Dipalo 24:1-25
24 E rile Balaame a bona gore go ne go le molemo mo matlhong a ga Jehofa go segofatsa Iseraele, a se ka a tsamaya jaaka ka dinako tse dingwe+ go tla mo sesupong sepe sa bomadimabe,+ mme a lebisa sefatlhego sa gagwe kwa nageng.
2 E rile Balaame a tsholetsa matlho mme a bona Iseraele e ntse mo metlaaganeng ka ditso+ tsa yone, foo moya wa Modimo wa nna mo go ene.+
3 Ka gone a bua puo ya gagwe ya seane+ a re:
“Go bua ga ga Balaame morwa Beore,Le go bua ga monna yo o nonofileng yo leitlho la gagwe le sa tswalwang,+
4 Go bua ga yo o utlwang mafoko a Modimo,+Yo o neng a bona ponatshegelo ya Mothatayotlhe+Fa a ne a wa matlho a gagwe a sa bipiwa:+
5 A bo megope ya gago e le mentle jang ne, wena Jakobe, metlaagana ya gago, wena Iseraele!+
6 E anametse kgakala+ jaaka mekgatšha e e phothoselang,Jaaka ditshingwana tse di fa nokeng.+Jaaka dimela tsa mokgwapha tse Jehofa a di jadileng,Jaaka masedara a a fa metsing.+
7 Metsi a nna a rotha mo dikgamelong tsa gagwe tse pedi tsa letlalo,Mme peo ya gagwe e fa metsing a mantsi.+Kgosi+ ya gagwe le yone e tla nna kwa godimo go feta Agage,+Le bogosi jwa gagwe bo tla tsholediwa.+
8 Modimo o mo ntsha kwa Egepeto;Mokgwa wa gagwe o bofefo jaaka wa poo ya naga.+O tla ja ditšhaba, bagateledi+ ba gagwe,O tla phura marapo a bone,+ mme o tla a thubaganya ka metswi+ ya gagwe.
9 O ne a obega, a namalala jaaka tau,Mme, jaaka tau, ke mang yo o pelokgale go mo tsosa?+Ba ba go segofatsang ke ba ba segofetseng,+Mme ba ba go hutsang ke ba ba hutsegileng.”+
10 Foo bogale jwa ga Balake jwa tukela Balaame mme a opa diatla,+ mme Balake a tswelela a raya Balaame a re: “Ke ne ke go bileditse go tla go hutsa+ baba ba me, mme bona! o ba segofaditse ka botlalo makgetlo ano a mararo.
11 Mme jaanong tshabela kwa lefelong la gaeno. Ke ne ke ipoleletse gore ruri ke ne ke tlile go go tlotla,+ mme bona! Jehofa o go thibetse gore o se ka wa tlotlwa.”
12 Mme Balaame a raya Balake a re: “A gape ke ne ke sa bua le barongwa ba gago ba o neng wa ba romela kwa go nna ka re,
13 ‘Fa Balake a ne a ka nnaya ntlo ya gagwe e tletse selefera le gouta, nka se kgone go tlola taelo ya ga Jehofa gore ke dire sengwe se se molemo kgotsa se se bosula go tswa mo pelong ya me. Ke tla bua le fa e le eng se Jehofa a tla se buang’?+
14 Mme jaanong bona, ke ya kwa bathong ba gaetsho. A ko o tle, mma ke go itsise+ se setšhaba seno se tla se dirang batho ba gago morago ga moo mo bokhutlong jwa metlha.”+
15 Ka jalo a bua puo ya gagwe ya seane+ a re:“Go bua ga ga Balaame morwa Beore,Le go bua ga monna yo o nonofileng yo leitlho la gagwe le sa tswalwang,+
16 Go bua ga yo o utlwang mafoko a Modimo,+Le yo o itseng kitso ya Mogodimodimo—O ne a bona ponatshegelo ya Mothatayotlhe+Fa a ne a wela fa fatshe matlho a gagwe a sa bipiwa:+
17 Ke tla mmona,+ mme e seng gone jaanong;Ke tla mo leba, mme e seng gaufi.Ruri naledi+ e tla tswa mo go Jakobe,Le lore lwa segosi lo tla tsoga mo go Iseraele.+O tla thubaganya ditlhakore tsa tlhogo ya ga Moabe+Le magata a bomorwa khuduego ya ntwa botlhe.
18 Mme Edoma o tla nna thuo,+Ee, Seire+ o tla nna thuo ya baba ba gagwe,+Fa Iseraele e bontsha bopelokgale jwa yone.
19 Mme motho o tla fenya+ a tswa mo go Jakobe,Mme o tla senya mofalodi ope mo motseng.”+
20 E rile a bona Amaleke, a tsweletsa puo ya gagwe ya seane a re:+“Amaleke e ne e le wa ntlha wa ditšhaba,+Mme bokhutlo jwa gagwe morago ga moo e tla nna go nyelela+ ga gagwe.”
21 E rile a bona Bakene,+ a tsweletsa puo ya gagwe ya seane a re:“Bonno jwa gago bo nnela ruri, mme bonno jwa gago bo tlhomilwe mo lefikeng le legolo.
22 Mme go tla nna le yo o tla fisang Kaine.+E tla nna lobaka lo lo kae go fitlha Asiria a go isa botshwarwa?”+
23 Mme a tsweletsa puo ya gagwe ya seane a re:“Tatlhego! Ke mang yo o tla falolang fa Modimo a baka seno?+
24 Mme go tla nna le dikepe go tswa kwa losing lwa Kitime,+Di tla bogisa Asiria,+Di tla bogisa Ebere.Mme le ene o tla nyelela kgabagare.”
25 Morago ga moo Balaame a nanoga a tsamaya a boela kwa lefelong la gagabo.+ Mme Balake le ene a tsamaya.
