1 Samuele 7:1-17
7 Ka jalo banna ba Kiriathe-jearime+ ba tla mme ba tlhatlosa letlole la ga Jehofa ba le isa kwa ntlong ya ga Abinadabe+ mo thoteng, mme Eliasare morwawe e ne e le ene yo ba neng ba mo itshepisa gore a dise letlole la ga Jehofa.
2 Mme ga diragala gore go simolola ka letsatsi le letlole le neng la nna kwa Kiriathe-jearime ka lone, malatsi a nna a ntsifala, mo a neng a fitlha go dingwaga di le masome a mabedi, mme ntlo yotlhe ya Iseraele ya lelela Jehofa+ ka bohutsana.
3 Mme Samuele a raya ntlo yotlhe ya Iseraele a re: “Fa e le gore lo boela kwa go Jehofa+ ka pelo ya lona yotlhe, tlosang medimo e sele mo gare ga lona+ le ditshwantsho tsa ga Ashethorethe,+ mme lo kaele pelo ya lona ka tlhomamo kwa go Jehofa lo bo lo direle ene a le esi,+ mme o tla lo golola mo seatleng sa Bafilisitia.”+
4 Fa a rialo bomorwa Iseraele ba tlosa Bobaale+ le ditshwantsho tsa ga Ashethorethe+ mme ba simolola go direla Jehofa a le esi.
5 Mme Samuele a re: “Phuthelang Iseraele+ yotlhe kwa Misepa,+ gore ke tle ke lo rapelele+ kwa go Jehofa.”
6 Ka jalo ba ne ba phuthelwa kwa Misepa, mme ba ga metsi ba a tshela fa pele ga ga Jehofa mme ba itima dijo mo letsatsing leo.+ Mme ba simolola go bua foo ba re: “Re leofetse Jehofa.”+ Mme Samuele a atlhola+ bomorwa Iseraele kwa Misepa.
7 Mme Bafilisitia ba utlwa gore bomorwa Iseraele ba ne ba phuthegetse kwa Misepa, mme barena ba kgolagano+ ba Bafilisitia ba tsena mo tseleng go ya go tlhasela Iseraele. E rile bomorwa Iseraele ba utlwa ka gone, ba simolola go boifa ka ntlha ya Bafilisitia.+
8 Ka jalo bomorwa Iseraele ba raya Samuele ba re: “O se ka wa didimala go tlhola o ikuela kwa go Jehofa Modimo wa rona o re kopela thuso,+ gore a re boloke mo seatleng sa Bafilisitia.”
9 Mme Samuele a tsaya kwanyana e e anyang a e isetsa Jehofa e le tshupelo e e fisiwang, tshupelo e e feletseng;+ mme Samuele a simolola go kuela kwa go Jehofa gore a thuse Iseraele,+ mme Jehofa a mo araba.+
10 Mme ga diragala gore fa Samuele a ntse a isa tshupelo e e fisiwang, Bafilisitia ka bobone ba atamela go tla go tlhabana le Iseraele. Mme jaanong Jehofa a dira gore maru a dume ka modumo o o kwa godimo+ mo letsatsing leo kgatlhanong le Bafilisitia, gore a ba tlhakatlhakanye;+ mme ba fenngwa fa pele ga Iseraele.+
11 Foo banna ba Iseraele ba betsega go tswa kwa Misepa mme ba latelela Bafilisitia mme ba nna ba ba kgemetha go ya go fitlha fela kwa borwa jwa Bethe-kare.
12 Foo Samuele a tsaya leje+ a le tlhoma fa gare ga Misepa le Jeshana mme a le raya leina a re Ebenesere. Ka jalo a re: “Jehofa o re thusitse go fitlha jaanong.”+
13 Ka jalo Bafilisitia ba ne ba fenngwa, mme ba se ka ba tlhola ba tsena gape mo karolong ya naga ya Iseraele;+ mme seatla sa ga Jehofa sa tswelela se le kgatlhanong le Bafilisitia malatsi otlhe a ga Samuele.+
14 Mme metse e Bafilisitia ba neng ba e tsere mo go Iseraele ya nna ya boela kwa go Iseraele go tswa kwa Ekerone go ya kwa Gathe, mme karolo ya bone ya naga Iseraele a e golola mo seatleng sa Bafilisitia.
Mme ga nna kagiso fa gare ga Iseraele le Baamore.+
15 Mme Samuele a nna moatlhodi wa Iseraele malatsi otlhe a botshelo jwa gagwe.+
16 Mme a tsamaya ngwaga le ngwaga a kopanya potologo ya Bethele le Gilegala+ le Misepa+ mme a atlhola Iseraele+ mo mafelong ano otlhe.
17 Mme o ne a boela kwa Rama,+ ka gonne ke gone kwa ntlo ya gagwe e neng e le gone, a ba a atlhola Iseraele gone. Mme a agela Jehofa+ sebeso gone.
