1 Samuele 13:1-23
13 Saulo o ne a na le dingwaga di le [?] fa a ne a simolola go busa,+ mme o ne a busa Iseraele dingwaga di le pedi.
2 Mme Saulo a itlhophela banna ba le dikete di le tharo mo Iseraele; mme ba le dikete di le pedi ba ne ba na le Saulo kwa Mikemashe+ le mo kgaolong e e dithaba ya Bethele, mme ba le sekete ba na le Jonathane+ kwa Gibea+ wa Benjamine, mme batho ba bangwe botlhe a ba tsamaisa, mongwe le mongwe go ya kwa mogopeng wa gagwe.
3 Foo Jonathane a kgemetha setlhopha se se sireletsang+ sa masole a Bafilisitia+ se se neng se le kwa Geba;+ mme Bafilisitia ba utlwa ka gone. Mme Saulo ene, o ne a dira gore go lediwe lonaka+ mo nageng yotlhe, a re: “A Bahebera ba utlwe!”
4 Mme Iseraele yotlhe ya utlwa go bolelwa go twe: “Saulo o kgemethile setlhopha se se sireletsang sa masole a Bafilisitia, mme jaanong Iseraele o nkgela+ Bafilisitia maswe.” Ka jalo batho ba ne ba phuthiwa gore ba sale Saulo morago go ya kwa Gilegala.+
5 Mme Bafilisitia bone, ba ne ba phuthega mmogo go tlhabana le Iseraele, dikara tsa ntwa+ di le dikete di le masome a mararo le bapalami ba dipitse ba le dikete di le thataro le batho ba ba lekanang le moshawa o o fa losing lwa lewatle ka bontsi;+ mme ba tlhatloga ba bo ba simolola go thibelela kwa Mikemashe kwa botlhaba jwa Bethe-afene.+
6 Mme banna ba Iseraele ka bobone ba bona gore ba ne ba le mo mathateng a magolo,+ ka gonne batho ba ne ba le mo pitlaganong; mme batho ba ne ba iphitlha mo dikgageng+ le mo dikhuting le mo mafikeng a magolo le mo diphaposaneng tse di kafa tlase ga matlo le mo dipetseng tsa metsi.
7 Bahebera ba ne ba bo ba kgabaganya Joredane+ ba ya kwa lefatsheng la Gada+ le la Gileade. Mme Saulo ene o ne a sa ntse a le kwa Gilegala, mme batho botlhe ba ne ba roroma fa ba ntse ba mo setse morago.+
8 Mme a tswelela go leta malatsi a le supa a letetse nako e e tlhomilweng e Samuele a neng a e boletse;+ mme Samuele a se ka a tla mo Gilegala, le batho ba ne ba gasama ba tswa mo go ene.
9 La bofelo Saulo a re: “Atametsang setlhabelo se se fisiwang le ditlhabelo tsa kabalano fa go nna.” Foo a isa setlhabelo se se fisiwang.+
10 Mme ga diragala gore fela fa a sena go fetsa go isa setlhabelo se se fisiwang, bona, Samuele a bo a tsena. Ka jalo Saulo a tswa a ya go mo kgatlhantsha le go mo segofatsa.+
11 Foo Samuele a re: “Ke eng se o se dirileng?”+ Fa a rialo Saulo a re: “Ke ne ka bona gore batho ba ne ba phatlaletse ba dule mo go nna,+ mme wena—ga o a ka wa tla mo malatsing a a tlhomilweng,+ mme Bafilisitia ba ne ba phuthega mmogo kwa Mikemashe,+
12 ka jalo ke ne ka ithaya ka re,+ ‘Jaanong Bafilisitia ba tla ntlhasela kwa Gilegala, mme ga ke a nolofatsa sefatlhego sa ga Jehofa.’ Ka jalo ke ne ka ipateletsa+ mme ka isa setlhabelo se se fisiwang.”
13 Fa a rialo Samuele a raya Saulo a re: “O dirile ka boeleele.+ Ga o a boloka taelo+ ya ga Jehofa Modimo wa gago e a e go laetseng,+ ka gonne, fa o ka bo o e bolokile, Jehofa o ka bo a nitamisitse bogosi jwa gago mo Iseraele ka bosakhutleng.
14 Mme jaanong bogosi jwa gago ga bo kitla bo nnela ruri.+ Ruri Jehofa o tla iponela monna yo o amogelwang ke pelo ya gagwe;+ mme Jehofa o tla mo tlhoma go nna moeteledipele+ wa batho ba gagwe, ka gonne ga o a ka wa boloka se Jehofa a se go laetseng.”+
15 Foo Samuele a nanoga a tlhatloga go tswa kwa Gilegala a ya kwa Gibea wa Benjamine, mme Saulo a bala batho, ba ba neng ba sa ntse ba na le ene, banna ba ka nna makgolo a le marataro.+
16 Mme Saulo le Jonathane morwawe le batho ba ba neng ba sa ntse ba na le bone ba ne ba nna kwa Geba+ wa Benjamine. Mme Bafilisitia bone, ba ne ba thibeletse kwa Mikemashe.+
17 Mme setlhopha sa bathopi se ne se tle se betsege go tswa kwa bothibelelong jwa Bafilisitia ka mephato e le meraro.+ Mophato o mongwe o ne o tle o retologele mo tseleng e e yang kwa Ofera, kwa lefatsheng la Shuale,
18 mme mophato o mongwe o ne o tle o retologele mo tseleng ya Bethe-horona,+ mme mophato wa boraro o retologele mo tseleng e e yang kwa molelwaneng o o lebileng mokgatšha wa Seboime, go ela kwa nageng.
19 Jaanong go ne go se na le fa e le mothudi a le mongwe mo lefatsheng lotlhe la Iseraele, ka gonne Bafilisitia ba ne ba rile: “Gore Bahebera ba se ka ba dira tšhaka kgotsa lerumo.”+
20 Mme Baiseraele botlhe ba ne ba tle ba ye kwa Bafilisitieng gore mongwe le mongwe a ye go lootsa bogale jwa mogoma wa gagwe kgotsa kepu ya gagwe kgotsa selepe sa gagwe kgotsa sekele ya gagwe.+
21 Mme tlhwatlhwa ya go lootsa magale a megoma le dikepu le didirisiwa tse di menomararo le dilepe le go gagamatsa setlhabapholo e ne e le pime.+
22 Mme ga diragala mo letsatsing la tlhabano gore go se ka ga fitlhelwa tšhaka+ kgotsa lerumo mo seatleng sa ope wa batho ba ba neng ba na le Saulo le Jonathane; mme go ne ga fitlhelwa le le lengwe la ga Saulo+ le Jonathane morwawe.
23 Jaanong masole a tshireletso+ a Bafilisitia a ne a tle a betsegele kwa tselaneng ya phata ya Mikemashe.+
