1 Samuele 15:1-35
15 Foo Samuele a raya Saulo a re: “Jehofa o ne a roma nna gore ke go tlotse+ o nne kgosi ya batho ba gagwe Iseraele, mme jaanong reetsa lentswe la mafoko a ga Jehofa.+
2 Jehofa wa masomosomo+ o buile jaana, ‘Ke tshwanetse go sekisetsa+ Amaleke se a se diretseng Iseraele fa a ne a le kgatlhanong le ene mo tseleng fa a ne a tlhatloga a tswa kwa Egepeto.+
3 Jaanong tsamaya, mme o kgemethe Amaleke+ o mo senye+ le sotlhe se a nang le sone, mme o se ka wa mo tlhomogela pelo, mme o ba bolaye,+ monna le mosadi, ngwana le losea lo lo anyang,+ poo le nku, kamela le esele.’”+
4 Ka jalo Saulo a bitsa batho mme a ba bala kwa Telaime, banna ba le dikete di le makgolo a mabedi ba ba tsamayang ka dinao le banna ba le dikete di le lesome ba Juda.+
5 Mme Saulo a tla go fitlha mo motseng wa Amaleke mme a lalela fa mokgatšheng o o phothoselang.
6 Fa go sa ntse go ntse jalo Saulo a raya Bakene+ a re: “Tsamayang,+ tlogang, fologang lo tswe mo gare ga Baamaleke, gore ke se ka ka lo nyeletsa le bone. Mme lona, lo ne lwa supa bopelonomi jwa lorato mo go bomorwa Iseraele+ botlhe ka nako ya fa ba ne ba tswa kwa Egepeto.”+ Ka jalo Bakene ba ne ba tloga mo gare ga Baamaleke.
7 Morago ga moo Saulo a kgemetha Amaleke+ go tswa kwa Hafila+ go fitlha kwa Shure,+ o o fa pele ga Egepeto.
8 Mme a tshwara Agage+ kgosi ya Baamaleke a tshela, mme batho ba bangwe botlhe a ba senya ka bogale jwa tšhaka.+
9 Mme Saulo le batho ba ne ba tlhomogela Agage pelo le tse di gaisang tsotlhe tsa letsomane le motlhape+ le tse di nonneng le diphelefu le sotlhe se se neng se le molemo, mme ba ne ba sa batle go di senya.+ Mme dithoto tsotlhe tse di neng di nyatsega le tse di gannweng, tsone ba ne ba di senya.
10 Jaanong lefoko la ga Jehofa la tla mo go Samuele, le re:
11 “Ke ikwatlhaela+ go bo ke dirile gore Saulo a buse e le kgosi, ka gonne o boile+ mo go ntshaleng morago, mme ga a diragatsa mafoko a me.”+ Mme go ne go tshwenya Samuele+ thata, mme a nna a goela kwa go Jehofa bosigo jotlhe.+
12 Foo Samuele a tsoga go sa le phakela go ya go kgatlhantsha Saulo mo mosong. Mme Samuele o ne a begelwa go twe: “Saulo o ne a tla mo Karemele,+ mme bona! o ne a itlhomela sefikantswe,+ mme go tswa foo a retologa mme a kgabaganya a fologela kwa Gilegala.”
13 Kgabagare Samuele a tla mo go Saulo, mme Saulo a simolola go mo raya a re: “O segofaditswe+ ke Jehofa. Ke diragaditse lefoko la ga Jehofa.”+
14 Mme Samuele a re: “Jaanong modumo ono wa letsomane o o mo ditsebeng tsa me o kaya eng, le modumo wa motlhape o ke o utlwang?”+
15 Fa a rialo Saulo a re: “Ba di tlisitse go tswa kwa Baamalekeng, ka gonne batho+ ba ne ba tlhomogela pelo tse di di gaisang tsotlhe tsa letsomane le tsa motlhape, ka boikaelelo jwa go isetsa Jehofa Modimo+ wa gago setlhabelo; mme se se neng se setse re se sentse.”
16 Fa a rialo Samuele a raya Saulo a re: “Ema! Mme ke tla go bolelela se Jehofa a se buileng le nna maabane bosigo.”+ Ka jalo a mo raya a re: “Bua!”
17 Mme Samuele a tswelela a re: “A o ne o se tlhogo ya ditso tsa Iseraele o sa le monnye mo matlhong a gago,+ mme Jehofa a go tlotsa+ go nna kgosi mo Iseraele?
18 Moragonyana Jehofa o ne a go roma a re, ‘Tsamaya, mme o senye baleofi,+ e bong Baamaleke, mme o tlhabane le bone go fitlha o ba fedisa.’+
19 Ka jalo ke ka ntlha yang fa o se kile wa utlwa lentswe la ga Jehofa mme wa kgomogela+ thopo ka bogagaru wa dira se se bosula mo matlhong a ga Jehofa?”+
20 Le fa go ntse jalo, Saulo a raya Samuele a re: “Mme ke utlwile+ lentswe la ga Jehofa ka gonne ke ne ka ya thomong e Jehofa a neng a nthomile kwa go yone mme ka tlisa Agage+ kgosi ya Amaleke, mme Amaleke ke e sentse.+
21 Mme batho+ ba ne ba tsaya dinku le dikgomo mo thopong, tsa boleng jo bo kwa godimo mo go tsone e le sengwe se se neeletsweng tshenyego, go isetsa Jehofa Modimo wa gago setlhabelo+ kwa Gilegala.”+
22 Samuele le ene a re: “A Jehofa o natefelwa ke ditshupelo tse di fisiwang+ le ditlhabelo jaaka a natefelwa ke go utlwiwa ga lentswe la ga Jehofa? Bona! Go utlwa+ go botoka go na le setlhabelo,+ go tlhwaya tsebe go na le mafura+ a diphelefu;
23 gonne botsuolodi+ bo tshwana le boleo jwa boitseanape,+ mme go iketeletsa kwa pele ka boikgodiso go tshwana le go dirisa maatla a masaitseweng le modingwana wa terafime.+ E re ka o ganne lefoko la ga Jehofa,+ ka jalo le ene o a go gana gore o se ka wa nna kgosi.”+
24 Foo Saulo a raya Samuele a re: “Ke leofile;+ gonne ke tlodile taelo ya ga Jehofa le mafoko a gago, ka gonne ke ne ke boifa batho+ ka jalo ka utlwa lentswe la bone.
25 Jaanong, tsweetswee, itshwarele+ boleo jwa me mme o boe le nna gore ke tle ke obame+ fa go Jehofa.”
26 Mme Samuele a raya Saulo a re: “Ga ke na go boa le wena, gonne o ganne lefoko la ga Jehofa, mme Jehofa o a go gana gore o se tswelele o le kgosi ya Iseraele.”+
27 Fa Samuele a retologa a re o a tsamaya, gone fela foo a tshwara ntlha ya seaparo sa gagwe se se se nang mabogo, mme ya gagoga.+
28 Foo Samuele a mo raya a re: “Jehofa o gagotse+ puso ya segosi ya Iseraele mo go wena gompieno, mme ruri o tla e naya mongwe ka wena yo o botoka mo go wena.+
29 E bile, mo godimo ga moo, Motlotlegi wa Iseraele+ ga a kitla a itshupa a le maaka,+ gape ga A kitla a ikwatlhaya, gonne ga se motho wa mo lefatsheng mo a ka ikwatlhayang.”+
30 Fa a rialo ene a re: “Ke leofile. Jaanong ntlotle+ tsweetswee, fa pele ga banna ba bagolwane ba batho ba gaetsho le fa pele ga Iseraele mme o boe le nna, mme ruri ke tla obama fa go Jehofa Modimo wa gago.”+
31 Ka jalo Samuele a boa a setse Saulo morago, mme Saulo a obama fa go Jehofa.
32 Morago ga moo Samuele a re: “Atametsang Agage kgosi ya Amaleke fa go nna.” Foo Agage a ya kwa go ene a okaoka, mme Agage a simolola go ithaya a re: “Ruri tiragalo e e botlhoko ya loso e tsamaile.”
33 Le fa go ntse jalo, Samuele a re: “Fela jaaka tšhaka+ ya gago e amogile basadi bana, fela jalo mmago+ o tla amogwa bana go feta botlhe mo basading.”+ Fa a sena go rialo Samuele a remaganya Agage fa pele ga ga Jehofa kwa Gilegala.+
34 Jaanong Samuele a tsamaya a ya kwa Rama, mme Saulo ene, a tlhatlogela kwa ntlong ya gagwe kwa Gibea+ wa ga Saulo.
35 Mme Samuele ga a ka a bona Saulo gape go fitlha ka letsatsi la loso lwa gagwe, ka gonne Samuele o ne a hutsafaletse+ Saulo. Mme Jehofa ene, o ne a ikwatlhaela go bo a dirile Saulo kgosi ya Iseraele.+
