NEW YORK—Ka Matlhatso, Basupi ba ga Jehofa ba ile ba laletsa baagelani ba bone gore ba tle go bona dikago tsa ntlokgolo ya bone e e kwa Warwick, New York. Motsamaisi wa dikago tseno e bong Troy Snyder a re: “Ka beke go tla batho ba le 1 150 ba tla go bona dikago tsa rona. Mme gone, mo dibekeng tse pedi tse di latelang re batla go dirisa tshono eno go leboga baagelani ba rona ba e seng Basupi mmogo le batho ba ba ileng ba re thusa mo porojekeng eno.”

Ka Matlhatso go ile ga tla batho ba le 205, barekisi le borrakonteraka ba le 190 mme palogotlhe ya bone e ne e le 395. Baeng ba rona ba ile ba newa dijo, ba bontshiwa dikago, ba leba bidio e e khutshwane mme go tswa foo ba nna le tshono ya go botsa dipotso.

Christopher Gow yo o nnang kwa Tuxedo Park e e gaufi le dikago tsa rona o ne a re: “Ke ne ke ipotsa dipotso ka dikago tseno, ka jalo ke ile ka itumela tota fa ba ne ba ntaletsa gore ke tle go di bona. Ke ne ke itse gore ba ne ba tshwaregile ka porojeke ya go aga mme tsela e go neng go didimetse ka yone, e ne e kete ga go agiwe.”

E re ka Basupi ba ga Jehofa ba agile ntlokgolo ya bone gaufi le lekadiba le le mo Sterling Forest State Park, bontsi jwa batho ba ne ba tlile go bona gore Basupi ba dirile eng go sireletsa tikologo ya phaka eo.

Dr. Richard Hull yo e leng porofesa wa dithuto tsa hisitori kwa Yunibesithing ya New York e bile gape e le moagi le rahisitori wa toropo ya Warwick a re: “Ke feditse dingwaga di feta 50 ke ithuta tikologo eno. Basupi ba dirile tiro e e tswileng diatla tota ka go aga lefelo la bone mme ka fa letlhakoreng le lengwe ba akanyetsa phaka eno le diphologolo tsa yone.”

Rre Gow yo e leng leloko la komiti ya phaka ya Tuxedo o ne a akgela jaana fa a sena go bona dikago: “Sengwe le sengwe se se mo kagong eno ke sa maemo a a kwa godimo, Basupi ba dirile tiro e e tswileng diatla. Re ka ithuta go le gontsi mo go lona ka tsela e lo ileng lwa dira dilo ka yone fano.”

Baeng ba ile ba bona mafelo a mabedi a a bontshang hisitori ya Basupi ba ga Jehofa le lefelo le le bontshang Dibaebele tsa bogologolo.

Dr. Hull o ne a konela ka go re: “Kago eno e agilwe ka matsetseleko. Ke kgona go bona fela gore go ile ga tsewa matsapa a a seng kana ka sepe go rulaganya dipolane tsa dikago tseno. Ke sa ntse ke tla bona musiamo mme gone ke lebile pele go boa gape go tla go bona dikago tse dingwe.”

Rre Snyder a re: “Re leboga baagi ba motse ono ka go re ema nokeng le go re amogela ka diatla tse di bothito mo lefelong la bone. Ke ka moo re ileng ra rulaganya gore baagelani ba rona ba e seng Basupi ba tle go bona dikago tsa rona.” Go rulagantswe gore baagelani ba rona ba ba sa kgonang go tla ka Matlhatso, ba tle ka Matlhatso, di 29 tsa April ka ura ya bolesome mo mosong go fitlha ka ura ya bonê thapama.

Babegadikgang ba ka Ikgolaganya le:

David A. Semonian wa Ofisi ya Tshedimosetso mo nomorong ya +1-845-524-3000