1 Samuele 6:1-21
6 Mme letlole+ la ga Jehofa le ne la nna mo nageng ya Bafilisitia dikgwedi di le supa.
2 Mme Bafilisitia ba bitsa baperesiti le ba ba dirang tiro ya boitseanape,+ ba re: “Re tla dira eng ka letlole la ga Jehofa? Re itsiseng gore re ka le tsamaisa ka eng go le isa kwa lefelong la lone.”
3 Fa ba araba seo ba re: “Fa lo tsamaisa letlole la Modimo wa Iseraele, lo se ka lwa le tsamaisa kwantle ga tshupelo, gonne ruri lo tshwanetse lwa busetsa tshupelo ya molato+ kwa go ene. Ke gone lo tla fodisiwang, mme lo tla itse gore ke ka ntlha yang fa seatla sa gagwe se ne se sa tloge mo go lona.”
4 Foo ba re: “Tshupelo ya molato e re tshwanetseng go e busetsa kwa go ene ke eng?” Mme ba re: “Go ya ka palo ya barena+ ba kgolagano ba Bafilisitia, ditshika di le tlhano tsa marago tse di rurugileng tsa gouta le dipeba tse di tlolang tsa gouta di le tlhano, gonne mongwe le mongwe wa lona le barena ba lona ba kgolagano ba na le petso e e tshwanang.
5 Mme lo dire ditshwantsho tsa ditshika tsa lona tsa marago tse di rurugileng le ditshwantsho tsa dipeba tsa lona+ tse di tlolang tse di senyang lefatshe, mme lo neye Modimo wa Iseraele kgalalelo.+ Gongwe o tla tlhofofatsa seatla sa gagwe mo go lona le mo modimong wa lona le mo lefatsheng la lona.+
6 Gape, ke ka ntlha yang fa lo dira pelo ya lona logwadi fela jaaka Egepeto le Faro ba ne ba dira pelo ya bone logwadi?+ A ga ba a ka ba ba tsamaisa fela fa A sena go ba direla ka bosetlhogo,+ mme ba tsamaya?+
7 Jaanong tsayang mme lo dire koloi e ntšha,+ le dikgomo tse pedi tse di anyisang, tse go iseng go ke go bewe jokwe+ mo go tsone, mme lo golegelele dikgomo mo koloing, lo bo lo busetsa bana ba tsone kwa gae gore ba se ka ba di sala morago.
8 Mme lo tseye letlole la ga Jehofa lo le beye mo koloing, mme dilwana tsa gouta+ tse lo tshwanetseng go di busetsa kwa go ene e le tshupelo ya molato+ lo di tsenye mo lebokosong kafa letlhakoreng la lone. Mme lo le tsamaise, le tsamaye.
9 Mme lo lebe: fa le tlhatloga ka tsela e e yang kwa karolong ya lone ya naga, kwa Bethe-shemeshe,+ ke ene a re diretseng bosula jono jo bogolo; mme fa go sa nne jalo, re tla itse gore ga re a amiwa ke seatla sa gagwe; se se re diragaletseng e ne e le kotsi+ fela.”
10 Mme banna ba dira fela jalo. Ka jalo ba tsaya dikgomo tse pedi tse di neng di anyisa ba di golegelela mo koloing, mme ba tswalela bana ba tsone kwa gae.
11 Go tswa foo ba baya letlole la ga Jehofa mo koloing,+ le lebokoso le dipeba tse di tlolang tsa gouta le ditshwantsho tsa ditshika tsa bone tsa marago tse di rurugileng.
12 Mme dikgomo tsa simolola go tlhamalala fela mo tseleng e e yang kwa Bethe-shemeshe.+ Di ne tsa tsamaya mo tseleng e kgolo e le nngwe, di tsamaya di lela, mme tsa se ka tsa fapogela kafa mojeng kgotsa kafa molemeng. Mo nakong eno yotlhe barena ba kgolagano+ ba Bafilisitia ba ne ba tsamaya fa morago ga tsone go ya go fitlha kwa molelwaneng wa Bethe-shemeshe.
13 Mme batho ba Bethe-shemeshe ba ne ba roba korong+ kwa lebaleng le le kwa tlase. E rile ba tsholetsa matlho ba bona Letlole, ba ipela fa ba le bona.
14 Mme koloi ka boyone ya goroga mo tshimong ya ga Joshua wa Mobethe-shemeshe mme ya nna e eme teng, fa go neng go na le leje le legolo teng. Mme ba fatsa dikgong tsa koloi, mme dikgomo+ ba di isetsa Jehofa+ e le tshupelo e e fisiwang.
15 Mme Balefi+ ka bobone ba folosa letlole la ga Jehofa le lebokoso le le neng le na le lone, le dilwana tsa gouta di neng di le mo go lone, mme ba le baya mo lejeng le legolo. Mme banna ba Bethe-shemeshe bone, ba isa ditshupelo tse di fisiwang, mme ba tswelela ba isetsa Jehofa ditlhabelo mo letsatsing leo.
16 Mme barena ba batlhano ba kgolagano+ ba Bafilisitia ba go bona mme ba boela kwa Ekerone mo letsatsing leo.
17 Jaanong tseno ke ditshika tsa marago tse di rurugileng tsa gouta tse Bafilisitia ba neng ba di busetsa kwa go Jehofa+ e le tshupelo ya molato: ya Ashedoda+ e le nngwe, ya Gasa+ e le nngwe, ya Ashekelona+ e le nngwe, ya Gathe+ e le nngwe, ya Ekerone+ e le nngwe.
18 Mme dipeba tse di tlolang tsa gouta e ne e le tsa palo ya metse yotlhe ya Bafilisitia ya barena ba batlhano ba kgolagano, go tswa kwa motseng o o sireletsegileng go ya kwa motsaneng wa naga e e bulegileng.
Mme leje le legolo le ba neng ba baya letlole la ga Jehofa mo go lone ke mosupi go tla go fitlha mo letsatsing leno mo tshimong ya ga Joshua wa Mobethe-shemeshe.
19 Mme a kgemetha banna ba Bethe-shemeshe,+ ka gonne ba ne ba lebile letlole la ga Jehofa. Ka jalo a kgemetha mo bathong banna ba le masome a supa—banna ba le dikete di le masome a matlhano—mme batho ba simolola go hutsafala ka gonne Jehofa o ne a kgemethile batho ka polao e kgolo e e setlhogo.+
20 Mo godimo ga moo, banna ba Bethe-shemeshe ba re: “Ke mang yo o tla kgonang go ema fa pele ga ga Jehofa Modimo yono yo o boitshepo,+ mme o tla ikgogela kwa go mang a tswa mo go rona?”+
21 La bofelo ba roma barongwa kwa banning ba Kiriathe-jearime,+ ba re: “Bafilisitia ba busitse letlole la ga Jehofa. Fologang. Le tlhatlosetseng kwa go lona.”+
