2 Dikgosi 3:1-27
3 Fa e le Jehorame+ morwa Ahabe ene, a nna kgosi ya Iseraele mo Samarea mo ngwageng wa bolesome le borobedi wa ga Jehoshafate kgosi ya Juda, mme a tswelela go busa dingwaga di le lesome le bobedi.
2 Mme a nna a dira se se bosula mo matlhong a ga Jehofa,+ mme e seng jaaka rraagwe+ kgotsa jaaka mmaagwe, mme a tlosa pilara e e boitshepo+ ya ga Baale e rraagwe a neng a e dirile.+
3 Ke fela gore o ne a ngaparela maleo a ga Jeroboame+ morwa Nebate, a a leofisitseng+ Iseraele ka one. Ga a ka a tswa mo go one.
4 Fa e le Mesha+ kgosi ya Moabe ene, a nna motlhokomedi wa dinku, mme a duela kgosi ya Iseraele dikwanyana di le dikete di le lekgolo le dinku tse di sa beolwang tse ditonanyana di le dikete di le lekgolo.
5 Mme ga diragala gore fela fa Ahabe a sena go swa,+ kgosi ya Moabe ya simolola go tlhanogela+ kgosi ya Iseraele.
6 Ka gone Kgosi Jehorame a tswa kwa Samarea mo letsatsing leo mme a phutha+ Iseraele yotlhe.
7 A fetela pele mme a roma kwa go Jehoshafate kgosi ya Juda a re: “Kgosi ya Moabe e ntlhanogetse. A o tla tsamaya le nna go ya go lwa le Moabe?” Foo a re: “Ke tla tsamaya.+ Ke tshwana le wena; batho ba me ba tshwana le batho ba gago;+ dipitse tsa me di tshwana le dipitse tsa gago.”
8 Mme a tswelela a re: “Re tla tlhatloga ka tsela efe?” Ka jalo a re: “Ka tsela ya naga ya Edoma.”+
9 Mme kgosi ya Iseraele le kgosi ya Juda le kgosi ya Edoma+ ba tsamaya, ba nna ba tsamaya malatsi a le supa, mme bothibelelo le diruiwa tse di neng di latela dikgato tsa bone di ne di se na metsi.
10 Kgabagare kgosi ya Iseraele ya re: “A bo e le go tlhoka lesego jang ne go bo Jehofa a biditse dikgosi tseno tse tharo gore a di tsenye mo seatleng sa Moabe!”+
11 Foo Jehoshafate a re:+ “A ga go na moporofeti wa ga Jehofa+ mono? He a re botseng Jehofa ka ene.”+ Ka jalo mongwe wa batlhanka ba kgosi ya Iseraele a araba a re: “Fano go na le Elisha+ morwa Shafate, yo o neng a tshela metsi mo diatleng tsa ga Elija.”+
12 Go tswa foo Jehoshafate a re: “Lefoko la ga Jehofa le na le ene.” Ka jalo kgosi ya Iseraele le Jehoshafate le kgosi ya Edoma ba fologela kwa go ene.
13 Mme Elisha a raya kgosi ya Iseraele a re: “Ke dirang ka wena?+ Ya kwa baporofeting+ ba ga rrago le kwa baporofeting ba ga mmago.” Mme kgosi ya Iseraele ya mo raya ya re: “Nnyaa, gonne Jehofa o biditse dikgosi tseno tse tharo gore a di tsenye mo seatleng sa Moabe.”+
14 Elisha a araba seno a re: “Jaaka Jehofa wa masomosomo yo ke emeng fa pele ga gagwe a tshedile,+ fa e ka bo e se sefatlhego sa ga Jehoshafate kgosi ya Juda se ke se akanyetsang,+ ke ne ke se na go go leba kgotsa go go bona.+
15 Mme jaanong ntlisetsang motshameki wa seletswa sa megala.”+ Mme go ne ga diragala gore, fela fa motshameki wa seletswa sa megala a letsa, seatla+ sa ga Jehofa sa nna mo go ene.
16 Mme a re: “Jehofa o buile jaana, ‘A go dirwe gore mokgatšha o o phothoselang ono o tlale mesele;+
17 gonne Jehofa o buile jaana: “ Ga lo na go bona phefo, gape ga lo na go bona pula e kgolo; mme mokgatšha o o phothoselang o tla tlala metsi,+ mme ruri lo tla nwa mo go one,+ lona le leruo la lona le diruiwa tsa lona.”’
18 Mme seno eleruri e tla nna selo se e seng sa sepe mo matlhong a ga Jehofa,+ mme ruri o tla tsenya Moabe mo seatleng sa lona.+
19 Mme lo kgemethe motse mongwe le mongwe o o sireletsegileng le motse+ mongwe le mongwe o o e gaisang yotlhe, le setlhare sengwe le sengwe se se molemo+ lo se reme,+ le metswedi yotlhe ya metsi lo e katele le sebata sengwe le sengwe se se molemo sa naga lo se senye ka maje.”
20 Mme ga diragala gore mo mosong,+ ka nako ya go isiwa ga tshupelo ya dijo tsa ditlhaka,+ bona! metsi a bo a tswa ntlheng ya Edoma, mme lefatshe le ne la tlala metsi.
21 Fa e le Bamoabe botlhe, ba ne ba utlwa gore dikgosi di ne di tlile go tlhabana le bone. Ka gone ba phutha banna go simolola ka botlhe ba ba neng ba gatlha+ moitlamo le go ya kwa godimo, mme ba ema fa molelwaneng.
22 E rile ba tsoga go sa le phakela, letsatsi la phatsima mo metsing, mo Bamoabe ka kwa letlhakoreng le lengwe ba neng ba bona metsi a le mahibidu jaaka madi.
23 Mme ba re: “Seno ke madi! Ruri dikgosi di bolailwe ka tšhaka, mme tsa kgemethana. Jaanong ya kwa thopong,+ Moabe!”
24 E rile ba tsena mo bothibelelong jwa Iseraele, ka yone nako eo Baiseraele+ ba nanoga mme ba simolola go kgemetha Bamoabe mo ba neng ba tshaba fa pele ga bone.+ Ka gone ba tsena mo Moabe, ba kgemetha Bamoabe fa ba ntse ba tla.
25 Mme ba digela metse fa fatshe,+ gape, fa e le sebata sengwe le sengwe se se molemo sa naga, mongwe le mongwe wa bone o ne a latlhela leje la gagwe mme ba se tlatsa; mme ba katela+ motswedi mongwe le mongwe wa metsi, ba rema+ setlhare sengwe le sengwe se se molemo, go fitlha ba tlogela fela maje a Kire-haresethe+ mo go one; mme ba ba konopang ka motsekedi ba simolola go o dikologa le go o diga.
26 Fa kgosi ya Moabe e bona gore tlhabano e nonofile thata mo go ene, gone fela foo a tsaya banna ba le makgolo a supa ba ba somolang tšhaka gore ba tsenelele kwa kgosing ya Edoma;+ mme ba ne ba sa kgone go dira jalo.
27 La bofelo a tsaya morwawe wa leitibolo yo o neng a tlile go busa mo boemong jwa gagwe a mo isa+ setlhabelo se se fisiwang mo loboteng. Mme ga nna le kgakalo e kgolo kgatlhanong le Iseraele, mo e leng gore ba ne ba tswa fa go ene ba boela kwa lefatsheng la bone.
