Dipalo 15:1-41
15 Mme Jehofa a bua gape le Moshe a re:
2 “Bua le bomorwa Iseraele, o ba reye o re, ‘Fa kgabagare lo tla mo lefatsheng la mafelo a lona a bonno, le ke le lo nayang,+
3 mme lo tshwanelwa ke go isetsa Jehofa+ tshupelo e e dirwang ka molelo, tshupelo e e fisiwang+ kgotsa setlhabelo go dira maikano a a kgethegileng kgotsa ka go rata+ kgotsa mo nakong ya meletlo ya lona ya dipaka,+ go dira lonko lo lo ritibatsang lo lo yang kwa go Jehofa,+ go tswa mo motlhapeng kgotsa mo letsomaneng;
4 yo o isang tshupelo ya gagwe gape a isetse Jehofa tshupelo ya dijo tsa ditlhaka ya bupi jo bo boleta,+ nngwesomeng ya ifa, e e kolobeditsweng ka nngwennèng ya hine ya leokwane.
5 Mme o ise beine e le tshupelo ya senō,+ nngwennèng ya hine, mmogo le tshupelo e e fisiwang kgotsa setlhabelo sa kwanyana nngwe le nngwe e tonanyana.
6 Kgotsa o isetse phelefu tshupelo ya dijo tsa ditlhaka ya nngwesomeng tse pedi ya bupi jo bo boleta, jo bo kolobeditsweng ka nngwetharong ya hine ya leokwane.
7 Mme o ise beine jaaka tshupelo ya senō, nngwetharong ya hine, e le lonko lo lo ritibatsang lo lo yang kwa go Jehofa.
8 “‘Mme fa go direga gore o isetse Jehofa+ mo go tonanyana ga motlhape e le tshupelo e e fisiwang+ kgotsa setlhabelo sa go dira maikano a a kgethegileng+ kgotsa ditlhabelo tsa kabalano,
9 motho o tshwanetse gore mmogo le mo go tonanyana ga motlhape a ise le tshupelo ya dijo tsa ditlhaka+ ya nngwesomeng tse tharo ya bupi jo bo boleta, jo bo kolobeditsweng ka sephatlo sa hine sa leokwane.
10 Mme o ise beine jaaka tshupelo ya senō,+ sephatlo sa hine, e le tshupelo e e dirwang ka molelo, ya lonko lo lo ritibatsang lo lo yang kwa go Jehofa.
11 Eno ke tsela e go tshwanetseng ga dirwa ka yone ka poo nngwe le nngwe kgotsa ka phelefu nngwe le nngwe kgotsa ka tlhogo e le nngwe mo dikwanyaneng tse ditonanyana kgotsa mo dipoding.
12 Le fa palo e ka nna efe e lo e isang, eo ke tsela e lo tshwanetseng go dira nngwe le nngwe ka yone kafa palong ya tsone.
13 Motho mongwe le mongwe wa mo lefelong la lona a di ise ka tsela eno fa a isa tshupelo e e dirwang ka molelo, ya lonko lo lo ritibatsang lo lo yang kwa go Jehofa.+
14 “‘Mme fa go direga gore moagi mongwe wa moeng a bo a agile le lona e le moeng kgotsa mongwe yo o mo gare ga lona mo dikokomaneng tsa lona, mme a tshwanetse go isa tshupelo e e dirwang ka molelo, ya lonko lo lo ritibatsang lo lo yang kwa go Jehofa, a e dire ka tsela e lo tshwanetseng go e dira ka yone.+
15 Lona ba lo leng ba phuthego le moagi wa moeng yo o agileng e le moeng lo tla nna le molao o le mongwe fela.+ E tla nna molao ka bosakhutleng mo dikokomaneng tsa lona. Moagi wa moeng a itshupe a tshwana le lona fa pele ga ga Jehofa.+
16 Go tshwanetse ga nna le molao o le mongwe le tshwetso e le nngwe ya boatlhodi mo go lona le mo moaging wa moeng yo o agileng le lona e le moeng.’”+
17 Mme Jehofa a tswelela go bua le Moshe a re:
18 “Bua le bomorwa Iseraele, o ba reye o re, ‘Fa lo tla mo lefatsheng le ke lo tlisang mo go lone,+
19 go tla diragala gore fa lo ja sepe sa senkgwe sa lefatshe, lo ntshetse Jehofa moneelo.
20 Lo ntshe moneelo wa mabutswapele+ a bupi jwa lona jo bo seng boleta e le dikuku tse di bopegileng jaaka maseka. Lo o ntshe jaaka fa lo ntsha moneelo wa seboana.
21 Lo ntshe mangwe a mabutswapele a bupi jwa lona jo bo seng boleta e le moneelo o o yang kwa go Jehofa go ya le dikokomana tsa lona.
22 “‘Jaanong fa go direga gore lo dire phoso mme lo sa dire ditaelo tseno tsotlhe,+ tse Jehofa a di buileng le Moshe,
23 sotlhe se Jehofa a se lo laetseng ka Moshe go simolola ka letsatsi le Jehofa a neng a se laolela dikokomana tsa lona ka lone le go ya pele,
24 go tla diragala gore fa go dirilwe ka phoso kgakala le matlho a phuthego, foo phuthego yotlhe e ise powana e le nngwe e le tshupelo e e fisiwang ya lonko lo lo ritibatsang lo lo yang kwa go Jehofa, le tshupelo ya yone ya dijo tsa ditlhaka le tshupelo ya yone ya senō kafa mokgweng wa gale le gale,+ le potsane e le nngwe e le tshupelo ya boleo.+
25 Mme moperesiti a direle phuthego yotlhe ya bomorwa Iseraele tetlanyo,+ mme e e itshwarelwe; ka gonne e ne e le phoso,+ mme bone, ba ne ba tlisa fa pele ga ga Jehofa jaaka tshupelo ya bone, tshupelo e e dirwang ka molelo le tshupelo ya bone ya boleo ka ntlha ya phoso ya bone.
26 Mme e itshwarelwe+ phuthego yotlhe ya bomorwa Iseraele le moagi wa moeng yo o agileng e le moeng mo gare ga bone, ka gonne e ne e le phoso ya batho botlhe.
27 “‘Mme fa moya ope o ka leofa ka phoso,+ foo a o ise podi e namagadi e e mo ngwageng wa yone wa ntlha tshupelo ya boleo.+
28 Mme moperesiti a direle moya o o dirileng phoso ka go dira boleo e se ka boomo tetlanyo fa pele ga ga Jehofa, gore a o direle tetlanyo, mme o e itshwarelwe.+
29 Fa e le motho wa mo lefatsheng la lona mo go bomorwa Iseraele le moagi wa moeng yo o agileng e le moeng mo gare ga bone, go nne le molao o le mongwe mo go lona ka ga go dira sengwe e se ka boomo.+
30 “‘Mme moya o o dirang sengwe ka boomo,+ e ka ne ke motho wa mo lefelong la lona kgotsa moagi wa moeng, a bua ka go kgoba Jehofa,+ mo kgannyeng eo moya oo o kgaolwe mo bathong ba ga one.+
31 Ka gonne o nyaditse lefoko la ga Jehofa+ gape o tlodile+ taolo ya ga Jehofa, ruri moya oo o kgaolwe.+ Tlolo ya one ka osi e mo go one.’”+
32 Fa bomorwa Iseraele ba ne ba ntse mo nageng, nako nngwe ba ne ba fitlhela motho a rwalela dikgong ka letsatsi la sabata.+
33 Foo ba ba neng ba mo fitlhela a rwalela dikgong ba mo tlisa kwa go Moshe le Arone le phuthego yotlhe.
34 Ka jalo ba mo tsenya mo kgolegong,+ ka gonne go ne go ise go bolelwe ka phepafalo gore go dirwe eng ka ene.
35 Fa nako e ntse e tsamaya Jehofa a raya Moshe a re: “Ruri monna yoo o tshwanetse go bolawa,+ phuthego yotlhe e mo kgobotletse ka maje kwa ntle ga bothibelelo.”+
36 Ka jalo phuthego yotlhe ya mo ntshetsa kwa ntle ga bothibelelo mme ya mo kgobotletsa ka maje mme a swa, fela jaaka Jehofa a ne a laetse Moshe.
37 Jehofa a tswelela a bolelela Moshe seno a re:
38 “Bua le bomorwa Iseraele, o ba bolelele gore ba itirele makantsa mo dintlheng tsa diaparo tsa bone go ya le dikokomana tsa bone, mme ba tsenye thapo e e bobududu mo godimo ga makantsa a seaparo,+
39 ‘Mme e nne makantsa a lona a a mo dintlheng, lo a bone mme lo gakologelwe ditaolo tsotlhe+ tsa ga Jehofa lo bo lo di dire, mme lo se ka lwa sala dipelo tsa lona le matlho+ a lona morago, tse lo di salang morago mo go akafaleng.+
40 Boikaelelo ke gore lo gakologelwe lo bo lo dire ditaolo tsotlhe tsa me mme ruri lo itshupe lo le boitshepo mo Modimong+ wa lona.
41 Ke nna Jehofa Modimo wa lona, yo o lo ntshitseng kwa lefatsheng la Egepeto gore ke itshupe ke le Modimo wa lona.+ Ke nna Jehofa Modimo wa lona.’”+
