2 Dikgosi 24:1-20
24 Mo metlheng ya gagwe Nebukadenesare+ kgosi ya Babelona a tla, ka jalo Jehoiakime a nna motlhanka wa gagwe+ dingwaga di le tharo. Le fa go ntse jalo, a boela morago mme a mo tsuologela.
2 Mme Jehofa a simolola go romela ditlhopha tsa dirukutlhi tsa Bakaladia+ kgatlhanong le ene le ditlhopha tsa dirukutlhi tsa Basiria le ditlhopha tsa dirukutlhi tsa Bamoabe+ le ditlhopha tsa dirukutlhi tsa bomorwa Amona, mme a nna a di romela kgatlhanong le Juda gore a e senye, go ya ka lefoko la ga Jehofa+ le a neng a le buile ka batlhanka ba gagwe baporofeti.
3 E ne e le fela ka taelo ya ga Jehofa gore go bo go diragetse kgatlhanong le Juda, go e tlosa+ mo ponong ya gagwe ka ntlha ya maleo a ga Manase,+ go ya ka sotlhe se a neng a se dirile;
4 gape ka ntlha ya madi a a se nang molato+ a a neng a a tsholotse, gore a tlatse Jerusalema ka madi a a se nang molato, mme Jehofa a se ka a dumela go itshwarela.+
5 Fa e le ditiragalo tse dingwe tsotlhe tsa ga Jehoiakime+ le sotlhe se a se dirileng, a ga di a kwalwa mo bukeng+ ya ditiragalo tsa metlha ya dikgosi tsa Juda?
6 La bofelo Jehoiakime a lala le borraagwemogologolwane,+ mme Jehoiakine morwawe a simolola go busa mo boemong jwa gagwe.
7 Mme kgosi ya Egepeto ga e ise e tlhole e tswa gape+ kwa lefatsheng la yone,+ gonne kgosi ya Babelona e ne e tsere gotlhe mo e neng e le ga kgosi ya Egepeto+ go simolola kwa mokgatšheng+ o o phothoselang wa Egepeto go ya go fitlha kwa nokeng ya Euferatese.+
8 Jehoiakine+ o ne a na le dingwaga di le lesome le borobedi fa a simolola go busa, mme a busa ka dikgwedi di le tharo mo Jerusalema.+ Mme leina la ga mmaagwe e ne e le Nehusheta morwadia Elenathane wa kwa Jerusalema.
9 Mme a tswelela go dira se se bosula mo matlhong a ga Jehofa, go ya ka sotlhe se rraagwe a neng a se dirile.+
10 Mo nakong eo batlhanka ba ga Nebukadenesare kgosi ya Babelona ba tla mo Jerusalema, mme motse oo wa dikanyediwa.+
11 Nebukadenesare kgosi ya Babelona a tsogologela motse oo, fa batlhanka ba gagwe ba ne ba o dikanyeditse.+
12 Kgabagare Jehoiakine kgosi ya Juda a tswela kwa kgosing ya Babelona,+ ene le mmaagwe+ le batlhanka ba gagwe le dikgosana tsa gagwe le badiredi ba gagwe ba ntlo ya kgosi; mme kgosi ya Babelona ya mo tsaya mo ngwageng wa gagwe wa borobedi+ e le kgosi.
13 Go tswa foo a ntsha matlotlo otlhe a ntlo ya ga Jehofa le matlotlo a ntlo ya kgosi+ koo, mme a kgaola dilwana tsotlhe tsa gouta+ dikarolwana tse Solomone kgosi ya Iseraele a neng a di dirile mo tempeleng ya ga Jehofa, fela jaaka Jehofa a ne a buile.
14 Mme a isa Jerusalema yotlhe botshwarwa+ le dikgosana+ tsotlhe le banna botlhe ba ba pelokgale ba ba thata+—o ne a isa ba le dikete di le lesome botshwarwa—le modiri mongwe le mongwe yo o setswerere+ le moagi wa dithako tsa phemelo. Ga go na ope yo o neng a tlogetswe kwa morago kwantle ga setlhopha sa batho ba maemo a a kwa tlase+ ba lefatshe leo.
15 Ka jalo a isa Jehoiakine+ botshwarwa kwa Babelona;+ le mmaagwe kgosi+ le basadi ba kgosi le badiredi ba gagwe+ ba ntlo ya kgosi le banna ba ba kwa pelepele ba lefatshe leo a ba goga jaaka batho ba ba yang botshwarwa go tswa kwa Jerusalema go ya Babelona.
16 Fa e le banna botlhe ba ba pelokgale, ba le dikete di le supa, le badiri ba ba ditswerere le baagi ba dithako tsa phemelo, ba le sekete, banna botlhe ba ba thata ba e leng ba ntwa, kgosi ya Babelona ya ba isa kwa Babelona+ jaaka batho ba ba isitsweng botshwarwa.
17 Mo godimo ga moo, kgosi ya Babelona+ ya dira Matania morwarraagwe rraagwe+ kgosi mo boemong jwa gagwe. Mme a fetola leina la gagwe go nna Sedekia.+
18 Sedekia+ o ne a na le dingwaga di le masome a mabedi le bongwe fa a simolola go busa, mme a busa ka dingwaga di le lesome le bongwe mo Jerusalema. Mme leina la ga mmaagwe e ne e le Hamutale+ morwadia Jeremia go tswa Libena.
19 Mme a tswelela go dira se se bosula mo matlhong a ga Jehofa, go ya ka sotlhe se Jehoiakime a neng a se dirile.+
20 Gonne ka ntlha ya bogale+ jwa ga Jehofa go ne ga diragala mo Jerusalema le mo Juda, go fitlha a ba tlositse mo ponong ya gagwe.+ Mme Sedekia a simolola go tsuologela kgosi ya Babelona.+
