2 Dikgosi 25:1-30
25 Mme ga diragala gore mo ngwageng wa gagwe wa borobongwe+ e le kgosi, mo kgweding ya bolesome, mo letsatsing la bolesome+ la kgwedi, Nebukadenesare+ kgosi ya Babelona a tla,+ ee, ene le mophato wa gagwe otlhe wa sesole, a tsogologela Jerusalema mme a simolola go thibelela kgatlhanong le yone le go aga lobota lo lo dikanyetsang gotlhe fela.+
2 Mme motse wa dikanyediwa go fitlha ka ngwaga wa bolesome le bongwe wa ga Kgosi Sedekia.
3 Mo letsatsing la borobongwe+ la kgwedi ya bonè leuba+ le ne le le botlhoko mo motseng, mme batho ba lefatshe leo ba ne ba se na senkgwe.+
4 Mme motse wa bulwa phatlha,+ mme banna botlhe ba ntwa ba tshaba go le bosigo ka tsela ya kgoro e e fa gare ga lobota lo lo gabedi lo lo fa tshingwaneng ya kgosi,+ fa Bakaladia+ bone ba ne ba dikologile motse otlhe; mme kgosi ya simolola go ela+ ntlheng ya Areba.
5 Mme mophato wa sesole wa Bakaladia+ wa lelekisa kgosi, mme wa e tshwara+ fa dipoeng tsa sekaka tsa Jeriko;+ mme mophato wa yone otlhe wa sesole o ne o gasame o dule fa thoko ga yone.
6 Go tswa foo wa tshwara kgosi+ wa e tlisa kwa kgosing ya Babelona kwa Ribela,+ gore o tle o bolele tshwetso ya boatlhodi mo go yone.
7 Ba bolaya bomorwa Sedekia setlhogo fa pele ga matlho a gagwe+, mme a foufatsa+ matlho a ga Sedekia, morago ga moo a mmofa ka mehiri ya kgotlho+ a mo tlisa mo Babelona.+
8 Mme mo kgweding ya botlhano mo letsatsing la bosupa la kgwedi, ke go re, mo ngwageng wa bolesome le borobongwe+ wa ga Kgosi Nebukadenesare kgosi ya Babelona, Nebusaradane+ molaodi wa bafemedi, motlhanka wa kgosi ya Babelona, a tla mo Jerusalema.+
9 Mme a fisa ntlo ya ga Jehofa+ le ntlo ya kgosi+ le matlo otlhe a Jerusalema;+ le ntlo ya motho mongwe le mongwe yo mogolo a e fisa ka molelo.+
10 Mme mophato otlhe wa sesole wa Bakaladia o o neng o na le molaodi wa bafemedi wa rutla+ dipota tsa Jerusalema gotlhe fela.
11 Mme batho ba bangwe+ botlhe ba ba neng ba setse mo motseng le ba ba o tlogetseng ba ba neng ba ngwegetse kwa kgosing ya Babelona le ba bangwe botlhe ba boidiidi Nebusaradane molaodi wa bafemedi o ne a ba isa botshwarwa.+
12 Mme bangwe ba batho ba maemo a a kwa tlase+ ba lefatshe leo molaodi wa bafemedi a ba tlogela e le babaakanyi ba mofine gape e le badiri ba ba patelediwang go dira tiro e e boima.+
13 Mme dipilara+ tsa kgotlho tse di neng di le mo ntlong ya ga Jehofa, le dikolotsana+ le lewatle la kgotlho+ tse di neng di le mo ntlong ya ga Jehofa, Bakaladia ba di thubaganya mme ba isa kgotlho ya tsone kwa Babelona.+
14 Mme ba tsaya dikane le digarawe le ditimamolelo le dinwelo le dilwana+ tsotlhe tsa kgotlho tse ba neng ba na le go direla ka tsone.
15 Mme molaodi wa bafemedi a tsaya ditsholamolelo le megopo tse e neng e le tsa gouta ya mmatota+ le tse e neng e le tsa selefera ya mmatota.+
16 Fa e le dipilara tse pedi, lewatle le le lengwe le dikolotsana tse Solomone a neng a di diretse ntlo ya ga Jehofa, go ne go se na tsela ya go bolela selekanyo sa bokete jwa kgotlho ya dilwana tseno tsotlhe.+
17 Pilara nngwe le nngwe e ne e le bogodimo jwa dikubita di le lesome le borobedi,+ mme tlhogo ya pilara+ e e neng e le mo godimo ga yone e ne e le ya kgotlho; mme bogodimo jwa tlhogo nngwe le nngwe ya pilara e ne e le dikubita di le tharo; mme letlowa le digaranata+ go dikologa tlhogo ya pilara, yotlhe fela, e ne e le kgotlho; mme pilara ya bobedi e ne e na le tse di tshwanang le tseno di le mo godimo ga letlowa.
18 Mo godimo ga moo, molaodi wa bafemedi o ne a tsaya Seraia+ moperesiti yo mogolo le Sefania+ moperesiti wa bobedi le balebedi ba kgoro+ ba bararo;
19 mme mo motseng a tsaya modiredi wa ntlo ya kgosi a le mongwe yo o neng a na le taolo mo banneng ba ntwa, le banna ba le batlhano mo go ba ba neng ba kgona go tsena kwa kgosing ba ba neng ba fitlhelwa mo motseng; le mokwaledi wa molaodi wa masole, yo o phuthelang batho ba lefatshe leo tirelong ya sesole, le banna ba le masome a marataro mo bathong ba lefatshe leo ba ba neng ba fitlhelwa mo motseng oo;+
20 mme Nebusaradane+ molaodi wa bafemedi a ba tsaya+ a ba isa kwa kgosing ya Babelona kwa Ribela.+
21 Mme kgosi ya Babelona ya ba kgemetha+ ya ba bolaela kwa Ribela kwa lefatsheng la Hamathe.+ Ka jalo Juda a ya botshwarwa a tswa mo lefatsheng la gagwe.+
22 Fa e le batho+ ba ba tlogetsweng mo lefatsheng la Juda, ba Nebukadenesare kgosi ya Babelona a neng a ba tlogetse, a tlhoma Gedalia+ morwa Ahikame+ morwa Shafane,+ go ba okamela.
23 E rile balaodi botlhe ba mephato ya sesole,+ bone le banna ba bone, ba utlwa gore kgosi ya Babelona e ne e tlhomile Gedalia, ka yone nako eo ba tla kwa go Gedalia kwa Misepa,+ ke gore, Ishemaele morwa Nethania le Johanane morwa Karea le Seraia morwa Tanehumethe wa Monetofa le Jaasania morwa Momaakathe, bone le banna ba bone.
24 Go tswa foo Gedalia a ba ikanela+ le banna ba bone a ba raya a re: “Lo se ka lwa boifa go nna batlhanka ba Bakaladia. Nnang mo lefatsheng mme lo direle kgosi ya Babelona, mme dilo di tla lo tsamaela sentle.”+
25 Mme ga diragala ya re ka kgwedi ya bosupa+ Ishemaele+ morwa Nethania morwa Elishama wa losika lwa segosi a tla, a na le banna ba le lesome, mme ba kgemetha Gedalia,+ mo a neng a swa, mmogo le Bajuda le Bakaladia ba ba neng ba na le ene kwa Misepa.+
26 Morago ga moo batho botlhe, go simolola ka yo mmotlana go ya go yo mogolo, le balaodi ba mephato ya sesole ba nanoga ba tsena mo Egepeto;+ gonne ba ne ba boifa ka ntlha ya Bakaladia.+
27 Mme ga diragala mo ngwageng wa bomasome a mararo le bosupa Jehoiakine+ kgosi ya Juda a le kwa botshwarwa, mo kgweding ya bolesome le bobedi, mo letsatsing la bomasome a mabedi le bosupa la kgwedi, gore Efile-merodake+ kgosi ya Babelona, mo ngwageng wa gagwe wa go nna kgosi, a tsholetse tlhogo+ ya ga Jehoiakine kgosi ya Juda go tswa mo ntlong ya kgolegelo;
28 mme a simolola go bua dilo tse di molemo le ene, mme a baya setulo sa gagwe sa bogosi kwa godimo go feta ditulo tsa bogosi tsa dikgosi tse di neng di na le ene kwa Babelona.+
29 Mme a mo apola diaparo tsa gagwe tsa kgolegelo;+ mme a ja senkgwe+ ka metlha fa pele ga gagwe malatsi otlhe a botshelo jwa gagwe.
30 Fa e le kabelo ya gagwe+ yone, o ne a newa kabelo ka metlha e tswa kwa kgosing, letsatsi le letsatsi e le tshwanelo, malatsi otlhe a botshelo jwa gagwe.
