Dikhutsafalo 3:1-66
א [ʼAʹleph]
3 Ke nna monna yo o nonofileng yo o boneng pogisego+ ka ntlha ya lore lwa tšhakgalo ya gagwe.
2 Ke nna yo a nkgogileng a ba a ntira gore ke tsamaye mo lefifing e seng mo leseding.+
3 Eleruri, o fetola seatla sa gagwe kgatlhanong le nna kgapetsakgapetsa letsatsi lotlhe.+
ב [Behth]
4 O dirile gore nama ya me le letlalo la me di onale.+ O robagantse marapo a me.+
5 O agile kgatlhanong le nna, gore a tle a ntikanyetse+ ka semela se se botlhole+ le ka bothata.
6 O ntirile gore ke nne mo mafelong a a lefifi+ jaaka batho ba ba suleng nako e telele.+
ג [Giʹmel]
7 O nthibetse jaaka e kete ka lobota lwa leje, gore ke se ka ka tsamaya.+ O dirile mehiri ya me ya kgotlho+ boima.
8 Gape, fa ke ikuela gore ke thusiwe e bile ke goa ke kopa thuso, o kgoreletsa thapelo ya me.+
9 O thibile ditsela tsa me ka leje le le betlilweng.+ O sokile ditsela tsa me.+
ד [Daʹleth]
10 Mo go nna o ntse jaaka bera e e laletseng,+ jaaka tau e e mo mafelong a go iphitlha.+
11 O tlhakatlhakantse ditsela tsa me, e bile o dira gore ke nne jaaka legola fela. O ntirile yo o kgakgabetseng.+
12 O gatile bora+ jwa gagwe, mme o ntlhoma jaaka sekonopiwa sa motswi.+
ה [Heʼ]
13 O tsentse barwa ba mokotlopo wa gagwe mo teng ga diphilo tsa me.+
14 Ke dule setshego+ mo bathong botlhe ba ba kgatlhanong le nna, le setlhogo sa pina ya bone letsatsi lotlhe.+
15 O mphile dilo tse di bogalaka+ tse di lekaneng. O ntladitse ka longana.+
ו [Waw]
16 Mme o dira gore meno a me a rojwe ke matlapana.+ O dirile gore ke kotlomane mo meloreng.+
17 Le wena o a latlha gore moya wa me o se ka wa nna le kagiso. Ke lebetse gore molemo ke eng.+
18 Mme ke nna ke re: “Tlotlomalo ya me e nyeletse, le tebelelo ya me mo go Jehofa.”+
ז [Zaʹyin]
19 Gakologelwa pogisego ya me le go tlhoka ga me legae,+ longana le semela se se botlhole.+
20 Ruri moya wa gago o tla gakologelwa o bo o obega ka ntlha ya me.+
21 Seno ke sone se ke tla se busetsang mo pelong ya me.+ Ke gone ka moo ke tla bontshang boikutlo jwa go leta.+
ח [Chehth]
22 Ke ditiro tsa bopelonomi jwa lorato+ tsa ga Jehofa, go bo re sa fela,+ ka gonne mautlwelobotlhoko a gagwe ruri ga a na go khutla.+
23 A masha moso mongwe le mongwe.+ Boikanyegi jwa gago bo bogolo.+
24 “Jehofa ke kabelo ya me,”+ go buile moya wa me, “ke gone ka moo ke tla bontshang boikutlo jwa go mo leta.”+
ט [Tehth]
25 Jehofa o molemo mo go yo o solofetseng mo go ene,+ mo moyeng o o nnang o mmatla.+
26 Go molemo gore motho a lete+ poloko ya ga Jehofa,+ le eleng ka tidimalo.+
27 Go molemo gore monna yo o nonofileng a tshole jokwe mo bosheng jwa gagwe.+
י [Yohdh]
28 A a nne a le nosi mme a didimale,+ ka gonne o beile sengwe mo go ene.+
29 A a beye molomo wa gagwe mo loroleng.+ Gongwe go na le tsholofelo.+
30 A a neye yo o mo itayang+ lerama la gagwe. A a kgobiwe+ ka tekano.
כ [Kaph]
31 Gonne Jehofa ga a na go nna a latlha+ ka bosakhutleng.
32 Gonne le fa a bakile khutsafalo,+ gape ruri o tla bontsha kutlwelobotlhoko go ya ka letlotlo la bopelonomi jwa gagwe jwa lorato.+
33 Gonne ga a bogisa kgotsa ga a hutsafatse bomorwa batho+ go tswa mo pelong ya gagwe.
ל [Laʹmedh]
34 Gore motho a gatakele magolegwa otlhe a lefatshe+ kafa tlase ga dinao+ tsa gagwe,
35 Go faposa katlholo ya monna yo o nang le maatla fa pele ga sefatlhego sa Mogodimodimo,+
36 Go sokamisa motho mo kgetsing ya gagwe ya molao, Jehofa ka boene ga a go amogele.+
ל [Mem]
37 Jaanong, ke mang yo o rileng sengwe se tshwanetse go direga fa Jehofa ka boene a sa laela jalo?+
38 Mo molomong wa Mogodimodimo ga go tswe dilo tse di bosula le se se molemo.+
39 Motho yo o tshelang o ka nnela jang go ngongorega,+ monna yo o nang le maatla, ka ntlha ya boleo jwa gagwe?+
נ [Nun]
40 A ko re hukutseng ditsela tsa rona re di tlhotlhomise,+ mme re boeleng kwa go Jehofa.+
41 A re tsholeletseng pelo ya rona mmogo le magofi a rona kwa Modimong kwa magodimong:+
42 “Rona re dirile ditlolo, e bile re itshwere ka botsuolodi.+ Wena ga o a itshwarela.+
ס [Saʹmekh]
43 O thibile ka bogale+ gore o se ka wa atamelwa, mme o nna o re latelela.+ O bolaile; ga o a bontsha bopelotlhomogi bope.+
44 O thibile ka leru+ le legolo gore o se ka wa atamelwa, gore thapelo e se ka ya feta.+
45 O re dira matladika le matlakala fela mo gare ga ditšhaba.”+
פ [Peʼ]
46 Baba botlhe ba rona ba re buletse molomo+ wa bone.
47 Poifo le khuti di fetogile go nna tsa rona,+ kgakgabalo le tshenyego.+
48 Leitlho la me le nna le elela melatswana ya metsi ka ntlha ya tshenyego ya morwadia batho ba me.+
ע [ʽAʹyin]
49 Leitlho la me le a tshologa mme ga le kitla le iketla, mo e leng gore ga go na boikhutso,+
50 Go fitlha Jehofa a leba kwa tlase a bo a bona go tswa kwa legodimong.+
51 Leitlho la me le diretse moya wa me ka bosetlhogo,+ ka ntlha ya bomorwadia motse wa me+ botlhe.
צ [Tsa·dhehʹ]
52 Baba ba me ba ntsomile fela jaaka nonyane,+ go se na lebaka.+
53 Ba didimaditse botshelo jwa me mo kgatamping,+ mme ba ne ba nna ba nkonopa ka maje.
54 Metsi a eletse mo godimo ga tlhogo ya me.+ Ke rile: “Ruri ke tla kgaolwa!”+
ק [Qohph]
55 Ke biditse leina la gago, tlhe Jehofa, ke le mo kgatamping e e kwa tlasetlase.+
56 O tshwanetse go utlwa lentswe la me.+ O se ka wa subela tsebe ya gago kgololo ya me le go goa ga me ke kopa thuso.+
57 O atametse mo letsatsing le ke neng ka nna ka go bitsa ka lone.+ O ne wa re: “O se ka wa boifa.”+
ר [Rehsh]
58 O bueletse go tlhabana ga moya wa me,+ wena Jehofa. O rekolotse botshelo jwa me.+
59 Wena Jehofa, o bone phoso e ke e diretsweng.+ Tsweetswee a ko o nkatlholele.+
60 O bone pusoloso ya bone yotlhe, dikakanyo tsa bone tsotlhe tse di leng kgatlhanong le nna.+
ש [Sin] kgotsa [Shin]
61 O utlwile kgobo ya bone, wena Jehofa, dikakanyo tsa bone tsotlhe tse di leng kgatlhanong le nna,+
62 Dipounama tsa ba ba ntsogologelang+ le go ntsheba ga bone letsatsi lotlhe.+
63 A ko o lebe go nna ga bone le go ema ga bone.+ Ke nna setlhogo sa pina ya bone.+
ת [Taw]
64 O tla ba busetsa tshwaro, wena Jehofa, go ya ka tiro ya diatla tsa bone.+
65 O tla ba naya pelo e e se nang maitseo,+ phutso ya gago mo go bone.+
66 O tla ba latelela ka bogale mme o ba nyeletse+ ka fa tlase ga magodimo a ga Jehofa.+
