Letlole la kgolagano le ne le dirilwe ke Baiseraele ba bogologolo ba latela ditaelo le dipolane tse Modimo a neng a ba neile tsone. Le ne le tsentse matlapa a mabedi a Modimo a neng a kwadile Melao e e Lesome mo go one.​—Ekesodo 25:8-10, 16; 31:18.

•   Tsela e le neng le dirilwe ka yone. Letlole leno le ne le le boleele jwa dikubita di le 2,5 (disentimetara di le 111), bophara jwa dikubita di le 1,5 (disentimetara di le 67) le bogolo jwa dikubita di le 1,5 (disentimetara di le 67). E ne e dirilwe ka logong la setlhare sa mokala, e tshasitswe ka gouta mo teng le kwa ntle e bile e kgabisitswe. Sekhurumelo sa yone se se neng se dirilwe ka gouta se ne se na le baengele ba babedi ba ditšheruba. Ba ne ba lebagane e bile difatlhego tsa bone di lebile mo sekhurumelong sa letlole mme diphuka tsa bone di ne di tsharologetse kwa godimo di khurumeditse letlole. Letlole le ne le na le diphatlha tse nnè tse di neng di dirisediwa go tsenya logong la mokala go thusa gore letlole le kgone go tsholediwa.​—Ekesodo 25:10-21; 37:6-9.

•   Kwa le neng le beilwe gone. Kwa tshimologong, Letlole le ne le beilwe mo lefelong la Boitshepo jwa Maitshepo mo motlaaganeng, e leng tente e e neng e kgona go sutisiwa e e neng e dirisediwa go obamela Modimo e bile e dirilwe ka nako e le nngwe le Letlole. Go ne go beilwe sesiro gore baperesiti le batho ba se ka ba kgona go bona lefelo la Boitshepo jwa Maitshepo. (Ekesodo 40:3, 21) Moperesiti yo Mogolo ke ene fela a neng a letleletswe go tsena mo lefelong la Boitshepo jwa Maitshepo, gangwe ka ngwaga mo Letsatsing la Tetlanyo, gore a tle go bona Letlole. (Lefitiko 16:2; Bahebera 9:7) Moragonyana Letlole le ne la fudusediwa mo lefelong la Boitshepo jwa Maitshepo mo tempeleng e Solomone a neng a e agile.​—1 Dikgosi 6:14, 19.

•   Le ne le dirisediwa eng? Letlole le ne le dirisediwa go baya dilo tse di boitshepo tse di neng di gopotsa Baiseraele ka kgolagano e Modimo a neng a e dirile le bone kwa Thabeng ya Sinai. Gape le ne le dirisiwa thata ka nako ya Letsatsi la Tetlanyo.​—Lefitiko 16:3, 13-17.

•   Se se neng se le mo go lone. Selo sa ntlha se se neng sa tsenngwa mo go lone e ne e le matlapa a mabedi a Melao e e Lesome. (Ekesodo 40:20) Moragonyana go ile ga tsenngwa nkgo ya gouta e e neng e na le mana le ‘thobane ya ga Arone e e neng e tlhogile dithunya.’ (Bahebera 9:4; Ekesodo 16:33, 34; Dipalo 17:10) Go bonala nkgo le thobane di ile tsa ntshiwa ka gonne di ne di seyo mo Letloleng fa le ne le fudusediwa kwa tempeleng.​—1 Dikgosi 8:9.

•   Tsela e le neng le fudusiwa ka yone. Letlole le ne le tshwanetse go fudusiwa ke Balefi ba le beile mo magetleng mme ba le tshwere ka magong a mokala. (Dipalo 7:9; 1 Ditiragalo 15:15) Magong ao a ne a sa tshwanela go ntshiwa mo Letloleng go direla gore Balefi ba se ka ba tshwara Letlole. (Ekesodo 25:12-16) “Sesiro se se bipang” se se neng se kgaoganya lefelo la Boitshepo le lefelo la Boitshepo jwa Maitshepo se ne se dirisediwa go khurumetsa Letlole fa le fudusiwa.​—Dipalo 4:5, 6. a

•   Le ne le emela eng? Letlole le ne le amana le go nna gone ga Modimo. Ka sekai, leru le le neng le tlhagelela fa godimo ga Letlole le leru le le neng le kaela Baiseraele fa ba le kwa nageng, le ne le bontsha gore Jehofa o gone le gore o segofatsa batho ba gagwe. (Lefitiko 16:2; Dipalo 10:33-36) Gape Baebele ya re Jehofa ‘o ntse mo ditšherubeng’ fa e bua ka ditšheruba tse di neng di le mo godimo ga Letlole. (1 Samuele 4:4; Pesalema 80:1) Ka jalo, ditšheruba tseo e ne e le “setshwano sa kara” ya ga Jehofa. (1 Ditiragalo 28:18) Fa Letlole le ne le le kwa Siona, Kgosi Dafide o ile a kwala a re Jehofa o ne a ‘nna mo Siona.’​—Pesalema 9:11.

•   Maina a lone. Baebele e dirisa mafoko a a farologaneng go tlhalosa letlole leo le le boitshepo, mafoko a a jaaka “letlole la tshupo,” “letlole la kgolagano,” “letlole la ga Jehofa” le “letlole la nonofo ya [ga Jehofa].”​—Dipalo 7:89; Joshua 3:6, 13; 2 Ditiragalo 6:41.

   Sekhurumelo sa Letlole leo se ne se bidiwa “sekhurumelo sa thuanyo” kgotsa “setulo sa kutlwelobotlhoko.” (1 Ditiragalo 28:11) Mafoko ano a tlhalosa tiragalo e e kgethegileng e e neng e dirwa mo Letsatsing la Tetlanyo fa moperesiti yo mogolo wa Iseraele a ne a kgatsha madi a phologolo e e ntshiwang setlhabelo fa pele ga sekhurumelo seo. Moperesiti yo mogolo o ne a dira jalo go ‘itirela tetlanyo a bo a direla le ntlo ya gagwe le phuthego yotlhe ya Iseraele.’​—Lefitiko 16:14-17.

A letlole la kgolagano le sa ntse le le teng gompieno?

 Ga go na bosupi jwa gore le sa ntse le le teng. Baebele e bontsha gore Letlole leo ga le tlhole le tlhokega ka gonne le ile la emisediwa ka “kgolagano e ntšha” e e theilweng mo setlhabelong sa ga Jesu. (Jeremia 31:31-33; Bahebera 8:13; 12:24) Baebele e ile ya bolelela pele nako e ka yone letlole la kgolagano le neng le se kitla le nna gone le gore batho ba Modimo ba ne ba se kitla ba le gopola.​—Jeremia 3:16.

 Mo ponong e moaposetoloi Johane a neng a e bontshiwa morago ga gore kgolagano e ntšha e tlhomiwe, letlole la kgolagano le ne la bonwa kwa legodimong. (Tshenolo 11:15, 19) Letlole leo e ne e se la mmatota go na le moo le ne le tshwantshetsa go nna gone ga Modimo le gore o ne a segofatsa kgolagano e ntšha.

A Letlole le ne le na le maatla mangwe a a sa tlwaelegang?

 Nnyaa. Go nna le lone go ne go sa reye gore Baiseraele ba tla atlega. Ka sekai, Baiseraele ba ne ba tsamaya ka lone fa ba ne ba ya go lwa le baagi ba motse wa Ai mme ba ile ba fenngwa ka gonne Moiseraele mongwe a ile a leofela Modimo. (Joshua 7:1-6) Moragonyana ba ile ba fenngwa ke Bafilisitia le fa ba ne ba tsamaile ka letlole la kgolagano go ya kwa lefelong la ntwa. Seo se ne se bakilwe ke boleo jwa ga Hofeni le Finease. (1 Samuele 2:12; 4:1-11) Bafilisitia ba ile ba tsaya letlole leo mme Modimo o ne a ba otlhaya mo ba neng ba le busetsa kwa Iseraele.​—1 Samuele 5:11–6:5.