BASHA BA BOTSA JAANA
Ke Eng fa Batsadi Ba me Ba Gana ke Ijesa Monate?
Ditsala tsa gago di go laletsa gore o tle go ijesa monate le bone mo mafelobekeng ano. O kopa batsadi tetla ya go tsamaya mme ba a gana. Ga o gakgamale ka gonne labofelo fa o ba kopa ba ile ba gana.
Mo setlhogong seno:
Goreng batsadi ba me ba nna ba gana?
Fa go lebega e kete batsadi ba gago ba nna fela ba gana fa o ba kopa go dira sengwe, seo se ka dira gore o akanye gore ga ba batle o ijesa monate.
Mosha mongwe yo o bidiwang Marie o ne a ikutlwa jalo lekgetlho la ntlha fa a nna le founo. Marie a re: “Le fa gone ditsala tsa me di ne di kgona go dira sengwe le sengwe fela se di se batlang, papa ene o ne mpeela melao e mentsi. O ne a beile molao wa gore ke tsenye di-app dife, gore ke bue le bomang le gore nka bua le bone go fitlha nako mang.”
Akanya ka seno: A rraagwe Marie o ne a mo thibela go ja monate? Ke eng gape se a ka tswang a ne a tshwenyegile ka sone?
Fela jaaka molao wa tsela o ka thibela kgololesego ya rona ka tsela nngwe mme gone o re sireletsa, molao wa batsadi o ntse fela jalo
Leka seno: A re re o motsadi mme ngwana wa gago o sa tswa go nna le founo. O ne o tla tshwenyega ka eng? O ne o tla beela ngwana wa gago melao efe go mo sireletsa? O ne o tla reng fa ngwana wa gago a re ga o batle a ijesa monate?
“Papa o ne a tle a re, ‘Leka go itsenya mo ditlhakong tsa me.’ Go dira seo go ne go nthusa go lemoga botlhokwa jwa melao e a neng a e baya le mabaka a go e baya. Fa nkabo ke na le bana le nna ke ne ke tla lebelela gore ba dire se papa a reng ke se dire.”—Tanya.
Nka dira eng gore batsadi ba me ba dumele?
“Ga o na go fitlhelela sepe ka go omana mme wena le batsadi ba gago lo tla ikutlwa lo lapile morago ga seno. Fa o ngangisana le batsadi ba gago ba tla tsaya gore o tletse bongwana le gore ga o ise o tshwanelwe ke go newa kgololosego e e oketsegileng.”—Richard.
“Melao e bewa ka mabaka a a utlwalang. Ga se gore batsadi ba me ga ba batle gore ke ijese monate mme ba batla gore ke dire jalo ka tsela e e se kitlang e nkutlwisa botlhoko.”—Ivy.
Molaomotheo wa Baebele: “Motho yo o sematla o ntsha bogale jwa gagwe jotlhe, mme yo o botlhale o a ritibala a bo a bo thibela.”—Diane 29:11.
“Ke ile ka leka go tlola melao e papa a neng a mpeetse yone ya go dirisa founo. Ke ile ka batla ditsela tsa go romelela ditsala tsa me melaetsa bosigo le go tsenya di-app tse papa a neng a sa ntetle go nna le tsone. Fa nako e ntse e ya, o ne a lemoga se ke neng ke se dira mme a bo a gagamatsa melao ka gonne a sa tlhole a ntshepa. Ga go botlhale go leka go tlola melao e e beilweng.”—Marie.
“Nna pelotelele. Go ka tsaya nakonyana pele batsadi ba gago ba fetola melao mengwe mme fa ba bona gore o ikobela melao ya bone, ba ka go naya kgololesego e e oketsegileng.”—Melinda.
Molaomotheo wa Baebele: “Utlwang batsadi ba lona mo go sengwe le sengwe.”—Bakolosa 3:20.
“Fa o leka go ba pateletsa, seo se ka se go direle dilo motlhofo kgotsa sa dira gore ba go neye se o se batlang.”—Natalie.
“Batsadi ba batla go bona gore a o kgona go dira ditshwetso tse di siameng. Fa ke bua le batsadi ba me, ke leka go ba neela mabaka a a utlwalang go na le go tseega maikutlo. Gantsi fa ke dira jalo, batsadi ba me ba ntetla go dira se ke se kopang.”—Joseph.
Molaomotheo wa Baebele: “Tlotla rrago le mmago.”—Baefeso 6:2.
Tse Dingwe Tse O ka Di Kgatlhegelang
DIPOTSO TSE BASHA BA DI BOTSANG
Nka Buisana Jang le Batsadi Ka Melao E ba E Mpeetseng?
Ithute go bua le batsadi ba gago ka tlotlo mme o tla makadiwa ke tsela e ba tsibogang ka yone.
DIBIDIO TSA DITSHWANTSHO
Nka Dira Jang Gore Batsadi Ba me Ba Ntshepe?
O batla gore batsadi ba gago ba lemoge gore o godile mme bone ga ba akanye jalo. O ka dirang gore ba go tshepe?
DIPOTSO TSE BASHA BA DI BOTSANG
A Tota Melao ya mo Lelapeng e a Tlhokega?
A o fitlhela go le thata go ikobela melao ya mo lelapeng? Dikakantsho tseno di tla go thusa gore o lebe dilo sentle.
SE BALEKANE BA GAGO BA SE BUANG
Nka Bua Jang le Batsadi ba Me?
Go bua le batsadi ba gago go ka go tswela mosola.
