1 Samuele 12:1-25
12 La bofelo Samuele a raya Iseraele yotlhe a re: “Bonang, ke reeditse lentswe la lona malebana le sotlhe se lo se mpoleletseng,+ gore ke dire gore kgosi e lo buse.+
2 Jaanong kgosi ke eno e tsamaya fa pele ga lona!+ Mme nna, ke tsofetse+ e bile ke tlhogoputswa,+ mme bomorwaake, ke bano ba na le lona,+ mme nna—ke tsamaile fa pele ga lona go tloga bosheng jwa me go fitlha mo letsatsing leno.+
3 Ke nna yo. Arabang kgatlhanong le nna fa pele ga ga Jehofa le fa pele ga motlodiwa+ wa gagwe: Ke tsere poo ya ga mang kgotsa ke tsere esele ya ga mang+ kgotsa ke tsieditse mang kgotsa ke gateletse mang kgotsa ke amogetse madi a pipamolomo mo seatleng sa ga mang gore ke fitlhe matlho a me ka one?+ Mme ke tla di lo busetsa.”+
4 Fa a rialo ba re: “Ga o a re tsietsa, le gone ga o a re gatelela, le gone ga o a amogela sepe gotlhelele mo seatleng sa le fa e le a le mongwe.”+
5 Ka jalo a ba raya a re: “Jehofa ke mosupi ka ga lona, mme motlodiwa wa gagwe+ ke mosupi mo letsatsing leno gore ga lo a fitlhela sepe gotlhelele mo seatleng sa me.”+ Fa a rialo ba re: “Ke mosupi.”
6 Mme Samuele a tswelela a raya batho a re: “Jehofa [ke mosupi], yo o neng a dirisa Moshe le Arone le yo o neng a ntsha borraalonamogologolwane kwa lefatsheng la Egepeto.+
7 Mme jaanong emang, mme ke tla lo atlhola fa pele ga ga Jehofa [ke bo ke lo bolelela] ditiro tsotlhe tse di siameng+ tsa ga Jehofa tse a di diretseng lona le borraalonamogologolwane.
8 “Fela fa Jakobe a sena go tsena mo Egepeto+ mme borraalonamogologolwane ba simolola go ikuela kwa go Jehofa gore a ba thuse,+ Jehofa o ne a romela Moshe+ le Arone, gore ba ntshetse borraalonamogologolwane kwa ntle ga Egepeto le go dira gore ba nne mo lefelong leno.+
9 Mme ba lebala Jehofa Modimo wa bone,+ mo o neng a ba rekisetsa+ mo seatleng sa ga Sisera+ molaodi wa masole a ga Hasore le mo seatleng sa Bafilisitia+ le mo seatleng sa kgosi ya Moabe,+ mme ba nna ba tlhabana le bone.
10 Mme ba simolola go ikuela kwa go Jehofa gore a ba thuse+ ba re, ‘Re leofile,+ gonne re tlogetse Jehofa gore re direle Bobaale+ le ditshwantsho tsa ga Ashethorethe;+ mme jaanong re golole+ mo seatleng sa baba ba rona, gore re tle re go direle.’
11 Mme Jehofa a romela Jerubaale+ le Bedane le Jefetha+ le Samuele+ mme a lo golola mo seatleng sa baba ba lona mo tikologong yotlhe fela, gore lo tle lo nne ka polokesego.+
12 Fa lo ne lo bona gore Nahashe+ kgosi ya bomorwa Amona o ne a lo tsogologetse, lo ne lwa nna lwa nthaya lwa re, ‘Nnyaa, mme re tshwanetse go busiwa ke kgosi!’+ Jehofa Modimo wa lona a ntse a le Kgosi ya lona.+
13 Jaanong ke e kgosi e lo e tlhophileng, e lo e kopileng;+ mme bonang, Jehofa o lo tlhometse kgosi.+
14 Fa lo ka boifa Jehofa+ mme lwa mo direla+ le go utlwa lentswe la gagwe,+ mme lo sa tsuologele+ taelo ya ga Jehofa, lona mmogo le kgosi e e tshwanetseng go lo busa, ruri lo tla nna balatedi ba ga Jehofa Modimo wa lona.
15 Mme fa lo ka se ka lwa utlwa lentswe la ga Jehofa+ mme lwa tsuologela taelo ya ga Jehofa, seatla sa ga Jehofa ruri se tla nna kgatlhanong le lona le borraalona.+
16 Jaanong, gape, emang mme lo bone selo seno se segolo se Jehofa a se dirang fa pele ga matlho a lona.
17 A ga se thobo ya korong+ gompieno? Ke tla biletsa+ kwa go Jehofa gore a tlise ditumo tsa maru le pula;+ foo lo bone lo bo lo itse gore bosula jwa lona bo bontsi+ jo lo bo dirileng mo matlhong a ga Jehofa ka go ikopela kgosi.”
18 Morago ga moo Samuele a biletsa kwa go Jehofa,+ mme Jehofa a tlisa ditumo tsa maru le pula mo letsatsing leo,+ mo batho botlhe ba neng ba boifa Jehofa le Samuele thata.
19 Mme batho botlhe ba simolola go raya Samuele ba re: “Rapelela+ batlhanka ba gago mo go Jehofa Modimo wa gago, e re ka re sa batle go swa; ka gonne re okeditse maleo a rona otlhe ka bosula ka go ikopela kgosi.”
20 Ka jalo Samuele a raya batho a re: “Lo se ka lwa boifa.+ Lona—lo dirile bosula jono jotlhe. Mme fela lo se ka lwa fapoga mo go saleng Jehofa morago,+ mme lo direle Jehofa ka pelo yotlhe ya lona.+
21 Mme lo se ka lwa fapoga lwa sala morago dilo tse e seng tsa mmatota+ tse di se nang mosola+ le tse di sa gololeng, ka gonne ke dilo tse e seng tsa mmatota.
22 Gonne Jehofa ga a kitla a tlogela+ batho ba gagwe ka ntlha ya leina la gagwe le legolo,+ ka gonne Jehofa o itlhophetse go lo dira batho ba gagwe.+
23 Gape nna go ka se direge gore ke leofele Jehofa ka go kgaotsa go lo rapelela;+ mme ke tla lo laya+ ka tsela e e molemo+ le e e siameng.
24 Mme fela lo boife+ Jehofa, mme lo mo direle ka boammaaruri ka pelo yotlhe ya lona;+ gonne bonang dilo tse dikgolo tse a di lo diretseng.+
25 Mme fa lo dira se se bosula mo go feteletseng, lo tla nyelediwa, lona le kgosi ya lona.”+
