1 Samuele 1:1-28
1 Jaanong ga bo go na le monna mongwe wa Ramathaima-sofima+ wa kgaolo e e dithaba ya Eferaime, mme leina la gagwe e ne e le Elekana,+ morwa Jerohame, morwa Elihu, morwa Tohu, morwa Sufe,+ Moeferaime.
2 O ne a na le basadi ba le babedi, leina la yo mongwe e le Hana, mme leina la yo mongwe e le Penina. Penina a nna le bana, mme Hana a se ka a nna le bana.+
3 Mme monna yoo o ne a tlhatloga mo motseng wa gagwe ngwaga le ngwaga a ya go obama+ le go ntshetsa Jehofa wa masomosomo setlhabelo kwa Shilo.+ Mme ke gone koo bomorwa Eli ba babedi, Hofeni le Finease,+ e neng e le baperesiti ba ga Jehofa+ teng.
4 Mme go ne ga nna letsatsi le Elekana a neng a ntsha setlhabelo ka lone, mme o ne a naya Penina mosadi wa gagwe le bomorwawe botlhe le bomorwadie dikarolo dingwe tsa dinama;+
5 mme a naya Hana karolo e le nngwe. Le fa go ntse jalo o ne a rata Hana,+ mme Jehofa ene, o ne a tswetse sebopelo sa gagwe.+
6 Mme mogadikane wa gagwe le ene o ne a mo tshwenya+ mo go botlhoko gore a mo dire gore a ikutlwe a tlhakatlhakane ka gonne Jehofa a ne a tswetse sebopelo sa gagwe.
7 Mme eo ke yone tsela e a neng a dira ka yone ngwaga le ngwaga,+ nako le nako fa a tlhatlogela kwa ntlong ya ga Jehofa.+ O ne a mo tshwenya fela jalo, mo e leng gore o ne a lela e bile a sa je.
8 Mme Elekana monna wa gagwe a mo raya a re: “Hana, o lelela eng, le gone ke ka ntlha yang fa o sa je, mme ke ka ntlha yang fa pelo ya gago e sulafaletswe?+ A ga ke botoka mo go wena go na le bana ba le lesome ba basimane?”+
9 Mme Hana a nanoga fa ba sena go ja kwa Shilo le fa go sena go nowa, fa moperesiti Eli a ne a ntse mo setulong fa mophakwaneng wa tempele+ ya ga Jehofa.
10 Mme o ne a le moya o bogalaka,+ a ba a simolola go rapela Jehofa+ le go lela thata.+
11 Mme a dira ikano+ a re: “Ao Jehofa wa masomosomo, fa ruri o ka leba pogisego ya lelata la gago+ mme wa nkgakologelwa ruri,+ mme wa se ka wa lebala lelata la gago mme ruri wa naya lelata la gago ngwana wa mosimane, ke tla mo naya Jehofa ka malatsi otlhe a botshelo jwa gagwe, mme legare ga le kitla le tla mo tlhogong ya gagwe.”+
12 Mme go ne ga diragala gore fa a ntse a rapela ka lobaka lo loleele+ fa pele ga ga Jehofa, Eli a bo a lebeletse molomo wa gagwe.
13 Mme Hana ene, o ne a buela mo pelong;+ dipounama tsa gagwe ke tsone fela di neng di tshikinyega, le lentswe la gagwe le ne le sa utlwale. Mme Eli a tsaya gore o tagilwe.+
14 Ka jalo Eli o ne a mo raya a re: “O tla itshwara jaaka yo o tagilweng+ ka lobaka lo lo kae? Tlosa beine ya gago mo go wena.”
15 Fa a rialo Hana a araba a re: “Nnyaa morena wa me! Ke mosadi yo o moya o pitlaganeng; mme ga ke a nwa beine le bojalwa jo bo tagang, mme ke tshololela moya wa me fa pele ga ga Jehofa.+
16 O se ka wa dira lelata la gago la nna jaaka mosadi yo o se nang molemo wa sepe,+ gonne go fitlha jaanong ke ntse ke bua ka ntlha ya go tshwenyega ga me mo go golo le khutsafalo ya me.”+
17 Foo Eli a araba a re: “Tsamaya ka kagiso,+ mme e kete Modimo wa Iseraele a ka go naya kopo e o e kopileng mo go ene.”+
18 Foo a re: “A lelata la gago le bone kamogelo mo matlhong a gago.”+ Mme mosadi a tsamaya a ba a ja,+ mme sefatlhego sa gagwe sa se ka sa tlhola se tshwenyega.+
19 Mme ba tsoga go sa le phakela ba obama fa pele ga ga Jehofa, mme morago ga moo ba boa ba tla kwa ntlong ya bone kwa Rama.+Jaanong Elekana a tlhakanela dikobo+ le Hana mosadi wa gagwe, mme Jehofa a simolola go mo gakologelwa.+
20 Ka jalo ga diragala gore fa ngwaga o wela Hana a ima mme a tshola morwa a ba a mo raya leina+ a re Samuele, ka gonne o ne a re, “ke mo kopile+ mo go Jehofa.”
21 Fa nako e ntse e tsamaya Elekana a tlhatloga le botlhe ba ntlo ya gagwe a ya go ntshetsa Jehofa setlhabelo+ sa ngwaga le ngwaga le tshupelo ya gagwe ya ikano.+
22 Mme Hana a se ka a tlhatloga,+ gonne o ne a reile monna wa gagwe a re: “Fela fa mosimane a sena go kgwisiwa,+ ke tla mo tlisa, mme o tla bonala fa pele ga ga Jehofa a bo a nne koo ka bosakhutleng.”+
23 Fa a rialo Elekana monna wa gagwe+ a mo raya a re: “Dira se se molemo mo matlhong a gago.+ Nna mo gae go fitlha o mo kgwisa. Mme fela e kete Jehofa a ka diragatsa lefoko la gagwe.”+ Ka jalo mosadi a nna mo gae mme a nna a amusa morwawe go fitlha a mo kgwisa.+
24 Ka jalo e rile fela fa a sena go mo kgwisa, a tlhatloga le ene, a na le poo e e nang le dingwaga tse tharo le selekanyo sa ifa e le nngwe fela ya bupi le nkgo e kgolo ya beine,+ mme a tsena mo ntlong ya ga Jehofa kwa Shilo.+ Mme mosimane a bo a na le ene.
25 Foo ba tlhaba poo mme ba tlisa mosimane kwa go Eli.+
26 Foo a re: “Intshwarele, morena wa me! Ka botshelo jwa moya wa gago,+ morena wa me, ke nna mosadi yo o neng a eme le wena mo lefelong leno a rapela Jehofa.+
27 Ke ne ke rapela ka ga mosimane yo gore Jehofa a nneye topo ya me+ e ke e kopileng mo go ene.+
28 Mme le nna ke mo adimile Jehofa.+ Mo malatsing otlhe a go nna gone ga gagwe, ke yo o lopetsweng Jehofa.”
Mme ene a ikobela Jehofa+ gone foo.
