Dipalo 30:1-16
30 Foo Moshe a bua le ditlhogo+ tsa ditso tsa bomorwa Iseraele a re: “Leno ke lefoko le Jehofa a le laetseng:
2 Fa go direga gore motho a ikanele+ Jehofa kgotsa gore a bofe moya wa gagwe ka maikano+ a go ithiba,+ a se ka a tlola lefoko+ la gagwe. A dire go ya ka sotlhe se se duleng mo molomong wa gagwe.+
3 “Mme fa go direga gore mosadi a ikanele Jehofa+ kgotsa a ipofe ka maikano a go ithiba mo ntlong ya ga rraagwe mo bosheng jwa gagwe,
4 mme rraagwe a bo a utlwa maikano a gagwe kgotsa maikano a gagwe a go ithiba a a bofileng moya wa gagwe ka one mme rraagwe a bo a mo didimalela fela, maikano otlhe a gagwe a tla ema, le maikano mangwe le mangwe a go ithiba+ a a bofileng moya wa gagwe ka one a tla ema.
5 Mme fa rraagwe a mo ileditse mo letsatsing le a utlwang maikano otlhe a gagwe ka lone kgotsa maikano a gagwe a go ithiba a a bofileng moya wa gagwe ka one, ga a kitla a ema, mme Jehofa o tla mo itshwarela, ka gonne rraagwe a ne a mo iletsa.+
6 “Le fa go ntse jalo, fa go direga gore a bo a le wa monna mongwe, mme maikano a gagwe a le mo go ene mosadi+ kgotsa tsholofetso ya go tlhoka go akanya ya dipounama tsa gagwe e a bofileng moya wa gagwe ka yone,
7 mme monna wa gagwe a e utlwa a bo a mo didimalela fela mo letsatsing le a e utlwang ka lone, maikano a gagwe a tla ema kgotsa maikano a gagwe a go ithiba a a bofileng moya wa gagwe ka one a tla ema.+
8 Mme fa monna wa gagwe a mo iletsa+ mo letsatsing le a e utlwileng ka lone, o fedisitse maikano a gagwe a a neng a le mo go ene kgotsa tsholofetso ya go tlhoka go akanya ya dipounama tsa gagwe e a neng a bofile moya wa gagwe ka yone, mme Jehofa o tla mo itshwarela.+
9 “Mo kgannyeng ya maikano a motlholagadi kgotsa mosadi yo o tlhadilweng, sengwe le sengwe se a bofileng moya wa gagwe ka sone se tla ema kgatlhanong le ene.
10 “Le fa go ntse jalo, fa e le gore o ikanne mo ntlong ya monna wa gagwe kgotsa a bofile moya wa gagwe ka maikano a go ithiba+ ka ikano,
11 mme monna wa gagwe a e utlwile mme a mo didimaletse fela, ga a mo iletsa; mme maikano otlhe a gagwe a tla ema kgotsa ikano epe fela ya go ithiba e a bofileng moya wa gagwe ka yone e tla ema.
12 Mme fa e le gore monna wa gagwe o a fedisitse gotlhelele mo letsatsing le a utlwileng mafoko ape a dipounama tsa gagwe ka lone jaaka maikano a gagwe kgotsa jaaka maikano a go ithiba a moya wa gagwe, ga a kitla a ema.+ Monna wa gagwe o a fedisitse, mme Jehofa o tla mo itshwarela.+
13 Maikano ape fela kgotsa ikano epe ya go ithiba ya go bogisa moya,+ monna wa gagwe a e tlhomamise kgotsa monna wa gagwe a e fedise.
14 Mme fa monna wa gagwe a mo didimalela fela letsatsi le letsatsi, o tlhomamisitse maikano otlhe a gagwe kgotsa maikano otlhe a gagwe a go ithiba a a mo go ene.+ O a tlhomamisitse ka gonne o ne a mo didimalela mo letsatsing le a a utlwileng ka lone.
15 Mme fa a a fedisa gotlhelele a sena go a utlwa, tota le ene o sikara tlolo+ ya gagwe.
16 “Eno ke melao e Jehofa a neng a e laolela Moshe jaaka e e fa gare ga monna le mosadi+ wa gagwe, jaaka e e fa gare ga rre le morwadie mo bosheng jwa gagwe mo ntlong ya ga rraagwe.”+
