NEW YORK—Fa Basupi ba ga Jehofa ba sena go wetsa porojeke ya go aga ntlokgolo ya bone ya lefatshe lotlhe kwa Warwick, New York ka August 2016, ba ne ba tlotlomadiwa ka ntlha ya tsela e ba e agileng ka yone. Mokgatlho wa Green Building Initiative (GBI) o o ntshang setifikeiti sa go dirisa dikago e bile o tlhomamisa gore dikago tsa kgwebo ga di dirisiwe ka tsela e e ka nnang kotsi mo tikologong, o ne wa tlotlomatsa Basupi ka ntlha ya dikago tsa bone tse supa.

Motsamaisimogolo wa mokgatlho oo e bong Shaina Weinstein a re: “Go na le diporojeke tsa go aga di le 965 mo nageng yotlhe, mme ke di le 64 fela tse di ileng tsa agiwa ka tsela e e tsamaisanang le melao ya rona. Basupi ba ga Jehofa ba agile di le supa, mme tsotlhe di tsamaisana le melao ya rona ya go aga. Seno se bontsha gore ba iketleeleditse go dirisa metsi le motlakase ka tsela e e siameng e bile ba tlhomamisa gore ga ba kgotlele tikologo.”

Mo websiting ya bone, GBI e itlhalosa e le “mokgatlho o o sa duelweng o boikaelelo jwa one e leng go rotloetsa dikhampani gore di age dikago tse di tla thusang go somarela dikungo tsa rona [jaaka metsi le motlakase] le go tlhomamisa gore dikago tseo ga di kotsi mo tikologong.” Fa kago e ntšha e sena go wediwa, GBI e romela moitseanape wa tsa kago gore a ye go tlhatlhoba dikago tseo, dipolane tsa yone le porojeke yotlhe ya go aga go tlhomamisa gore melao ya go aga e latetswe. Mme fa tsotlhe di apere tshiamo, moitseanape oo o begela mokgatlho ono, go tswa foo ke one o ntshang setifikeiti se se tlotlomatsang tsela e kago eo e agilweng ka yone.

David Bean, yo o okametseng lefapha la Basupi ba ga Jehofa la go dira dipolane tsa go aga kwa United States a re: “Re itumela tota go tlotlomadiwa ka tsela eno ka gonne seno se bontsha gore re ikemiseditse go aga dikago tse di thusang thata mo tikologong, dikago tse di tla re thusang go tlhokomela sekgwa seno sa Sterling Forest State Park.”

Basupi ba ile ba tlhomamisa gore ga ba kgaole ditlhare tse ba di fitlhetseng kwa sekgweng seo e bile ba ile ba dirisa tse di weleng fa ba aga. Motsamaisi wa pele wa sekgwa sa Sterling Forest e bong Jeffrey Hutchinson a re: “Ke lebogela go bo ba ile ba dirisa ditlhare tse ba di segileng ka nako ya fa ba ne ba phepafatsa setsha. Basupi ba dirile tiro e e tswileng diatla tota.” Shaina Weinstein a re: “Go ya ka rona, porojeke ya Warwick e bontsha gore baagi ba dikago tseno ke batho ba ba tshwenyegileng thata ka tikologo.”

Modulasetulo wa Komiti ya Porojeke ya go Aga ya Basupi ba ga Jehofa kwa Warwick e bong Richard Devine a re: “Go fetile dingwagangwaga mokgatlho wa rona o ntse o tlhokometse dikago tsa rona tse di kwa Brooklyn. Gone jaanong re lebile pele go tlhokomela tikologo ya rona kwa dikagong tsa kwa Warwick le go tlhomamisa gore sekgwa sa Sterling Forest se nna se ntse se le sentle fela jaaka re se fitlhetse.”

Media Contact:

David A. Semonian, Office of Public Information, 1-845-524-3000