2 Dikgosi 7:1-20
7 Jaanong Elisha a re: “Reetsang lefoko la ga Jehofa.+ Jehofa o buile jaana, ‘Ka moso mo e ka nnang ka nako eno selekanyo sa sea sa bupi jo bo boleta se tla bo se ja shekele, mme dilekanyo tse pedi tsa sea tsa barele di tla bo di ja shekele mo kgorong ya Samarea.’”+
2 Foo mothusi wa modiredimogolo wa masole yo kgosi e neng e itshegetsa+ ka seatla sa gagwe a araba monna wa Modimo wa boammaaruri mme a re: “Fa Jehofa a ka bo a dira dikgoro tsa morwalela kwa magodimong,+ a selo seno se ne se ka direga?”+ Foo a re: “Bona, o go iponela ka matlho a gago,+ mme ga o na go go ja.”+
3 Mme go ne go na le banna ba le banè, balepero, ba ba neng ba le fa botsenong jwa kgoro;+ mme ba simolola go raana ba re: “Ke ka ntlha yang fa re ntse fano go fitlha re sule?
4 Fa re ka bo re rile, ‘A re tseneng mo motseng,’ fa leuba le le mo motseng, re ne re tla tshwanelwa ke go swela teng.+ Mme fa re nna fano, gape re tla tshwanelwa ke go swa. Jaanong tlang mme re tlhaseleng bothibelelo jwa Basiria. Fa ba re boloka re tshela, re tla tshela; mme fa ba re bolaya, foo re tla tshwanelwa ke go swa.”+
5 Ka jalo ba nanoga mo lefifing la maitseboa ba tsena mo bothibelelong jwa Basiria; mme ba fitlha kwa melelwaneng ya bothibelelo jwa Basiria, mme bona! go ne go se na ope teng.
6 Mme Jehofa o ne a dirile gore bothibelelo jwa Basiria bo utlwe+ modumo wa dikara tsa ntwa, modumo wa dipitse, modumo wa mophato o mogolo wa sesole,+ mme ba raana ba re: “Bona! Kgosi ya Iseraele e re thapetse dikgosi tsa Bahite+ le dikgosi tsa Egepeto+ gore di re tsogologele!”
7 Ka yone nako eo ba nanoga ba tshaba mo lefifing+ la maitseboa mme ba tlogela megope ya bone le dipitse tsa bone+ le diesele tsa bone—bothibelelo fela jaaka bo ne bo ntse—mme ba nna ba tshabisa moya wa bone.+
8 E rile balepero bano ba fitlha kwa melelwaneng ya bothibelelo, ba ne ba tsena mo mogopeng mongwe mme ba simolola go ja le go nwa ba bo ba tsaya selefera le gouta le diaparo mo go one mme ba tsamaya ba ya go di fitlha. Morago ga moo ba boa ba tsena mo mogopeng o mongwe mme ba tsaya dilo mo go one ba ya go di fitlha.+
9 La bofelo ba simolola go raana ba re: “Se re se dirang ga se a siama. Letsatsi leno ke letsatsi la dikgang tse di molemo!+ Fa re okaoka, mme re ema go fitlha lesedi la moso, molato le one o tla re tshwara.+ Ka jalo tlang mme re tseneng re begeng kwa ntlong ya kgosi.”
10 Mme ba tla ba bitsa balebedi ba kgoro+ ya motse ba ba begela ba re: “Re ne ra tsena mo bothibelelong jwa Basiria, mme bonang! go ne go se na ope teng le fa e le modumo wa motho, fa e se fela dipitse di bofilwe le diesele di bofilwe le megope fela jaaka e ne e ntse.”+
11 Balebedi ba kgoro ba akofa ba tlhaeletsa mme ba bega kwa ntlong ya kgosi mo teng.
12 Ka yone nako eo kgosi ya nanoga bosigo mme ya raya batlhanka+ ba yone ya re: “Tsweetswee, tlang ke lo bolelele se Basiria ba se re dirileng.+ Ba itse sentle gore re tshwerwe ke tlala;+ mme ba tswa mo bothibelelong go ya go iphitlha mo tshimong,+ ba re, ‘Ba tla tswa mo motseng mme re tla ba tshwara ba tshela, mme re tla tsena mo motseng.’”
13 Go tswa foo mongwe wa batlhanka ba yone a araba mme a re: “Tsweetswee mma ba tseye dipitse tse tlhano tse di setseng tse di neng tsa sala mo motseng.+ Bona! Ba tshwana le boidiidi jotlhe jwa Iseraele jo bo setseng mo go one. Bona! Ba tshwana le boidiidi jotlhe jwa Iseraele jo bo nyeletseng.+ Mma re romeleng mme re bone.”
14 Ka jalo ba tsaya dikara di le pedi le dipitse mme kgosi ya ba romela gore ba latelele setlhopha sa Basiria e re: “Tsamayang lo ye go bona.”
15 Foo ba ba sala morago go ya go fitlha kwa Joredane; mme bona! tsela yotlhe e ne e tletse diaparo le dilwana+ tse Basiria ba neng ba di latlhile jaaka ba ne ba itlhaganetse.+ Go tswa foo barongwa ba boa mme ba begela kgosi.
16 Mme batho ba tswa ba ya go gapa+ bothibelelo jwa Basiria; ka jalo selekanyo sa sea sa bupi jo bo boleta sa ja shekele e le nngwe, le dilekanyo tse pedi tsa sea tsa barele tsa ja shekele e le nngwe, go ya ka lefoko+ la ga Jehofa.
17 Mme kgosi ka boyone e ne e tlhomile mothusi wa modiredimogolo wa masole yo e neng e itshegetsa+ ka seatla sa gagwe gore a tlhokomele kgoro; mme batho ba nna ba mo gataka+ fa kgorong, gore a bo a swe, fela jaaka monna wa Modimo wa boammaaruri a ne a buile,+ fa a ne a bua ka nako e kgosi e neng e tlile kwa go ene ka yone.
18 Ka jalo ga diragala fela jaaka monna wa Modimo wa boammaaruri a ne a buile le kgosi, a re: “Ka moso ka nako eno mo kgorong ya Samarea dilekanyo tse pedi tsa sea tsa barele di tla ja shekele le selekanyo sa sea sa bupi jo bo boleta se tla ja shekele ka moso ka nako eno mo kgorong ya Samarea.”+
19 Mme mothusi wa modiredimogolo wa masole a araba monna wa Modimo wa boammaaruri a re: “Le fa Jehofa a ka bo a ne a dira dikgoro tsa morwalela kwa magodimong,+ a go ne go ka direga go ya ka lefoko leno?” Foo a re: “Bona, o go iponela ka matlho a gago, mme ga o na go go ja.”+
20 Ka gone ga mo diragalela jalo,+ fa batho ba ntse ba mo gataka+ fa kgorong, a bo a swa.
