1 Samuele 24:1-22
24 Mme ga diragala gore, fela fa Saulo a boa kwa go saleng Bafilisitia+ morago, ba ne ba tla go mmegela ba re: “Bona! Dafide o kwa nageng ya Ene-gedi.”+
2 Mme Saulo a tsaya banna ba le dikete di le tharo ba ba tlhophilweng+ mo Iseraele yotlhe mme ba ya go batla Dafide+ le banna ba gagwe mo mafikeng a a borethe a dipodi tsa kwa dithabeng.+
3 Kgabagare a tla mo masakeng a dinku a maje fa thoko ga tsela, fa go neng go na le logaga teng. Ka jalo Saulo a tsena a ya go ithoma,+ fa Dafide le banna ba gagwe ba ne ba le kwa tengteng ga logaga,+ ba ntse fa fatshe.
4 Mme banna ba ga Dafide ba simolola go mo raya ba re: “Leno ke letsatsi le ka lone Jehofa a go rayang a re, ‘Bona! ke tsenya mmaba wa gago mo seatleng sa gago,+ mme o dire ka ene fela kafa go bonalang go le molemo ka gone mo matlhong a gago.’”+ Ka jalo Dafide a nanoga mme ka setu a kgaola ntlha ya seaparo se se se nang mabogo sa ga Saulo.
5 Mme ga diragala morago ga foo gore pelo ya ga Dafide ya nna ya mo tshwenya+ ka lebaka la go bo a ne a kgaotse ntlha ya seaparo se se se nang mabogo sa ga Saulo.
6 Ka gone a raya banna ba gagwe a re: “Go ka se direge ka nna, kafa ponong ya ga Jehofa, gore ke dire morena wa me selo se se ntseng jaana, motlodiwa+ wa ga Jehofa, ka go mo ntshetsa seatla, gonne ke motlodiwa wa ga Jehofa.”+
7 Ka jalo Dafide a phatlalatsa banna ba gagwe ka mafoko ano, mme a se ka a ba letlelela go tlhasela Saulo.+ Mme Saulo ene, a nanoga mo logageng a nna a tsamaya.
8 Ka jalo Dafide a nanoga morago ga moo mme a tswa mo logageng a bo a tlhaeletsa kwa go Saulo, a re: “Morena wa me+ kgosi!” Fa a rialo Saulo a leba kwa morago, mme Dafide a ikoba sefatlhego sa gagwe se lebile fa fatshe+ a bo a obama.
9 Mme Dafide a tswelela a raya Saulo a re: “Ke ka ntlha yang fa o reetsa mafoko a motho,+ a re, ‘Bona! Dafide o batla go go utlwisa botlhoko’?
10 Mo letsatsing leno matlho a gago a bone kafa Jehofa a neng a go tsenya mo seatleng sa me ka gone mo logageng gompieno; mme mongwe o ne a re o bolawe,+ mme ka go utlwela botlhoko ka re, ‘Ga nkitla ke ntshetsa morena wa me seatla, gonne ke motlodiwa+ wa ga Jehofa.’
11 Mme rra,+ bona, ee, bona ntlha ya seaparo sa gago se se se nang mabogo mo seatleng sa me, gonne fa ke ne ke kgaola ntlha ya seaparo sa gago se se se nang mabogo ga ke a ka ka go bolaya. Itse o bo o bone gore ga go na bosula+ le fa e le go tlhanoga mo seatleng sa me, e bile ga ke a go leofela, fa o ntse o laletse moya wa me gore o o tlose.+
12 E kete Jehofa a ka atlhola fa gare ga me le wena;+ mme Jehofa a mpusoloseletse+ mo go wena, mme seatla sa me ga se kitla se nna mo go wena.+
13 Fela jaaka seane sa ba bogologolo tala se re, ‘Boikepo bo tla tswa mo go ba ba boikepo,’+ mme seatla sa me ga se kitla se nna mo go wena.
14 Kgosi ya Iseraele e lateletse mang? O lelekisitse mang? Ntša e e suleng?+ Letsetse le le lengwe+ fela?
15 Mme Jehofa o tla nna moatlhodi, mme o tla atlhola fa gare ga me le wena, mme o tla bona a ba a sekaseke kgetsi ya me ya molao+ mme a ba a nkatlhole gore a nkgolole mo seatleng sa gago.”
16 Mme ga diragala gore, fa Dafide a fetsa go bua mafoko ano mo go Saulo, Saulo a re: “A ke lentswe la gago leo, Dafide+ morwaaka?” Mme Saulo a simolola go tsholetsa lentswe la gagwe a lela.+
17 Mme a tswelela a raya Dafide a re: “O siame go mpheta,+ gonne o diretse nna molemo,+ mme ke nna ke go diretseng bosula.
18 Mme wena—gompieno o boletse molemo o o o ntiretseng wa gore Jehofa a ntsenye mo seatleng sa gago+ mme wa se ka wa mpolaya.
19 Jaanong fa monna a bona mmaba wa gagwe, a o tla mo tsamaisa mo tseleng+ e e molemo? Ka jalo Jehofa ka nosi o tla go duela ka molemo,+ ka gonne gompieno o ntiretse jalo.
20 Mme jaanong, bona! Ke itse sentle gore ruri o tla busa o le kgosi,+ le gore bogosi jwa Iseraele ruri bo tla tshwarelela mo seatleng sa gago.
21 Ka jalo jaanong a ko o inkanele ka Jehofa+ gore ga o kitla o kgaola losika lwa me morago ga me le gore ga o kitla o nyeletsa leina la me mo ntlong ya ga rre.”+
22 Ka jalo Dafide a ikanela Saulo, mme morago ga foo Saulo a ya kwa legaeng la gagwe.+ Mme Dafide le banna ba gagwe, ba ne ba tlhatlogela kwa lefelong le go leng thata go le atamela.+
