1 Samuele 29:1-11
29 Mme Bafilisitia+ ba phutha mathibelelo otlhe a bone kwa Afeke, fa Baiseraele ba ne ba thibeletse fa motsweding o o neng o le kwa Jesereele.+
2 Mme barena+ ba kgolagano ba Bafilisitia ba ne ba feta ka makgolokgolo le ka diketekete, mme Dafide le banna ba gagwe ba ne ba feta morago ga moo ba na le Akishe.+
3 Mme dikgosana tsa Bafilisitia tsa simolola go re: “Bahebera+ bano ba kaya eng?” Foo Akishe a raya dikgosana tsa Bafilisitia a re: “A yono ga se Dafide motlhanka wa ga kgosi Saulo wa Iseraele, yo o neng a na le nna fano ngwaga kgotsa tse pedi,+ yo ke sa fitlhelang sepe+ mo go ene go tloga ka letsatsi le a ngwegetseng mo go nna ka lone go fitlha mo letsatsing leno?”
4 Mme dikgosana tsa Bafilisitia tsa mo galefela; mme dikgosana tsa Bafilisitia tsa tswelela tsa mo raya tsa re: “Dira gore monna yo a boele morago,+ mme a a boele kwa lefelong la gagwe kwa o mo abetseng gone; mme o se ka wa mo letla a fologela kwa tlhabanong le rona, gore a se ka a nna moganetsi+ wa rona kwa tlhabanong. Mme motho yono o tla itira yo o amogelwang ke morena wa gagwe jang? A ga se ka ditlhogo tsa banna bao ba rona?
5 A yono ga se Dafide yo ba neng ba ntse ba mminela, ba re, ‘Saulo o kgemethile dikete tsa gagwe, mme Dafide dikete tsa gagwe di le masome’?”+
6 Ka gone Akishe+ a bitsa Dafide mme a mo raya a re: “Jaaka Jehofa a tshedile,+ o thokgame, mme go tswa ga gago le go tsena ga gago mo bothibelelong+ le nna go ntse go le molemo mo matlhong a me;+ gonne ga ke a fitlhela bosula mo go wena go tloga ka letsatsi le o tlileng mo go nna ka lone go fitlha mo letsatsing leno.+ Mme mo matlhong a barena+ ba kgolagano ga o molemo.
7 Mme jaanong boa o tsamaye ka kagiso, gore o se ka wa dira sepe se se bosula mo matlhong a barena ba kgolagano ba Bafilisitia.”
8 Le fa go ntse jalo, Dafide a raya Akishe a re: “Ka ntlha yang, ke dirile eng,+ mme o fitlhetse eng mo motlhankeng wa gago go tloga ka letsatsi le ke neng ke le fa pele ga gago ka lone go fitlha mo letsatsing leno,+ gore ke se ka ka tla go tlhabana le baba ba morena wa me kgosi?”
9 Fa a rialo Akishe a araba mme a raya Dafide a re: “Ke itse sentle gore o ntse o le molemo mo matlhong a me, jaaka moengele wa Modimo.+ Ke dikgosana tsa Bafilisitia fela tse di rileng, ‘A a se ka a tlhatlogela le rona kwa tlhabanong.’
10 Jaanong tsoga go sa le phakela le batlhanka ba morena wa gago ba ba tlileng le wena; mme lo tsoge go sa le phakela fa lo setse lo sedifaletswe. Lo bo lo tsamaya.”+
11 Ka jalo Dafide a tsoga go sa le phakela,+ ene le banna ba gagwe, gore a tsamaye mo mosong mme a boele kwa lefatsheng la Bafilisitia; mme Bafilisitia bone ba tlhatlogela kwa Jesereele.+
