1 Samuele 31:1-13
31 Jaanong Bafilisitia ba ne ba tlhabana le Iseraele,+ mme banna ba Iseraele ba tshaba fa pele ga Bafilisitia, mme ba nna ba wela fa fatshe ba bolailwe setlhogo+ mo thabeng ya Gileboa.+
2 Mme Bafilisitia ba nna ba ntse ba le gaufi le Saulo le bomorwawe; mme la bofelo Bafilisitia ba tlhaba Jonathane+ le Abinadabe+ le Maleki-shua,+ bomorwa Saulo.
3 Mme tlhabano ya imela Saulo, mme la bofelo ba ba hulang, banna ba bora ba mmona, mme a gobadiwa mo go botlhoko ke ba ba hulang.+
4 Foo Saulo a raya motshola dibetsa wa gagwe a re: “Somola tšhaka ya gago+ mme o mphunyeletse ka yone, gore banna bano ba ba sa rupang+ ba se ka ba tla mme ba mphunyeletsa mme ba nkgokgontsha.” Mme motsholadibetsa wa gagwe a bo a sa batle,+ ka gonne o ne a boifa thata. Ka jalo Saulo a tsaya tšhaka a wela mo go yone.+
5 E rile motshola dibetsa wa gagwe a bona gore Saulo o ne a sule,+ foo le ene a wela mo tšhakeng ya gagwe mme a swa le ene.+
6 Ka jalo Saulo le bomorwawe ba bararo le motshola dibetsa wa gagwe, le banna ba gagwe botlhe, ba swa mmogo mo letsatsing leo.+
7 E rile banna ba Iseraele ba ba neng ba le mo kgaolong ya lebala le le kwa tlase le ba ba neng ba le mo kgaolong ya Joredane ba bona gore banna ba Iseraele ba ne ba tshabile, le gore Saulo le bomorwawe ba ne ba sule, foo ba simolola go tlogela metse ba tshaba,+ mme morago ga moo Bafilisitia ba tsena mme ba nna mo go yone.+
8 Mme ga diragala mo letsatsing le le latelang gore, fa Bafilisitia ba tla go apola ba ba bolailweng setlhogo,+ ba fitlhela Saulo le bomorwawe ba bararo ba wetse mo Thabeng ya Gileboa.+
9 Mme ba kgaola tlhogo ya gagwe+ ba mo apola dibetsa tsa gagwe mme ba romela gotlhe fela mo lefatsheng la Bafilisitia go itsise+ matlo a medingwana+ ya bone le batho.
10 La bofelo ba tsenya dibetsa tsa gagwe+ mo ntlong ya ditshwantsho tsa ga Ashethorethe,+ mme setopo sa gagwe ba se kokotela mo loboteng lwa Bethe-shane.+
11 Mme ka ene, banni ba Jabeshe-gileade+ ba ne ba utlwa se Bafilisitia ba neng ba se dirile Saulo.
12 Ka yone nako eo banna botlhe ba ba diganka ba nanoga mme ba tsamaya bosigo jotlhe ba ntsha setopo sa ga Saulo le ditopo tsa bomorwawe mo loboteng lwa Bethe-shane mme ba tla mo Jabeshe ba di fisetsa teng.+
13 Foo ba tsaya marapo+ a bone ba a fitlha+ kafa tlase ga setlhare sa motamariseka+ kwa Jabeshe, mme ba itima dijo malatsi a le supa.+
