Diane 25:1-28
25 Le tseno ke diane tsa ga Solomone+ tse di kwalolotsweng ke banna ba ga Hesekia kgosi ya Juda:+
2 Kgalalelo ya Modimo ke go boloka kgang e le sephiri,+ mme kgalalelo ya dikgosi ke go hukutsa kgang.+
3 Bogodimo jwa magodimo+ le boteng jwa lefatshe,+ le pelo ya dikgosi, ga di hukutsege.+
4 A go tlosiwe manyelo mo selefereng, mme yotlhe e tla tswa e itshekisitswe.+
5 A yo o boikepo a tlosiwe fa pele ga kgosi,+ mme setulo sa gagwe sa bogosi se tla tlhomamisiwa thata ka tshiamo.+
6 O se ka wa itlotla fa pele ga kgosi,+ mme o se ka wa ema mo lefelong la ba bagolo.+
7 Gonne go botoka gore a go reye a re: “Tlhatlogela kwano,”+ go na le go go kokobetsa fa pele ga motlotlegi yo matlho a gago a mmoneng.+
8 O se ka wa potlakela go ya go sekaseka kgetsi ya molao, gore e se ka ya nna kgang ya gore o tla dirang kwa konelong ya yone fa mongwe ka wena jaanong a go tlhabisa ditlhong.+
9 Seka kgang ya gago le mongwe ka wena,+ mme o se ka wa senola puo ya sephiri ya yo mongwe;+
10 gore yo o reeditseng a se ka a go tlhabisa ditlhong mme pego e e bosula ka wena e se ka ya gakologelwa.
11 Lefoko le le builweng ka nako e e le tshwanetseng le tshwana le diapole tsa gouta mo dilong tse di setilweng tsa selefera.+
12 Mokgalemi yo o botlhale ke lenyena la gouta, mokgabisa wa gouta e e kgethegileng, mo tsebeng e e utlwang.+
13 Morongwa yo o ikanyegang o tshwana le botsiditsana jwa kapoko+ mo letsatsing la thobo mo go ba ba mo romang, gonne o tsosolosa moya wa beng ba gagwe.+
14 Motho yo o ipelafatsang ka mpho mo maakeng o tshwana fela le maru a a tletseng mouwane le phefo go se na pula.+
15 Molaodi o kgonwa ka bopelotelele, mme loleme lo lo bonolo lo ka roba lerapo.+
16 A o bone tswina ya dinotshe?+ Ja e e go lekaneng, gore o se ka wa ja e ntsi mme wa tla wa tshwanelwa ke go e tlhatsa.+
17 Dira gore lonao lwa gago lo ye ka sewelo kwa ntlong ya mongwe ka wena, gore a tle a se ka a go kgora mme a go tlhoa.
18 Motho yo o neelang bosupi ka mongwe ka ene jaaka mosupi wa maaka o tshwana le molamu wa ntwa le tšhaka le motswi o o looditsweng.+
19 Motho yo o itshupang a le leferefere mo letsatsing la matshwenyego o tshwana le leino le le robegileng le lonao lo lo kgwetlhang.+
20 Yo o tlosang seaparo mo letsatsing le le tsididi o tshwana le botšarara mo alekaleng le jaaka moopedi ka dipina mo pelong e e tlhonameng.+
21 Fa yo o go tlhoileng a tshwerwe ke tlala, mo neye senkgwe a je; fa a nyorilwe, mo neye metsi a nwe.+
22 Gonne o gogobela magala mo tlhogong ya gagwe,+ mme Jehofa o tla go duela.+
23 Phefo ya bokone e ntsha pula e kgolo jaaka e kete ke ka ditlhabi tsa pelegi;+ mme loleme lo lo ntshang sephiri, ke sefatlhego se se atlhotsweng.+
24 Go botoka go nna mo sekhutlong sa borulelo go na le go nna le mosadi yo o ratang manganga, le fa e le mo ntlong e le nngwe fela.+
25 Pego e e molemo e e tswang kwa nageng e e kgakala,+ e tshwana le metsi a a tsididi mo moyeng o o lapileng.+
26 Mosiami ke motswedi o o leswe le sediba se se senyegileng fa a kgokgweetsega fa pele ga moikepi.+
27 Go ja tswina e ntsi ya dinotshe ga go a siama;+ mme a ke kgalalelo gore batho ba ipatlele kgalalelo ya bone?+
28 Motho yo o sa thibeng moya wa gagwe, o tshwana le motse o o thubilweng, o o se nang lobota.+
