2 Samuele 20:1-26
20 Jaanong go ne go na le monna foo yo o se nang molemo wa sepe,+ yo leina la gagwe e neng e le Sheba,+ morwa Bikeri wa Mobenjamine; mme a letsa lonaka+ a re: “Ga re na seabe sepe mo go Dafide, e bile ga re na boswa bope mo go morwa Jese.+ Mongwe le mongwe a ye medimong+ ya gagwe, wena Iseraele!”
2 Foo banna botlhe ba Iseraele ba simolola go tlhatloga ba se tlhole ba sala Dafide morago mme ba sala Sheba morwa Bikeri+ morago; mme banna ba Juda bone, ba ne ba ngaparela kgosi ya bone go tswa kwa Joredane go ya kwa Jerusalema.+
3 La bofelo Dafide a tla kwa ntlong ya gagwe kwa Jerusalema.+ Mme kgosi ya tsaya basadi ba ba lesome,+ bagadingwana ba e neng e ba tlogetse gore ba tlhokomele ntlo, mme ya ba tsenya mo ntlong ya botswalelo, mme ya nna ya ba tlamela ka dijo. Mme ya se ka ya robala le bone,+ mme ba tswelela ba tswaletswe thata go fitlha ka letsatsi la go swa ga bone, ba le mo botlholagading mme monna a tshela.
4 Jaanong kgosi ya raya Amasa+ ya re: “Phuthela banna ba Juda kwa go nna mo malatsing a le mararo, mme wena o eme fano.”
5 Ka jalo Amasa a ya go phutha Juda; mme a tla morago ga nako e e beilweng e a neng a e mo tlhometse.
6 Foo Dafide a raya Abishai+ a re: “Jaanong Sheba+ morwa Bikeri o tla nna bosula mo go rona go feta Abesalome.+ Wena tsaya batlhanka+ ba morena wa gago o mo lelekise, gore a se ka a iponela metse e e sireletsegileng mme a falola fa pele ga matlho a rona.”
7 Ka jalo banna ba ga Joabe+ le Bakeretha+ le Bapelethe+ le banna botlhe ba ba thata ba tswa ba mo sala morago; mme ba tswa mo Jerusalema go lelekisa Sheba morwa Bikeri.
8 Ba ne ba le gaufi le leje le legolo le le kwa Gibeone, mme Amasa+ ka boene a tla go ba kgatlhantsha. Jaanong Joabe o ne a ikgatlhile, a apere seaparo; mme o ne a gatlhile tšhaka e golegetswe mo nōkeng ya gagwe, e le mo kgatleng ya yone. Ene ka boene o ne a tswa, mme ya wa.
9 Mme Joabe a raya Amasa a re: “A dilo di go tsamaela sentle, morwarre?”+ Foo seatla sa ga Joabe sa moja sa tshwara ditedu tsa ga Amasa gore a mo atle.+
10 Mme Amasa, o ne a sa tlhokomela tšhaka e e neng e le mo seatleng sa ga Joabe; mo o neng a mo tlhaba+ ka yone mo mpeng, mme mala a gagwe a tshologela fa fatshe, mme a se ka a tshwanelwa ke go mo dira jalo gape. Ka jalo a swa. Mme Joabe le Abishai morwarraagwe, ba lelekisa Sheba morwa Bikeri.
11 Mme lengwe la makau a ga Joabe la ema fa go ene mme la nna la re: “Mongwe le mongwe yo o kgatlhilweng ke Joabe le mongwe le mongwe yo e leng wa ga Dafide,+ a a sale Joabe morago!”
12 Mo nakong eno yotlhe Amasa o ne a bidikama mo mading+ mo gare ga tsela e kgolo. Fa monna yono a bona gore batho botlhe ba ne ba ema, foo a fudusa Amasa mo tseleng e kgolo a mo isa kwa nageng. La bofelo a latlhela seaparo mo go ene, ka a bona gore mongwe le mongwe yo o tlang fa go ene o ne a ema.+
13 Fela fa a sena go mo tlosa mo tsela e kgolo, monna mongwe le mongwe o ne a feta a setse Joabe morago a lelekisa Sheba+ morwa Bikeri.
14 Mme Sheba a feta mo ditsong tsotlhe tsa Iseraele a ya kwa Abele wa Bethe-maaka.+ Mme Babikeri botlhe, ba ne ba phuthega mme le bone ba mo sala morago.
15 Mme ba tla ba mo dikanyetsa kwa Abele wa Bethe-maaka mme ba tlhoma lorako lwa phemelo kgatlhanong le motse,+ e re ka o ne o eme mo teng ga lorako lwa phemelo. Mme batho botlhe ba ba neng ba na le Joabe ba ne ba epolola lobota, gore ba lo digele fa fatshe.
16 Mme mosadi mongwe yo o botlhale+ a simolola go bitsa a le kwa motseng: “Reetsang, banna, reetsang! Tsweetswee, rayang Joabe lo re, ‘Atamela o tle go fitlha fano, o mme ke bue le wena.’”
17 Ka jalo a atamela fa go ene, mme mosadi a re: “A o Joabe?” mme ene a re: “Ee ke nna.” Foo a mo raya a re: “Reetsa mafoko a lelata la gago.”+ Mme ene a re: “Ke reeditse.”
18 Mme a tswelela a re: “Ruri ba ne ba tle ba bue jaana mo metlheng ya pele, ba re, ‘A ba botse kwa Abele, mme foo ruri ba tla khutlisa kgang.’
19 Ke emetse ba ba ratang kagiso+ le ba ba ikanyegang+ ba Iseraele. O batla go bolaya motse+ le mmè mo Iseraele. O komeletsang+ boswa+ jwa ga Jehofa?”
20 Foo Joabe a araba a re: “Ruri go ka se direge ka nna gore ke kometse le gore ke senye.
21 Kgang ga e a nna jalo, mme monna mongwe go tswa kwa kgaolong e e dithaba ya Eferaime,+ yo leina la gagwe e leng Sheba+ morwa Bikeri, o tsholeleditse Kgosi Dafide+ seatla. Lona, mo re neeleng a le nosi,+ mme ke tla tloga mo motseng.”+ Mme mosadi a raya Joabe a re: “Bona! O tla latlhelelwa tlhogo+ ya gagwe kwa godimo ga lobota!”
22 Mosadi a akofa a ya kwa bathong botlhe ka botlhale+ jwa gagwe, mme ba kgaola tlhogo ya ga Sheba morwa Bikeri ba e latlhelela Joabe. Go tswa foo a letsa lonaka,+ mme ba gasama ba tswa mo motseng, mongwe le mongwe a ya kwa legaeng la gagwe; mme Joabe ka boene a boela kwa Jerusalema kwa kgosing.
23 Mme Joabe o ne a okametse masole otlhe+ a Iseraele; mme Benaia+ morwa Jehoiada+ o ne a okametse Bakeretha+ le Bapelethe.+
24 Adorame+ o ne a okametse ba ba patelediwang go tsenela tiro e e boima; mme Jehoshafate+ morwa Ahilude e ne e le mokwadi.
25 Shefa+ e ne e le mokwaledi,+ mme Sadoke+ le Abiathare+ e le baperesiti.
26 Mme Ira wa Mojaire le ene a nna moperesiti+ wa ga Dafide.
