Dipalo 31:1-54
31 Foo Jehofa a bua le Moshe a re:
2 “Busolosetsa+ bomorwa Iseraele mo Bamidianeng.+ Morago ga moo o tla phuthelwa kwa bathong ba gaeno.”+
3 Ka jalo Moshe a bua le batho a re: “Tlhomelelang banna ba ba mo go lona gore ba ye bosoleng, gore ba tsogologele Bamidiana ba diragatse pusoloso ya ga Jehofa mo Bamidianeng.+
4 Lo romele sekete sa lotso longwe le longwe lwa ditso tsotlhe tsa Iseraele bosoleng.”
5 Ka jalo ga ntshiwa sekete sa lotso mo diketeng+ tsa Iseraele, dikete di le lesome le bobedi di tlhomeletse go ya bosoleng.+
6 Foo Moshe a ba romela, sekete sa lotso longwe le longwe, kwa bosoleng, bone le Finease+ morwa moperesiti Eliasare go ya bosoleng, mme dilwana tse di boitshepo le diterompeta+ tsa go tlhaba mekgosi di ne di le mo seatleng sa gagwe.
7 Ba tlhabana le Midiana, fela jaaka Jehofa a ne a laetse Moshe, ba bolaya monna mongwe le mongwe.+
8 Ba bolaya dikgosi tsa Midiana mmogo le ba bangwe ba ba bolailweng, e bong, Efi le Rekeme le Sure le Hure le Reba, dikgosi di le tlhano tsa Midiana; ba bolaya Balaame+ morwa Beore ka tšhaka.
9 Mme bomorwa Iseraele ba isa basadi ba Bamidiana le bana ba bone botshwarwa;+ mme ba gapa diphologolo tsotlhe tsa bone tsa mo gae le diruiwa tsotlhe tsa bone le dilo tsotlhe tsa bone tse ba itshedisang ka tsone ba di gapa.
10 Mme ba fisa metse yotlhe ya bone e ba neng ba nna mo go yone mme mathibelelo otlhe a bone a a dikanyeditsweng ka dipota ba a fisa ka molelo.
11 Mme ba tsaya thopo+ yotlhe le kgapo yotlhe e e leng batho le diruiwa.
12 Mme ba tlisa kwa go Moshe le moperesiti Eliasare le phuthego ya bomorwa Iseraele batshwarwa le kgapo le thopo, kwa bothibelelong, kwa mabaleng a a sekaka a Moabe,+ a a leng fa thoko ga Joredane kwa Jeriko.
13 Foo Moshe le moperesiti Eliasare le dikgosana tsotlhe tsa phuthego ba tswa ba ya go ba kgatlhantsha kwa ntle ga bothibelelo.
14 Mme Moshe a galefela banna ba ba tlhomilweng ba mephato ya ntwa,+ balaodi ba dikete le balaodi ba makgolo ba ba neng ba tsena ba tswa kwa letsholong la sesole.
15 Ka jalo Moshe a ba raya a re: “A lo bolokile mosadi mongwe le mongwe a tshela?+
16 Bonang! Ke bone ba ka lefoko la ga Balaame ba neng ba tlhotlheletsa bomorwa Iseraele gore ba direle Jehofa ka go tlhoka boikanyegi+ ka tiragalo ya ga Peore,+ mo petso e neng ya wela phuthego ya ga Jehofa.+
17 Jaanong bolayang motho mongwe le mongwe wa monna mo go ba bannye, lo bo lo bolaye mosadi mongwe le mongwe yo o kileng a tlhakanela dikobo le monna ka go lala le motho wa monna.+
18 Mme lo ipolokele botlhe ba bannye mo basading ba tshela ba ba iseng ba itse go lala le monna.+
19 Fa e le lona, thibelelang kwa ntle ga bothibelelo malatsi a le supa. Mongwe le mongwe yo o bolaileng moya+ le mongwe le mongwe yo o amileng mongwe yo o bolailweng,+ lo iitshekise+ mo letsatsing la boraro le mo letsatsing la bosupa, lona le batshwarwa ba lona.
20 Mme seaparo sengwe le sengwe le selwana sengwe le sengwe sa letlalo le sengwe le sengwe se se dirilweng ka maodi a podi le selwana sengwe le sengwe sa logong, lo se iitshepisetse mo boleong.”+
21 Foo moperesiti Eliasare a raya banna ba masole ba ba neng ba ile tlhabanong a re: “Ono ke molao o Jehofa a neng a o laolela Moshe,
22 ‘Gouta fela le selefera, kgotlho, tshipi, thini le lloto,
23 sengwe le sengwe se se dirwang ka molelo, lo se fetise mo molelong,+ mme se tla nna phepa. Se itshekisiwe fela ka metsi a a phepafatsang.+ Mme sengwe le sengwe se se sa dirweng ka molelo lo se fetise mo metsing.+
24 Mme lo tlhatswe diaparo tsa lona mo letsatsing la bosupa lo nne phepa, mme morago ga moo lo ka nna lwa tsena mo bothibelelong.’”+
25 Mme Jehofa a raya Moshe a re:
26 “Tsaya palo ya kgapo, batshwarwa ba batho le diruiwa, wena le moperesiti Eliasare le ditlhogo tsa borre ba phuthego.
27 Mme o kgaoganye kgapo sebedi fa gare ga ba ba nnang le seabe mo tlhabanong ba ba neng ba dule letsholo le phuthego+ yotlhe.
28 Mme mo banneng ba ntwa ba ba neng ba dule letsholo o tseye moya o le mongwe mo go e le makgolo a matlhano, wa batho le wa motlhape le wa diesele le wa letsomane go nna lekgetho+ la ga Jehofa.
29 Lo o tseye mo sephatlong sa tsone mme lo o neye moperesiti Eliasare e le moneelo wa ga Jehofa.+
30 Lo tseye o le mongwe mo go e le masome a matlhano mo sephatlong sa bomorwa Iseraele, wa batho, wa motlhape, wa diesele le wa letsomane, wa seruiwa sa mofuta mongwe le mongwe, mme lo e neye Balefi,+ ba ba bolokang boikarabelo jwa bone mo motlaaganeng+ wa ga Jehofa.”
31 Mme Moshe le moperesiti Eliasare ba dira fela jaaka Jehofa a ne a laetse Moshe.
32 Mme kgapo, e leng thopo yotlhe e batho ba ba neng ba dule letsholo ba neng ba e tsere jaaka thopo, ya fitlha go dikete di le makgolo a le marataro le masome a le supa le botlhano tsa letsomane,
33 le dikete di le masome a supa le bobedi tsa motlhape,
34 le diesele di le dikete di le masome a marataro le bongwe.
35 Fa e le meya ya batho+ e leng basadi ba ba neng ba sa itse go lala le monna,+ meya yotlhe e ne e le dikete di le masome a mararo le bobedi.
36 Mme sephatlo se e neng e le kabelo ya ba ba neng ba dule letsholo palo ya sone e ne ya fitlha go letsomane la dikete di le makgolo a le mararo le masome a mararo le bosupa le makgolo a le matlhano.
37 Mme lekgetho+ la ga Jehofa le le tswang mo letsomaneng la fitlha go makgolo a le marataro le masome a le supa le botlhano.
38 Mme ya motlhape e ne e le dikete di le masome a mararo le borataro, mme lekgetho le le mo go tsone la ga Jehofa e ne e le di le masome a supa le bobedi.
39 Mme diesele di ne di le dikete di le masome a mararo le makgolo a le matlhano, mme lekgetho le le mo go tsone la ga Jehofa e ne e le di le masome a marataro le bongwe.
40 Mme meya ya batho e ne e le dikete di le lesome le borataro, mme lekgetho le le mo go yone la ga Jehofa e ne e le meya e e masome a mararo le bobedi.
41 Foo Moshe a naya moperesiti Eliasare+ lekgetho e le moneelo wa ga Jehofa, fela jaaka Jehofa a ne a laetse Moshe.+
42 Mme mo sephatlong sa bomorwa Iseraele, se Moshe a neng a se kgaoganya se tswa mo go se e leng sa banna ba ba neng ba lwa mo ntweng:
43 Jaanong sephatlo sa phuthego go simolola ka letsomane se ne sa fitlha go dikete di le makgolo a le mararo le masome a le mararo le bosupa le makgolo a le matlhano,
44 mme sa motlhape, dikete di le masome a mararo le borataro,
45 mme diesele, dikete di le masome a mararo le makgolo a le matlhano,
46 mme meya ya batho, dikete di le lesome le borataro.
47 Foo Moshe a tsaya mo sephatlong sa bomorwa Iseraele o o tshwanetseng go tsewa mo go e le masome a matlhano, wa batho le wa diruiwa, a e naya Balefi,+ ba ba bolokang boikarabelo+ jwa bone mo motlaaganeng wa ga Jehofa, fela jaaka Jehofa a ne a laetse Moshe.
48 Mme banna ba ba tlhomilweng ba e neng e le ba dikete tsa mophato+ wa sesole, balaodi ba dikete le balaodi ba makgolo,+ ba atamela Moshe,
49 ba raya Moshe ba re: “Batlhanka ba gago ba tsere palo ya banna ba ntwa ba ba mo tlhokomelong ya rona mme ga go na le fa e le a le mongwe yo o begilweng a seyo mo go rona.+
50 Ka jalo mma mongwe le mongwe wa rona a ise se a se boneng e le tshupelo+ ya ga Jehofa, dilwana tsa gouta, dikeetanenyana tsa magwejana, le maseka, dipalamonwana tse di tshwayang,+ manyena, le mekgabisa+ ya basadi, gore re direle meya ya rona tetlanyo fa pele ga ga Jehofa.”
51 Ka jalo Moshe le moperesiti Eliasare ba amogela gouta mo go bone,+ mekgabo yotlhe.
52 Mme gouta yotlhe ya moneelo e ba neng ba e ntshetsa Jehofa e le moneelo ya fitlha go dishekele di le dikete di le lesome le borataro makgolo a le supa le masome a le matlhano, e tswa mo balaoding ba dikete le mo balaoding ba makgolo.
53 Mongwe le mongwe wa banna ba mophato wa sesole o ne a itseetse kgapo.+
54 Ka jalo Moshe le moperesiti Eliasare ba amogela gouta e tswa mo balaoding ba dikete le ba makgolo mme ba e tlisa mo teng ga mogope wa bokopanelo go nna segopotso+ sa bomorwa Iseraele fa pele ga ga Jehofa.
