Diane 21:1-31
21 Pelo ya kgosi e ntse jaaka melatswana ya metsi mo seatleng sa ga Jehofa.+ O e faposetsa gongwe le gongwe kwa a ratang teng.+
2 Tsela nngwe le nngwe ya motho e thokgame mo matlhong a gagwe,+ mme Jehofa o tlhatlhoba dipelo.+
3 Go dira tshiamo le katlholo go ratega bogolo mo go Jehofa go na le setlhabelo.+
4 Matlho a a mabela le pelo e e ikgodisang,+ lobone lwa baikepi, ke boleo.+
5 Dithulaganyo tsa yo o tlhoafetseng ruri di solegela molemo,+ mme mongwe le mongwe yo o mafega ruri o leba kwa letlhokong.+
6 Go bona matlotlo ka loleme lwa maaka ke moya o o hemelwang kwa ntle o o phailegelang koo,+ mo go ba ba senkang loso.+
7 Go thopa ga baikepi go tla ba gogela kgakala,+ gonne ba ganne go dira tshiamiso.+
8 Motho, le eleng motswakwa, o sokame mo tseleng ya gagwe;+ mme yo o itshekileng o thokgame mo tirong ya gagwe.+
9 Go botoka go nna mo sekhutlong sa borulelo+ go na le go nna le mosadi yo o ratang manganga, le fa e le mo ntlong e le nngwe fela.+
10 Moya wa moikepi o eleditse se se bosula;+ mongwe ka ene ga a na go bontshiwa kutlwelobotlhoko mo matlhong a gagwe.+
11 Ka go lefisa mosotli, yo o se nang maitemogelo o nna botlhale;+ mme motho o bona kitso ka go naya yo o botlhale temogo.+
12 Mosiami o akanyetsa ntlo ya moikepi,+ a phetsolela baikepi mo masetlapelong a bone.+
13 Fa e le ope fela yo o thibang tsebe ya gagwe gore e se ka ya utlwa go goa ka go ngongorega ga motho wa maemo a a kwa tlase,+ le ene o tla bitsa mme ga a na go arabiwa.+
14 Mpho e e dirwang mo sephiring e fenya bogale;+ mme pipamolomo mo sehubeng,+ e fenya tšararego e e nonofileng.
15 Ke boipelo mo mosiaming gore a dire tshiamiso,+ mme go na le selo se se boifisang mo go ba ba dirang dilo tse di utlwisang botlhoko.+
16 Fa e le motho yo o fapogang mo tseleng ya temogo,+ o tla ikhutsa mo phuthegong ya ba ba se nang maatla mo losong.+
17 Yo o ratang go ijesa menate e tla nna motho yo o tlhokang;+ yo o ratang beine le leokwane ga a na go nna le dikhumo.+
18 Moikepi ke thekololo ya mosiami;+ mme yo o dirang ka boferefere o tsaya boemo jwa bathokgami.+
19 Go botoka go nna mo nageng go na le go nna le mosadi yo o ratang manganga e bile o tshwenyega.+
20 Letlotlo le le eletsegang le leokwane di mo bonnong jwa yo o botlhale,+ mme motho yo o sematla o tla le kometsa.+
21 Yo o latelelang tshiamo le bopelonomi jwa lorato+ o tla bona botshelo, tshiamo le kgalalelo.+
22 Yo o botlhale o palameletse motse wa batho ba ba thata, gore a tle a dige nonofo ya tshepo ya one.+
23 Yo o thibang molomo wa gagwe le loleme lwa gagwe o thiba moya wa gagwe mo matshwenyegong.+
24 Moikgodisi, moipegi wa moikgantshi ke leina la yo o dirang ka tšhakgalo ya boikgodiso.+
25 Keletso ya setshwakga e tla se bolaya, gonne diatla tsa sone di ganne go dira.+
26 O itshupile a eletsa ka go fela pelo letsatsi lotlhe, mme mosiami o a aba, ga a gane ka sepe.+
27 Setlhabelo sa baikepi ke selo se se makgapha.+ Jaanong go tweng fa motho a se tlisa a na le boitshwaro jo bo repileng.+
28 Mosupi yo o akang o tla nyelela,+ mme motho yo o reeditseng o tla bua ka bosaengkae.+
29 Motho yo o boikepo o beta pelo,+ mme mothokgami ke yo o tla tlhomamisang ditsela tsa gagwe ka thata.+
30 Ga go na botlhale, le fa e le temogo epe, le fa e le boikaelelo bope kgatlhanong le Jehofa.+
31 Pitse ke selo se se baakanyediwang letsatsi la tlhabano,+ mme poloko ke ya ga Jehofa.+
