NEW YORK—Ka Mantaga, Phukwi 29, 2013, Basupi ba ga Jehofa ba ne ba simolola go aga ntlokgolo ya bone e ntšha ya lefatshe lotlhe kwa Warwick, New York fa balaodi ba lefelo leo ba sena go ba naya tetla ya go aga.

Ka Laboraro, Phukwi 17, Lephata le le Dirang Dipolane la Toropo ya Warwick le ne la naya Basupi tetla ya go dirisa polane ya bone ya ntlokgolo e ntšha, e leng tetla ya bofelo e e neng e tlhokega gore ba simolole go aga. Ba ne ba newa tetla eno morago ga dingwaga di le nnè ba sena go reka setsha kwa Warwick ka Phukwi 17, 2009. Morago ga gore Basupi ba newe tetla ya go aga ka Labotlhano, Phukwi 26, ba ne ba simolola go bereka mo setsheng le go epa motheo wa kago ka Mantaga, Phukwi 29.

Lephata la go dira dipolane le ne la naya Basupi tetla ya go aga ka gonne ba ikemiseditse go dirisa mofuta wa kago e go tla nnang motlhofo go e tlhokomela e bile e se kitla e nna kotsi mo tikologong. Ka sekai, maiteko a a dirwang a go sireletsa tikologo a akaretsa go dira legora le le tla thusang gore go se nne le mmu o o gogolegang le gape le tla thusang go sireletsa diphologolo tsa naga jaaka mabolobolo, gore di nne kgakala le lefelo leno la kago.

Mmueledi wa Basupi e bong Richard Devine a re: “Re itumelela go nna re bereka le balaodi ba toropo ya Warwick le go tswelela ka porojeke eno ya kago. Tetla e re e filweng ke lephata la go dira dipolane ke kgatelopele e kgolo malebana le go tlosa ntlokgolo ya lefatshe lotlhe kwa Brooklyn go e isa kwa Warwick.” Enrique Ford yo a leng mo komiting ya kago ya Basupi mmogo le Rre Devine a re: “Go bona tetla ya go aga ka Phukwi e ne e le selo sa ntlha se se botlhokwa se se neng se tla re thusa go fitlhelela mokgele wa rona wa go fetsa porojeke ya kago mo dingwageng di le nnè.”

Go tloga ka 1960 go fitlha ka 1987, International Nickel Company e ne e dirisetsa setsha seno ditiro tse di farologaneng, jaaka go nna ofisi ya botsamaisi le lefelo la go dira dipatlisiso le la dithibololo. Fa setsha seno se sena go nna dingwaga di le nnè se sa dirisiwe, King’s College e ne ya se reka ka boikaelelo jwa go se dira dikago tsa kholetšhe. Setsha seno ga se ise se ko se dirisiwe ka botlalo mme go fitlha ka 2009 fa Basupi ba ne ba se reka, se ne se na le dingwaga di feta masome a mabedi se sa dirisiwe.

Media Contact(s):

International: J. R. Brown, Office of Public Information, tel. +1 718 560 5000