Baebele e tlhalosa ditiragalo le maemo a a tla nnang gone go bontsha gore “bokhutlo jwa tsamaiso eno ya dilo” kgotsa “bokhutlo jwa lefatshe” leno bo atametse. (Mathaio 24:3; Baebele e e Boitshepo) Baebele e bitsa nako eo e re ke ‘malatsi a bofelo’ kgotsa “sebaka sa bofelo.”​—2 Timotheo 3:1; Daniele 8:19; Easy-to-Read Version.

 Baebele e ile ya bolelelapele dilo di le dintsi tse di neng di tla nna “sesupo” sa malatsi a bofelo. (Luke 21:7) Akanya ka dikai tseno:

 Dintwa mo lefatsheng. Jesu o ile a re: “Setšhaba se tla tlhasela setšhaba se sengwe le bogosi bo tla tlhasela bogosi jo bongwe.” (Mathaio 24:7) Ka tsela e e tshwanang, Tshenolo 6:4 e ne ya bolelelapele ka mopalami wa pitse wa tshwantshetso yo o emelang dintwa, yo o neng a tla “tlosa kagiso mo lefatsheng.”

 Leuba. Jesu o ile a re: “Go tla nna le ditlhaelo tsa dijo.” (Mathaio 24:7) Buka ya Tshenolo e ile ya bolelelapele ka mopalami yo mongwe wa pitse, yo o neng a tla baka tlala kgotsa leuba mo mafelong a a farologaneng.​—Tshenolo 6:5, 6.

 Dithoromo tsa lefatshe. Jesu o ile a re go tla nna le “dithoromo tsa lefatshe mo mafelong ka go latelana.” (Mathaio 24:7; Luke 21:11) Dithoromo tseno tsa lefatshe di ne di tla dira gore batho ba boge gape di ne di tla bolaya ba le bantsi.

 Malwetse. Go ya ka Jesu go ne go tla nna le “malwetse a leroborobo.”​—Luke 21:11.

 Bokebekwa. Le fa gone bokebekwa e le kgale bo le gone mo lefatsheng, Jesu o ne a bolelelapele gore “bosula bo tla oketsega.”​—Mathaio 24:12.

 Batho ba senya lefatshe. Tshenolo 11:18 e ile ya bolelelapele gore batho ba tla ‘senya lefatshe.’ Ba ne ba tla dira jalo ka ditsela tse di farologaneng, e seng fela ka dintwa kgotsa ka borukutlhi mme gape ba ne ba tla kgotlela lefatshe.

 Mekgwa e e sa siamang. Baebele e ile ya bolelelapele mo go 2 Timotheo 3:1-4 gore batho ba tla bo “ba sa leboge, ba sa ikanyege, . . . ba sa batle go dumalana le ba bangwe ka sepe, ba senya batho maina, ba sa ithibe mo go sepe, ba le bogale jo bo tshabegang, ba sa rate se se molemo, ba tsietsa ba bangwe, ba le tlhogoethata, ba ikgogomosa.” Mekgwa eo e tla nna maswe le go feta mo e leng gore go tla bo go tshwanela gore go twe ke “dinako tse di thata e bile di le kotsi.”

 Go thubega ga malapa. Baebele e ile ya bolelelapele mo go 2 Timotheo 3:2, 3 gore batho ba le bantsi ba tla bo “ba sa rate” ba malapa a bone le gore bana ba tla bo “ba sa utlwe batsadi.”

 Batho ba tla tlogela go rata Modimo. Jesu o ile a re: “Lorato lwa batho ba le bantsi lo tla fela.” (Mathaio 24:12) Jesu o ne a raya gore batho ba le bantsi ba tla tlogela go rata Modimo. Ka tsela e e tshwanang, 2 Timotheo 3:4 e a re mo malatsing a bofelo batho ba tla “rata menate go na le go rata Modimo.”

 Boitimokanyi mo bodumeding. Baebele e ile ya bolelelapele mo go 2 Timotheo 3:5 gore batho ba tla re ba obamela Modimo mme ba sa tshele go ya ka melao ya gagwe.

 Bontsi bo tla tlhaloganya boporofeti jwa Baebele. Lekwalo la Daniele le ile la bolelelapele gore mo “motlheng wa bokhutlo,” batho ba le bantsi ba ne ba tla nna le kitso ya boammaaruri jo bo tswang mo Baebeleng mme seo se akaretsa le go tlhaloganya boporofeti.​—Daniele 12:4.

 Tiro ya go rera mo lefatsheng lotlhe. Jesu o ile a re: “Dikgang tseno tse di molemo tsa Bogosi di tla rerelwa batho ba ba mo lefatsheng lotlhe.”​—Mathaio 24:14.

 Go sa kgatlhege ga batho. Jesu o ile a bontsha gore batho ba tla itlhokomolosa kgotsa ga ba na go kgatlhegela bosupi jo bo bontshang gore bokhutlo bo atametse. (Mathaio 24:37-39) Mo godimo ga moo, 2 Petere 3:3, 4 e ile ya bolelelapele gore bangwe ba ne ba tla sotla bosupi joo le go bo itlhokomolosa.

 Boporofeti jotlhe bo a diragadiwa. Jesu o ile a re mo malatsing a bofelo boporofeti jono jotlhe bo tla diragadiwa ka go latelana.​—Mathaio 24:33.

 Ee. Boporofeti jwa Baebele le ditiragalo tsa lefatshe di bontsha gore malatsi a bofelo a simologile ka 1914 fa Ntwa ya Ntlha ya Lefatshe e simologa. Go bona gore dilo tse di diragalang mo lefatsheng di bontsha jang gore re tshela mo malatsing a bofelo, lebelela bidio e e latelang:

 Fa Bogosi Jwa Modimo bo simolola go busa kwa legodimong ka 1914, Satane le madimona a gagwe ba ne ba ntshiwa kwa legodimong ba bo ba latlhelwa mo lefatsheng. (Tshenolo 12:7-12) Tsela e batho ba le bantsi ba itshwereng ka yone le dilo tse ba di dirang, di bontsha gore ba tlhotlhelediwa ke Satane mme seo se dira gore malatsi a bofelo a re tshelang mo go one a nne ‘thata e bile a nne kotsi.’​—2 Timotheo 3:1.

 Batho ba le bantsi ba tshwenyegile ka ntlha ya malatsi ano a bofelo. Ba tshwenngwa ke gore batho ga ba sa tlhole ba kgona go tshedisana mmogo. Bangwe ba boifa gore mo nakong e e tlang batho ba tla bo ba se na botho gotlhelele.

 Le fa gone batho botlhe ba tshwenyegile ka maemo a lefatshe, go na le ba ba nang le tsholofelo ka bokamoso. Ba tlhatswegile pelo gore mo nakong e e sa fediseng pelo, Bogosi Jwa Modimo bo tla fedisa mathata otlhe a batho. (Daniele 2:44; Tshenolo 21:3, 4) Ba letetse Modimo ka bopelotelele gore a diragatse ditsholofetso tsa gagwe e bile ba gomodiwa ke mafoko a ga Jesu a a reng: “Yo o itshokileng go fitlha kwa bokhutlong o tla bolokwa.”​—Mathaio 24:13; Mika 7:7.