NEW YORK—Morago ga go bereka dikgwedi di le thataro, Basupi ba ga Jehofa ba ne ba boa ba bula lefelo le le itsegeng thata la Stanley Theater kwa Jersey City, New Jersey, ka Moranang 13, 2013. Basupi ba ntse ba dirisa Stanley Theater ka dingwaga di ka nna 30 e le Holo ya Kopano go tshwarela dikokoano tse dikgolo tsa go ruta Baebele tse go ka tlang mongwe le mongwe mo go tsone. Tiro ya go tlhabolola e dirile gore lefelo leno la bobogelo le nne botoka gore go ithutelwe Baebele mo go lone.

Ditulo tse disha tsa mo bobogelong di kgona go tshola batho ba feta 250 000 ba ba tlang dikokoanong tseo ngwaga le ngwaga. Gape mo holong e kgolo le mo diphaposing tse di gaufi le yone go tsentswe thulaganyo ya bidio e e diretsweng segolobogolo Puo ya Diatla ya Amerika.

Bontsi jwa tiro ya go tlhabolola bo dirilwe ke Basupi ba ga Jehofa ba ba ithaopetseng go dira mo porojekeng eno. Baithaopi ba ba tswang kwa dikarolong tse di farologaneng tsa United States ba ne ba nna le seabe mo go tlhabololeng moago ono wa bogologolo o o sa lebalesegeng.

Stanley Theater e agilwe go ela kwa bowelong jwa dingwaga tsa bo1920 kwa New Jersey. E ne e le lengwe la mafelo a magolo go gaisa a bobogelo jwa difilimi a a agilweng kwa United States. Lefelo leno la bobogelo le ne la tshwanelwa ke go tswalwa ka 1978, mme ka 1983 Basupi ba ga Jehofa ba ne ba thusa gore le se ka la senyega. Fa e sale lefelo leno le bulwa gape ka 1985, Basupi ba ntse ba le dirisetsa go ithuta Baebele.

Fa J. R. Brown, mmueledi wa Basupi ba ga Jehofa a akgela ka go tlhabololwa ga lefelo leno bosheng jaana, o ne a re: “Bontsi jwa dilo tse di dirwang mo Stanley Theater di amana le kobamelo, mme batho ba dipuo di feta 15 ba tla mono go ithuta Baebele. Batho ba kwa New Jersey ba sa ntse ba tseela lefelo leno la bobogelo kwa godimo ka jalo mokgatlho wa rona o itumelela go nna o le tlhokometse.”

Media Contact(s):

International: J. R. Brown, Office of Public Information, tel. +1 718 560 5000