Amose 5:1-27
5 “Utlwang lefoko leno le ke le buang le lona jaaka pina ya khutsafalo,+ lona ntlo ya Iseraele:
2 “Iseraele kgarebane,+ o wele;+Ga a ka ke a tsoga gape.+O tlogetswe mo mmung wa gagwe;Ga go na ope yo o mo emisang.+
3 “Gonne Morena Molaodimogolo Jehofa o buile jaana, ‘One motse o o neng o bolola ka sekete o tla salelwa ke lekgolo; mme o o bololang ka lekgolo o tla salelwa ke lesome, ke se se tla diragalelang ntlo ya Iseraele.’+
4 “Gonne seno ke se Jehofa a se reileng ntlo ya Iseraele, ‘Mpatlang,+ mme lo nne lo tshele.+
5 Mme lo se ka lwa batla Bethele,+ e bile lo se ka lwa tla mo Gilegala,+ le gone lo se ka lwa fetela kwa Beere-sheba;+ ka gonne Gilegala ka boene ruri o tla ya botshwarwa;+ mme fa e le Bethele ene, o tla nna sengwe se e leng masaitseweng.+
6 Batlang Jehofa, mme lo nne lo tshele,+ gore a se ka a dira fela jaaka molelo,+ wena ntlo ya ga Josefa,+ le gore o tle o se ka wa laila, mme Bethele a tlhoka yo o ka o timang,+
7 lona ba lo fetolang tshiamiso lo e dira longana fela,+ le ba ba latlhetseng tshiamo fa fatshe.+
8 Modiri wa lesomo la dinaledi la Khima+ le lesomo la dinaledi+ la Kesile,+ le Ene yo o fetolang moriti o montsho+ a o dira moso, le Ene yo o dirileng motshegare ka boone gore o nne lefifi jaaka bosigo,+ Ene yo o bitsang metsi a lewatle, gore a tle a a tshololele mo godimo ga lefatshe+—Jehofa ke leina la gagwe;+
9 ene yo o dirang gore thopo e phatsimele motho yo o nonofileng, gore thopo ka boyone e tle e tlele le eleng lefelo le le sireleditsweng.
10 “‘Ba ne ba tlhoa mokgalemi fa kgorong,+ e bile ba ila yo o buang dilo tse di itekanetseng.+
11 Ka jalo, ka lebaka la go bo lo tsaya madi a khiro ya masimo ka dikgoka mo mothong wa maemo a a kwa tlase, le go nna lo tsaya tuelo ya dijo tsa ditlhaka mo go ene;+ lo agile matlo a leje le le betlilweng,+ mme ga lo kitla lo tswelela lo nna mo go one; e bile lo jadile masimo a a eletsegang a mofine, mme ga lo kitla lo tswelela lo nwa beine ya one.+
12 Gonne ke itsile kafa ditlhanogo tsa lona di leng dintsi+ ka gone le kafa maleo a lona a leng thata ka gone,+ lona ba lo leng bobaba mo mothong yo o siameng,+ lona ba lo amogelang madi a pipamolomo,+ le ba lo sa amogelang batho ba ba humanegileng+ le eleng kwa kgorong.+
13 Ka jalo ene yo o nang le temogo o tla didimala ka nako eo, ka gonne e tla bo e le nako ya masetlapelo.+
14 “‘Batlang se se molemo, mme e seng se se bosula,+ gore lo nne lo tshele;+ le gore ka go dira jalo Jehofa Modimo wa masomosomo a tle a nne le lona, fela jaaka lo buile.+
15 Tlhoang se se bosula, mme lo rate se se molemo,+ mme lo tlogelele tshiamiso sebaka fa kgorong.+ E ka tla ya re gongwe Jehofa Modimo wa masomosomo a utlwela botlhoko+ ba ba setseng ba ga Josefa.’+
16 “Ka jalo seno ke se Jehofa Modimo wa masomosomo, Jehofa, a se buileng, ‘Go tla kuruediwa mo dipatlelong tsotlhe,+ mme mo mebileng yotlhe batho ba tla bo ba re: “Ah! Ah!” Mme ba tla dira gore molemirui a hutsafale,+ le ba ba tlwaetseng go lela selelo sa khutsafalo ba kuruetse.’+
17 ‘Mme mo masimong otlhe a mofine, go tla bo go kuruediwa;+ gonne ke tla feta fa gare ga lona,’+ go buile Jehofa.
18 “‘A bo go latlhega bone ba ba eletsang letsatsi la ga Jehofa!+ Letsatsi la ga Jehofa le tla kaya eng mo go lona?+ Go tla bo go le lefifi, go se na lesedi,+
19 fela jaaka fa motho a tshaba ka ntlha ya tau, mme a bo a kopana le bera; le jaaka fa a tsena mo teng ga ntlo a bo a tshegetsa seatla sa gagwe mo loboteng, mme noga e bo e mo loma.+
20 A letsatsi la ga Jehofa ga le kitla le nna lefifi, e seng lesedi; mme a ga le kitla le nna le letobo, e seng phatsimo?+
21 Ke tlhoile meletlo ya lona, ke e ganne,+ e bile ga nkitla ke ipelela lonko lwa dikopano tsa lona tse di masisi.+
22 Mme fa lo nkisetsa ditshupelo tse di fisiwang di feletse,+ le ditshupelo tsa lona tsa mpho ga nkitla ke di ipelela,+ e bile ga nkitla ke leba ditlhabelo tsa lona tsa kabalano tsa diphologotswana tse di nontshitsweng.+
23 Tlosang pheretlhego ya dipina tsa lona mo go nna; le modumo o o molodi wa diletswa tsa lona tsa megala mma ke se ka ka o utlwa.+
24 Mme a tshiamiso e phothosele fela jaaka metsi,+ le tshiamo jaaka molatswana o o phothoselang, o o elelang ka metlha.+
25 A e ne e le ditlhabelo le ditshupelo tsa mpho tse lo neng lo di atametsa fa go nna ka dingwaga di le masome a manè kwa nageng, lona ntlo ya Iseraele?+
26 Mme ruri lo tla tshola Sakuthe kgosi ya lona+ le Kewane, ditshwantsho tsa lona, naledi ya modimo wa lona, o lo o itiretseng.+
27 Mme ke tla dira gore lo ye botshwarwa ka kwa ga Damaseko,’+ go buile ene yo leina la gagwe e leng Jehofa Modimo wa masomosomo.”+
