya Yuropa ya Ditshwanelo Tsa Batho.