1 Samuele 14:1-52
14 Mme ga diragala letsatsi lengwe gore Jonathane+ morwa Saulo a reye motlhokomedi yo o tsholang dibetsa tsa gagwe a re: “A ko o tle mme re kgabaganyetse kwa masoleng a tshireletso a Bafilisitia a a kafa moseja ka fale.” Mme a se ka a bolelela rraagwe ka gone.+
2 Mme Saulo o ne a nna fa molelwaneng wa Gibea+ kafa tlase ga setlhare sa garanata se se kwa Migerone; mme batho ba ba neng ba na le ene e ne e le banna ba ka nna makgolo a le marataro.+
3 (Mme Ahija morwa Ahitube,+ morwarraagwe Ikabode,+ morwa Finease,+ morwa Eli,+ moperesiti wa ga Jehofa kwa Shilo,+ o ne a tshotse khiba.)+ Mme batho ka bobone ba ne ba sa itse gore Jonathane o ne a tsamaile.
4 Jaanong fa gare ga diphatana tse Jonathane a neng a batla mo go tsone gore a kgabaganye a ye go tlhasela masole a tshireletso+ a Bafilisitia go ne go na le lefika le legolo la sekaleino mo ntlheng eno le lefika le legolo la sekaleino mo ntlheng e nngwe, mme leina la le lengwe e ne e le Bosese mme leina la le lengwe e le Sene.
5 Leino le lengwe e ne e le pilara kafa bokone e lebile kwa Mikemashe,+ mme le lengwe le ne le le kafa borwa le lebile kwa Geba.+
6 Ka jalo Jonathane a raya motlhokomedi, motsholadibetsa wa gagwe a re: “A ko o tle mme re kgabaganyetse kwa masoleng a tshireletso a batho bano ba ba sa rupang.+ Gongwe Jehofa o tla re direla, gonne ga go na se se ka kgoreletsang Jehofa go boloka ka ba le bantsi kgotsa ka ba le mmalwa.”+
7 Fa a rialo motsholadibetsa wa gagwe a mo raya a re: “Dira le fa e le eng se se mo pelong ya gago. Retologela kwa o batlang go ya teng. Ke na le wena tumalanong le pelo ya gago.”+
8 Foo Jonathane a re: “Bona, re kgabaganyetsa kwa banneng bale, mme a re ba itshenolele.
9 Fa ba ka re raya ba re, ‘Emang fela go fitlha re kopana le lona!’ re eme fa re leng teng, re se ka ra tlhatlogela kwa go bone.
10 Mme fa ba ka re, ‘Tlhatlogelang kwa go rona!’ foo re tlhatloge, ka gonne ruri Jehofa o tla ba tsenya mo seatleng sa rona, mme seno ke sesupo+ mo go rona.”
11 Fa a rialo boobabedi ba itshenolela masole a tshireletso a Bafilisitia. Mme Bafilisitia ba re: “Bahebera ke bano ba tswa mo mesimeng e ba ntseng ba iphitlhile mo go yone.”+
12 Ka jalo banna ba masole a tshireletso ba araba Jonathane le motsholadibetsa wa gagwe ba re: “Tlhatlogelang kwa go rona, mme re tla lo bontsha!”+ Gone fela foo Jonathane a raya motsholadibetsa wa gagwe a re: “Tlhatloga kafa morago ga me, ka gonne ruri Jehofa o tla ba tsenya mo seatleng sa Iseraele.”+
13 Mme Jonathane a nna a tlhatloga ka diatla+ le ka dinao, le motsholadibetsa wa gagwe a mo setse morago; mme ba simolola go wa fa pele ga ga Jonathane,+ mme motsholadibetsa wa gagwe o ne a ba bolaya kafa morago ga gagwe.+
14 Mme polao ya ntlha e Jonathane le motsholadibetsa wa gagwe ba neng ba ba kgemetha ka yone e ne ya fitlha go banna ba ka nna masome a mabedi mo selekanyong sa mo e ka nnang sephatlo sa mola o o lengwang mo temeng ya tshimo.
15 Foo ga nna le thoromo+ mo bothibelelong mo tshimong le mo bathong botlhe ba masole a tshireletso; mme setlhopha sa bathopi+ se ne sa roroma, le bone tota, le lefatshe la simolola go roroma,+ mme ya nna thoromo e e tswang kwa Modimong.+
16 Mme balebeledi ba ga Saulo kwa Gibea+ wa Benjamine ba go bona mme bonang! batho ba ba bakang pheretlhego ba bo ba kailela kwa le kwa.+
17 Mme Saulo a raya batho ba ba neng ba na le ene a re: “Tsweetswee, balang, mme lo bone gore ke mang yo o duleng mo go rona.” Fa ba bala, bonang! Jonathane le motsholadibetsa wa gagwe ba ne ba seyo.
18 Jaanong Saulo a raya Ahija+ a re: “A ko o atametse letlole la Modimo wa boammaaruri!”+ (Gonne ka letsatsi leo letlole la Modimo wa boammaaruri le ne le na le bomorwa Iseraele.)+
19 Mme ga diragala gore fa Saulo a ntse a bua le moperesiti,+ pheretlhego e e neng e le kwa bothibelelong jwa Bafilisitia ya tswelela pele, e nnela kgolo kwa pele. Foo Saulo a raya moperesiti a re: “Busa seatla sa gago.”
20 Ka gone Saulo le batho botlhe ba ba neng ba na le ene ba ne ba bilediwa kwa ntle.+ Ka jalo ba ya go fitlha kwa tlhabanong, mme tšhaka ya mongwe le mongwe e ne e tsogologetse mongwe ka ene+ koo; go falatsa go ne go le gogolo thata.
21 Mme Bahebera ba e neng e le ba Bafilisitia+ pele le ba ba neng ba tlhatlogetse le bone mo bothibelelong mo tikologong, le bone tota ba ne ba itshupa ba na le Iseraele yo o neng a na le Saulo le Jonathane.
22 Le banna botlhe ba Iseraele ba ba neng ba iphitlhile+ mo kgaolong e e dithaba ya Eferaime ba ne ba utlwa gore Bafilisitia ba ne ba tshabile, mme le bone ba ba latelela gaufi thata mo tlhabanong.
23 Mme Jehofa a boloka+ Iseraele mo letsatsing leo, mme tlhabano ya kgabaganyetsa kwa Bethe-afene.+
24 Mme batho ba Iseraele ka bobone ba ne ba le mo pitlaganong mo letsatsing leo, le fa go ntse jalo Saulo a ikanisa+ batho, a re: “Go hutsegile motho yo o jang senkgwe pele ga maitseboa le go fitlha ke ipusoloseditse+ mo babeng ba me!” Mme ga go na ope wa batho yo o neng a ngata senkgwe.+
25 Mme botlhe ba lefatshe ba tla mo sekgweng, fa go ne go na le tswina ya dinotshe+ mo nageng.
26 E rile batho ba tsena mo sekgweng, bonang! go ne go rotha tswina ya dinotshe,+ mme go ne go se na ope yo o bayang seatla sa gagwe mo molomong wa gagwe, ka gonne batho ba ne ba boifa ikano.+
27 Mme Jonathane ene, o ne a sa utlwa fa rraagwe a ikanisa batho,+ ka jalo o ne a otlolola ntlha ya thobane e e neng e le mo seatleng sa gagwe mme a e ina mo lomepeng lwa tswina ya dinotshe a bo a busa seatla sa gagwe a se isa mo molomong, mme matlho a gagwe a simolola go phatsima.+
28 Foo mongwe wa batho a araba a re: “Rrago o ikanisitse batho ka tsela e e masisi a re: ‘Go hutsegile motho yo o jang senkgwe gompieno!’”+ (Mme batho ba simolola go lapa.)+
29 Le fa go ntse jalo, Jonathane a re: “Rre o tlisitse matlhabisaditlhong+ mo lefatsheng. Tsweetswee, bonang kafa matlho a me a phatsimang ka gone ka gonne ke utlwile go le gonnye ga tswina eno ya dinotshe.+
30 Go ne go tla nna jalo bogolo jang ne fa batho gompieno ba ka bo ba jele+ thopo ya baba ba bone e ba e fitlhetseng!+ Gonne jaanong polao mo Bafilisitieng ga e a nna kgolo.”+
31 Mme mo letsatsing leo ba nna ba kgemetha Bafilisitia go tloga kwa Mikemashe+ go ya kwa Aijalona, mme batho ba lapa fela thata.+
32 Mme batho ba simolola go kgomogela thopo ka bogagaru+ ba tsaya dinku le dikgomo le dinamane ba di tlhabela fa fatshe, mme batho ba ja mmogo le madi.+
33 Ka jalo ba bolelela Saulo ba re: “Bona! Batho ba leofela Jehofa ka go ja mmogo le madi.”+ Fa ba rialo a re: “Lo dirile ka boferefere. Sa ntlha, pitikelang leje le legolo kwa go nna.”
34 Morago ga moo Saulo a re: “Gasamang mo gare ga batho, mme lo ba reye lo re, ‘A mongwe le mongwe wa lona a tlise poo ya gagwe kwa go nna, le mongwe le mongwe nku ya gagwe, mme lo tlhabele mo lefelong leno lo bo lo jele mo go lone, mme lo se ka lwa leofela Jehofa ka go ja mmogo le madi.’”+ Ka jalo batho botlhe ba tlisa mongwe le mongwe poo ya gagwe e e neng e le mo seatleng sa gagwe mo bosigong joo mme a e tlhabela gone.
35 Mme Saulo a agela Jehofa sebeso.+ A simolola ka sone go agela Jehofa dibeso.+
36 Moragonyana Saulo a re: “A re fologeng re latelele Bafilisitia bosigo mme re ba gapele go fitlha moso o apoga,+ mme re se ka ra tlogela le fa e le a le mongwe fela mo go bone.”+ Foo ba re: “Dira sengwe le sengwe se se molemo mo matlhong a gago.” Mme moperesiti a re: “A re atameleng Modimo wa boammaaruri+ fano.”
37 Mme Saulo a simolola go tlhotlhomisa mo Modimong: “A ke fologe ke latelele Bafilisitia?+ A o tla ba tsenya mo seatleng sa Iseraele?”+ Mme a se ka a mo araba mo letsatsing+ leo.
38 Ka jalo Saulo a re: “Atamelang fano,+ lona lotlhe bagolwane ba batho,+ mme lo tlhomamise lo bone gore boleo jono bo nnile gone ka tsela efe gompieno.
39 Gonne jaaka Jehofa, yo e leng Mogolodi wa Iseraele, a tshedile, le fa bo le mo go Jonathane morwaake, ruri o tla swa.”+ Mme ga bo go se na ope yo o mo arabang mo bathong botlhe.
40 Mme a tswelela a raya Iseraele yotlhe a re: “Lona ka bolona lo tla nna mo letlhakoreng le lengwe, mme nna le Jonathane morwaake—re tla nna kafa letlhakoreng le lengwe.” Fa a rialo batho ba raya Saulo ba re: “Dira se se molemo mo matlhong a gago.”+
41 Mme Saulo a raya Jehofa a re: “Ao Modimo wa Iseraele, a ko o neye Thumime!”+ Foo ga tsewa Jonathane le Saulo, mme batho bone ba tswa.+
42 Jaanong Saulo a re: “Tshelang bola+ go tlhopha fa gare ga me le Jonathane morwaake.” Mme ga tsewa Jonathane.
43 Foo Saulo a raya Jonathane a re: “A ko o mpolelele, O dirile eng?” Ka jalo Jonathane a mmolelela a re: “Ruri ke ne ka utlwa tswina e nnye ya dinotshe mo ntlheng ya thobane e e mo seatleng sa me.+ Ke fano! Mma ke swe!”
44 Fa a rialo Saulo a re: “E kete Modimo a ka dira jalo a bo a oketsa,+ fa ruri o sa swe,+ Jonathane.”
45 Mme batho ba raya Saulo ba re: “A Jonathane o tshwanetse go swa, ene yo o tlisitseng poloko+ e kgolo eno mo Iseraele? Go ka se direge!+ Jaaka Jehofa a tshedile,+ le fa e le moriri o le mongwe+ wa tlhogo ya gagwe ga o kitla o wela fa fatshe; gonne o ne a dira le Modimo mo letsatsing leno.”+ Ka go rialo batho ba golola+ Jonathane, mme a se ka a swa.
46 Ka jalo Saulo a tlogela go sala Bafilisitia morago, mme Bafilisitia ka bobone ba ya kwa lefelong la bone.+
47 Mme Saulo ka boene a tsaya bogosi jwa Iseraele+ mme a lwa mo tikologong le baba ba gagwe botlhe, le Moabe+ le bomorwa Amona+ le Edoma+ le dikgosi tsa Soba+ le Bafilisitia;+ mme gongwe le gongwe kwa a neng a retologela teng o ne a diragatsa katlholo.
48 Mme a tswelela a dira ka boganka+ mme a kgemetha Amaleke+ a bo a golola Iseraele mo seatleng sa mothopi wa bone.
49 Mme bomorwa Saulo e ne e le Jonathane+ le Ishifi le Maleki-shua,+ mme maina a bomorwadie ba babedi, leina la yo o tshotsweng pele e ne e le Merabe+ mme leina la yo mmotlana e le Mikale.+
50 Mme leina la mosadi wa ga Saulo e ne e le Ahinoame morwadia Ahimaase, mme leina la molaodi wa masole a gagwe e ne e le Abenere+ morwa Nere, morwarraagwe rraagwe Saulo.
51 Kishe+ e ne e le rraagwe Saulo, mme Nere+ rraagwe Abenere e ne e le morwa Abiele.
52 Mme ntwa ya tswelela e le boima kgatlhanong le Bafilisitia malatsi otlhe a ga Saulo.+ Fa Saulo a ne a bona monna ope yo o thata kgotsa motho ope yo o seganka, o ne a mo itseela.+
