2 Dikgosi 22:1-20
22 Josia+ o ne a na le dingwaga di le robedi fa a simolola go busa, mme a busa mo Jerusalema dingwaga di le masome a mararo le bongwe. Mme leina la ga mmaagwe e ne e le Jedida morwadia Adaia go tswa kwa Bosekathe.
2 Mme a dira se se siameng mo matlhong a ga Jehofa+ le go tsamaya mo tseleng yotlhe ya ga Dafide rraagwemogologolwane,+ mme a se ka a fapogela kafa mojeng kgotsa kafa molemeng.+
3 Mme ga diragala mo ngwageng wa bolesome le borobedi wa ga Kgosi Josia gore kgosi e rome Shafane+ morwa Asalia morwa Meshulame mokwaledi kwa ntlong ya ga Jehofa, a re:
4 “Tlhatlogela kwa go Hilekia+ moperesiti yo mogolo+ mme mma a phuthe madi+ a a tlisiwang mo ntlong ya ga Jehofa+ a balebedi ba kgoro ba a phuthileng+ mo bathong;
5 mme mma ba a tsenye mo seatleng sa ba ba dirang tiro,+ ba ba tlhomilweng, mo ntlong ya ga Jehofa, gore ba tle ba a neye ba ba dirang tiro ba ba mo ntlong ya ga Jehofa gore ba baakanye mathubego a ntlo,+
6 ba a neye badiri ba ba ditswerere le baagi le ba ba agang ka leje, le go reka dikota le maje a a betlilweng gore ba baakanye ntlo.+
7 Mme go se ka ga balwa madi a ba a tshotseng a a tsenngwang mo seatleng sa bone,+ gonne ba dira ka boikanyegi.”+
8 Moragonyana Hilekia+ moperesiti yo mogolo a raya Shafane+ mokwaledi+ a re: “Ke fitlhetse buka ya molao+ mo ntlong ya ga Jehofa.” Ka jalo Hilekia a naya Shafane buka, mme a simolola go e bala.
9 Go tswa foo Shafane mokwaledi a tsena kwa kgosing mme a fetola kgosi a re: “Batlhanka ba gago ba tsholotse madi a a fitlhetsweng mo ntlong mme ba nna ba a tsenya mo seatleng sa badiri ba tiro, ba ba tlhomilweng, mo ntlong ya ga Jehofa.”+
10 Mme Shafane mokwaledi a tswelela go bolelela kgosi a re: “Go na le buka+ e moperesiti Hilekia a e nneileng.” Shafane a simolola go e bala fa pele ga kgosi.
11 Mme ga diragala ya re fela fa kgosi e sena go utlwa mafoko a buka ya molao, ka yone nako eo ya gagoganya+ diaparo tsa yone.
12 Go tswa foo kgosi ya laela moperesiti Hilekia le Ahikame+ morwa Shafane le Akabore morwa Mikaia le Shafane mokwaledi le Asaia+ motlhanka wa kgosi, ya re:
13 “Tsamayang, lo ye go botsa+ Jehofa mo boemong jwa me le mo boemong jwa batho le mo boemong jwa Juda yotlhe ka mafoko a buka eno e e bonweng; gonne tšararego ya ga Jehofa e e re tukelang+ e kgolo ka ntlha ya gore borraaronamogologolwane+ ga ba a ka ba reetsa mafoko a buka eno ka go dira go ya ka sotlhe se se kwadilweng ka rona.”+
14 Ka jalo moperesiti Hilekia le Ahikame le Akabore le Shafane le Asaia ba ya kwa moporofeting+ wa mosadi Huleda e leng mosadi wa ga Shalume morwa Tikefa morwa Harahase, motlhokomedi wa diaparo,+ jaaka a ne a nna mo Jerusalema mo karolong ya bobedi ya motse; mme ba bua le ene.+
15 Foo a ba raya a re: “Jehofa Modimo wa Iseraele o buile jaana,+ ‘Bolelelang monna yo o lo romileng kwa go nna lo re:
16 “Jehofa o buile jaana, ‘Bona, ke tlisa masetlapelo+ mo lefelong leno le mo banning+ ba lone, le e leng mafoko otlhe+ a buka a kgosi ya Juda e a badileng;+
17 ka lebaka la gore ba ntlogetse mme ba ile go kuisetsa medimo e mengwe+ mosi wa setlhabelo gore ba nkgopise ka tiro yotlhe ya diatla tsa bone,+ mme tšararego ya me e tuketse lefelo leno mme ga e na go tingwa.’”’+
18 Mme fa e le kgosi ya Juda e e lo romang go ya go botsa Jehofa, lo e reye lo re, ‘Jehofa Modimo wa Iseraele o buile jaana: “Fa e le mafoko a o a utlwileng,+
19 ka lebaka la gore pelo+ ya gago e ne e le bonolo mo o neng wa ikokobetsa+ ka ntlha ya ga Jehofa fa o utlwa se ke se buileng kgatlhanong le lefelo leno le banni ba lone gore le tla nna selo sa go akabalelwa le phutso,+ mme wa gagoganya+ diaparo tsa gago wa simolola go lela fa pele ga me, nna, ee nna ke utlwile,” go bua Jehofa.+
20 “Ke gone ka moo ke go phuthelang+ kwa go borragomogologolwane, mme ruri o tla phuthelwa kwa phupung ya gago ka kagiso,+ mme matlho a gago ga a na go bona masetlapelo otlhe a ke a tlisetsang lefelo leno.”’” Mme ba tlisetsa kgosi phetolo.
